વિશ્વની મહાસત્તા અમેરિકામાં રાષ્ટ્રપતિ પદ માટે આજે મતદાન થવા જઈ રહ્યું છે, અમેરિકામાં મતદાનના તુરત બાદ જ મતગણતરી શરુ થઈ જાય પરંતુ આ વખતે પરિણામમાં વિલંબ થવાની નિષ્ણાતો આશંકા વ્યક્ત કરી રહ્યા છે.
અમેરિકામાં રાષ્ટ્રપતિ પદ માટે મતદાન
વોટિંગ ખતમ થતાં જ 48 રાજ્યોની મત ગણતરી શરુ થઇ જશે
આ વખતે પરિણામ આવવામાં થઇ શકે છે વિલંબ, કોર્ટ જવાની તૈયારીમાં ટ્રમ્પ
ભારતીય સમય અનુસાર ક્યારે શરુ થશે મતદાન ?
અમેરિકામાં મંગળવારે રાષ્ટ્રપતિ અને ઉપરાષ્ટ્રપતિ પદ માટે મતદાન થઇ રહ્યું છે. જે લોકોએ મેલ ઇન બેલેટમાં અત્યાર સુધી મતદાન કર્યું નથી તે લોકોને હવે વોટિંગ કરવાનો અધિકાર આપવામાં આવ્યો છે. ભારતીય સમય અનુસાર મંગળવારે સાડા ચાર વાગે મતદાન શરુ થશે અને બુધવારે સવારે સાડા સાત વાગ્યા સુધી મતદાન ચાલુ રહેશે. માનવામાં આવી રહ્યું છે કે મતદાનના થોડા સમય બાદ જ પરિણામ આવી જશે. જોકે અમુક નિષ્ણાતોને આશંકા છે કે આ વખતે પરિણામમાં વિલંબ થઇ શકે છે.
કેમ પરિણામોમાં થઇ શકે છે વિલંબ ?
નોંધનીય છે કે કોરોના વાયરસના કારણે આ ચૂંટણીમાં અડધા મતદાતાઓએ પોસ્ટલ બેલેટ અથવા મેલ ઇન બેલેટથી મતદાન કર્યું છે. અમેરિકામાં મોટા ભાગના રાજ્યોમાં ત્રીજી નવેમ્બરના રોજ મેલ ઇન બેલેટ સ્વીકારવામાં આવ્યા જ્યારે અમુક રાજ્યોને હજુ પણ મતપત્રો મોકલવાની મંજૂરી આપવામાં આવી છે. પેન્સીલવેનિયા અને નોર્થ કેરોલિનામાં છઠ્ઠી નવેમ્બર, મિનેસોટા અને નેવાડામાં 10મી અને ઓહિયોમાં 13મી નવેમ્બર સુધી મતપત્ર આપવાની મંજૂરી છે.
પોસ્ટલ બેલેટના કારણે પણ ચૂંટણીના પરિણામો મોડા આવે તેવી આશંકા છે. બધા જ રાજ્યોએ 10મી નવેમ્બર સુધી પરિણામો પ્રકાશિત કરવાના રહેશે, જોકે કોઈ રાજ્યમાં સમસ્યા આવે તો વિલંબ થઇ શકે છે.
48 રાજ્યોની મતગણતરી તરત જ શરુ થઇ જશે
અમેરિકામાં ચૂંટણી ખતમ થતાં જ 48 રાજ્યોના મતની ગણતરી થવાની શરૂઆત થઇ જશે અને એવામાં આ રાજ્યોમાં ટ્રમ્પ કે બિડેન બે માંથી જેને બહુમતી મળતી દેખાય તો કોઈ વાંધો નથી પરંતુ જો આ રાજ્યોમાં પણ સ્થિતિ સ્પષ્ટ ન થાય તો બીજા બે રાજ્યોના પરિણામોની રાહ જોવાની રહેશે.
બીજી તરફ ડોનાલ્ડ ટ્રમ્પે સંકેત આપ્યા છે કે તે મતદાન ખતમ થતાં જ સર્વોચ્ચ અદાલતમાં અપીલ કરશે એવામાં જો કોર્ટનો કોઈ નિર્ણય આવવામાં વિલંબ થઇ શકે છે.