માર્કેટ રેગ્યુલેટર સેબી અને બોમ્બે સ્ટોક એક્સચેન્જે હવે ઇન્ફોસિસના ગોટાળામાં ગહન તપાસ શરૂ કરી દીધી છે. ઇન્ફોસિસના મેનેજમેન્ટ દ્વારા શેર પ્રાઇસ અંગે સંવેદનશીલ માહિતી જાહેર નહીં કરવાના કિસ્સામાં સેબીએ તપાસ શરૂ કરી દીધી છે.
એક વ્હિસલબ્લોઅર દ્વારા કંપનીના મેનેજમેન્ટ વિરુદ્ધ ગંભીર આરોપ લગાવાયા બાદ કંપની મેનેજમેન્ટ સંબંધિત કેટલાક મામલામાં રહેલી ખામીઓ પર હવે સેબીની વોચ રહેશે. આ સાથે જ કંપનીના શેરમાં સંભવિત ઇનસાઇડર ટ્રેડિંગને લઇને પણ સેબી તપાસ કરી રહી છે. આ માટે હવે સેબી ટૂંક સમયમાં કંપનીના સંચાલકોને પૂછપરછ માટે બોલાવી શકે છે.
એ જ રીતે બોમ્બે સ્ટોક એક્સચેન્જ (બીએસઇ)એ કંપનીના ટોપ એક્ઝિક્યુટિવ વિરુદ્ધ એક વ્હિસલબ્લોઅરની ફરિયાદ મળ્યાની જાણકારી કેમ આપી ન હતી તે અંગે ઇન્ફોસિસને વેધક સવાલ કર્યો છે.
સ્વયંને એથિકલ એમ્પ્લોઇઝ કહેનાર એક અજાણ્યા જૂથે સપ્ટેમ્બરના અંતમાં ઇન્ફોસિસના બોર્ડ અને યુએસ સિક્યોરિટી એક્સચેન્જ એન્ડ કમિશનને કંપની દ્વારા પોતાની રેવન્યૂ અને માર્જિનને કેલક્યુલેટ કરવાની પદ્ધતિમાં ગેરરીતિ આચરવાનો આરોપ મૂક્યો હતો અને સીઇઓ સલીલ પારેખ અને સીએફઓ નીલાંજલ રોયને આ માટે જવાબદાર ગણાવ્યા હતા.