ડિફેન્સ સિસ્ટમ / રશિયન S-400 મિસાઈલ સિસ્ટમ ખરીદવા સામે ટ્રમ્પ પ્રશાસનની ચેતવણી

વોશિંગ્ટનઃ ભારત દ્વારા રશિયા પાસેથી લાંબા અંતરની એસ-૪૦૦ મિસાઇલ એર ડિફેન્સ સિસ્ટમની ખરીદીથી અમેરિકાના પેટમાં તેલ રેડાયું છે. ટ્રમ્પ પ્રશાસને એવી ચેતવણી આપી છે કે રશિયા પાસેથી મિસાઇલ સિસ્ટમ ખરીદવાના કારણે ભારત અને અમેરિકાના સંરક્ષણ સંબંધો ગંભીર રીતે પ્રભાવિત થશે. રશિયાની  લાંબા અંતરની એસ-૪૦૦ મિસાઇલ એર ડિફેન્સ સિસ્ટમ ચીને પણ ગઈ સાલ ખરીદી લીધી હતી અને જુલાઈમાં તેની ડિલિવરી પણ થઈ ગઈ છે.

ચીન અને રશિયા વચ્ચે ૨૦૧૪માં આ લાંબા અંતરની એસ-૪૦૦ મિસાઇલ એર ડિફેન્સ સિસ્ટમ માટે ત્રણ અબજ ડોલરમાં ડીલ થઈ હતી. ભારતે આ સિસ્ટમની ખરીદી માટે રશિયા સાથે ઓક્ટોબર-૨૦૧૮માં રૂ. ૪૦,૦૦૦ કરોડનો સોદો કર્યો હતો. વિદેશ વિભાગના એક વરિષ્ઠ અધિકારીએ પત્રકારોના એક ગ્રૂપને જણાવ્યું હતું કે મોસ્કો પાસેથી લાંબા અંતરની એસ-૪૦૦ મિસાઇલ એર ડિફેન્સ સિસ્ટમ ખરીદવાનો નવી દિલ્હીનો નિર્ણય અત્યંત મહત્ત્વપૂર્ણ છે.

જ્યાં સુધી ભારત અમેરિકા પાસેથી લશ્કરી શસ્ત્ર સરંજામની ખરીદી વધારશે નહીં ત્યાં સુધી ભારત રશિયા પાસેથી લાંબા અંતરની એસ-૪૦૦ મિસાઇલ એર ડિફેન્સ સિસ્ટમ ખરીદી કરી શકશે નહીં એવા અહેવાલને આ અધિકારીએ રદિયો આપ્યો હતો. અધિકારીએ વધુમાં જણાવ્યું હતું કે હું વાત સાથે સંમત નથી. સીએએટીએસએ પ્રતિબંધોના કારણે લાંબા અંતરની એસ-૪૦૦ મિસાઇલ એર ડિફેન્સ સિસ્ટમની ખરીદી મહત્ત્વપૂર્ણ છે. ભવિષ્યમાં ઉચ્ચ ટેકનોલોજિકલ સહકારના સંદર્ભમાં આ ખરીદી વધુ મહત્ત્વપૂર્ણ છે. અધિકારીએ જણાવ્યું હતું કે  સીએએટીએસએ હેઠળ રશિયા પાસેથી શસ્ત્રો ખરીદવા પર અમેરિકન કોંગ્રેસ દ્વારા કેટલાક પ્રતિબંધ મૂકવામાં આવ્યાં છે.