ભારતમાં નવા કૃષિ કાયદાઓને લઈને હજારોની સંખ્યામાં ખેડૂતો રસ્તા પર ઉતરીને આંદોલન કરી રહ્યા છે ત્યારે આ આંદોલનને વિશ્વનાં ઘણા દેશોથી સમર્થન મળી રહ્યું છે.
અમેરિકાના કેટલાક સાંસદોએ આંદોલનનું કર્યું સમર્થન
અમેરિકા પહેલા કેનેડા બ્રિટનમાંથી ખેડૂતોના પક્ષમાં ઉઠી હતી અવાજ
ભારતે આ નિવેદનબાજીઓને ભ્રામક અને અનુચિત ગણાવી
કેન્દ્ર સરકાર દ્વારા લાવવામાં આવેલા ત્રણ નવા કાયદાઓ સામે હજારોની સંખ્યામાં ખેડૂતો દિલ્હીની વિવિધ બોર્ડર પર આંદોલન કરી રહ્યા છે અને આજે ભારત બંધના એલાનના પગલે આખા ભારતમાંથી પણ ઘણા લોકો સમર્થન કરી રહ્યા છે ત્યારે આ આંદોલનને વિશ્વના ઘણા દેશો અને નેતાઓ સમર્થન આપી રહ્યા છે. આ આંદોલન પર હવે અમેરિકાના સાંસદો પણ નિવેદન આપી રહ્યા છે ત્યારે ભારતે આ બધી જ વિદેશી નિવેદનબાજી પર જવાબ આપ્યો છે.
ભારતનો સણસણતો જવાબ
અમેરિકાના કેટલાક સાંસદોએ ભારતમાં થઇ રહેલા આ આંદોલનનું સમર્થન માર્યું અને કહ્યું શાંતિપૂર્ણ રીતે થઇ રહેલા પ્રદર્શનને અનુમતિ આપવી જોઈએ. ખેડૂતો પર આવા વિદેશી નેતાઓના નિવેદનોને ભારતે ભ્રામક અને અનુચિત બતાવ્યા છે અને એમ પણ કહ્યું કે આ એક લોકતાંત્રિક દેશનો આંતરિક મામલો છે.
અમેરિકાના સાંસદો ખેડૂતોના સમર્થનમાં
નોંધનીય છે ભારતમાં થઇ રહેલા આંદોલનને વિશ્વના ઘણા બધા દેશોથી સમર્થન મળી રહ્યું છે અને કેનેડા જેવા દેશો ખુલીને ખેડૂતોના સમર્થનમાં દેખાયા છે ત્યારે અમેરિકાનાં સાંસદ ડગ લામાલ્ફાએ કહ્યું કે ભારતમાં પોતાની આજીવિકાને બચાવવા માટે સરકારના અસ્પષ્ટ કાયદાઓ સામે થઇ રહેલા આંદોલનમાં હું સમર્થન કરું છું. કેલિફોર્નિયાથી રિપબ્લિકન સાંસદે કહ્યું કે પંજાબી ખેડૂતોને પોતાની સરકાર સામે હિંસાના ભય વગર શાંતિપૂર્ણ પ્રદર્શનની રજા આપવી જોઈએ.
ડેમોક્રેટ અને રિપબ્લિકન સાંસદોએ ભારત સરકારને કરી અપીલ
નોંધનીય છે કે અમેરિકાની મુખ્ય મીડિયામાં પણ ખેડૂતોને લઈને ખૂબ કવરેજ કરવામાં આવી રહ્યું છે ત્યારે સાંસદ એન્ડી લેવીએ કહ્યું કે આ આંદોલનથી તો પ્રેરણા મળી છે અને વર્ષ 2021માં જનતાની તાકાત વધવાના રૂપમાં તેને જોવું જોઈએ જ્યારે ડેમોક્રેટ સાંસદ જોશ હાર્ડરે કહ્યું કે ભારત દુનિયાનું સૌથી મોટું લોકતંત્ર છે અને પોતાના નાગરિકોને શાંતિપૂર્ણ પ્રદર્શનની અનુમતિ આપવી જ જોઈએ. હું ખેડૂતો અને પીએમ મોદીને વાતચીત માટે અપીલ કરું છું.