ભારતમાં સતત વધી રહેલા કોરોના વાયરસના કેસ વચ્ચે અમેરિકાએ આવા મુશ્કેલ સમયમાં ભારતને ઝટકો આપ્યો છે.
પૂનાવાલાએ અમેરિકાને કરી હતી માંગ
મુશ્કેલ સમયમાં અમેરિકાએ ભારતનો સાથ છોડ્યો
વેક્સિનના કાચા માલ માટે અમેરિકામાં છે કડક નિયમો
અમેરિકાની સરકારે ભારતની માંગ ન સ્વીકારી
કોરોના વાયરસની વેક્સિન માટે જરૂરી કાચા માલ માટે અમેરિકાને રોક હટાવવા માટે માંગ કરવામાં આવી હતી ત્યારે આ જૉ બાયડનના તંત્ર તરફથી જવાબ આપવામાં આવ્યો છે કે ભારતની જરૂરીયાતોને સમજી શકીએ છીએ પરંતુ અત્યારે હાથ બંધાયેલા છે. વ્હાઇટ હાઉસના પ્રેસ સેક્રેટરીએ કહ્યું કે અમે ભારતની જરૂરિયાતોને સમજીએ છીએ.
ડૉ. ફોસીએ કહ્યું કે અત્યારે તો કશું નથી
અમેરિકામાં કોરોના વાયરસ રિસ્પોન્સ ટીમના સલાહકાર ડૉ. એન્થની ફોસીએ કહ્યું હતું કે અત્યારે અમેરિકા પાસે ભારતને આપવા માટે કશું નથી. ડૉ. એન્થની ફોસીએ કહ્યું કે અત્યારે તો પૂનાવલાની માંગને પૂરી કરવા માટે કશું નથી.
શું હતી માંગ?
નોંધનીય છે કે ભારતમાં કોરોના વાયરસના વધતાં કેસ વચ્ચે વેક્સિનનું ઉત્પાદન વધારવા માટે અદાર પૂનાવાલાએ જૉ બાયડનને અપીલ કરી હતી કે અમેરિકાએ કાચા માલની નિકાસના નિયમોના છૂટ આપવી જોઈએ જેથી કોરોના સામે લડાઈને મજબૂતીથી લડી શકાય.
વેક્સિનેશન વધારવામાં આવશે
નોંધનીય છે કે ભારતમાં કોરોના વાયરસના કેસની સંખ્યામાં સતત વધારો થઈ રહ્યો છે ત્યારે વધુમાં વધુ લોકોને વેક્સિન આપવા માટે સરકાર દ્વારા પ્રયાસ કરવામાં આવી રહ્યા છે ત્યારે હવે પહેલી મેથી 18 વર્ષથી ઉપરના તમામ લોકોને વેક્સિન આપવામાં આવશે.
ભારતમાં બીજી લહેર બની કહેર
ભારતમાં માર્ચ મહિનાથી સતત કેસની સંખ્યામાં વધારો થઈ રહ્યો છે. પરિસ્થિતિ દિવસને દિવસે ખૂબ જ કથળી રહી છે અને જુદા જુદા રાજ્યોમાં હોસ્પિટલો અને સ્મશાનોમાં જગ્યા નથી. એવામાં દરરોજ કોરોના વાયરસની કેસની સંખ્યામાં સતત ઉછાળો જોવા મળી રહ્યો છે. ભારતમાં 21મી એપ્રિલ, 2021ના આંકડા અનુસાર 2,59,170 નવા કેસ સામે આવ્યા છે જ્યારે 1,761 મોત થઈ છે. આ સિવાય એક દિવસમાં 1,54,761 લોકો સાજા થયા છે.