નિવેદન / ટેરિફ વિવાદ વચ્ચે USએ કહ્યું ભારતની અર્થવ્યવસ્થાને સુધારવા કરી રહ્યા છીએ મહેનત

માઇક પોમ્પિયો હાલ હિન્દ-પ્રશાંત ક્ષેત્રની યાત્રા પર છે. આ દરમિયાન પત્રકારો સાથેની વાતચીતમાં એમણે કહ્યું કે, ''અમારી હિન્દ-પ્રશાંત રણનીતિ સારી રીતે કામ કરી રહી છે, આ ન માત્ર એમના માટે, પરંતુ અમેરિકા માટે પણ લાભકારી સાબિત થશે. અમે આ ગઠબંધનોને બનતા જોયા છે. અમે ભારતની અર્થવ્યવસ્થાની વૃદ્ધિ માટે અવસર આપવા ભારત સરકાર સાથે સખત મહેનત કરી રહ્યા છીએ.''

ભારત અને અમેરિકા વચ્ચે ટેરિફના દરોને લઇને ચાલી રહેલા વિવાદ વચ્ચે આ મહત્વપૂર્ણ સમાચાર છે. થોડાક દિવસો પહેલા ભારતે અમેરિકાની સાથે વ્યાપારિક સંબંધોની દિશામાં એક મહત્વપૂર્ણ પગલું ઉઠાવતા USથી આયાત કરવામાં આવી રહેલી 28 વસ્તુઓ પર ટેરિફ વધારી દીધું હતું. એ સૂચીમાં અખરોટ, બદામ જેવી વસ્તુઓ સામેલ હતી. 

ભારતનું આ પગલું એક પ્રતિક્રિયા હતું. આ પહેલા અમેરિકાએ ભારતને વ્યાપારમાં મળનારી પસંદગીઓ સમાપ્ત કરી હતી. 5 જૂને અમેરિકી રાષ્ટ્રપ્રમુખ ડોનાલ્ડ ટ્રમ્પે અમેરિકાની સાથે વ્યાપારમાં ભારતને મળનારી વિશેષ સુવિધા ખતમ કરી દીધી હતી. આ સામાન્ય પસંદગી પ્રક્રિયા (Generalized System Of Preferences GSP)થી ઓળખવામાં આવે છે. ત્યારબાદ ભારતે 28 સામાનો સાથે આયાત પર ટેરિફમાં વધારો કર્યો હતો. 

ભારતીય અર્થવ્યવસ્થાના વિકાસ માટે અમેરિકાની મહેતન અંગેની પોમ્પિયોની આ ટિપ્પણી એવા સમયે આવી છે, જ્યારે કેટલાક સપ્તાહ પહેલા અમેરિકી વ્યાપાર પ્રતિનિધિઓના એક પ્રતિનિધિમંડળે ભારતનો પ્રવાસ કર્યો હતો અને ટેક્સ અને ટૈરિફ જેવા દ્વિપક્ષીય વ્યાપાર મુદ્દાઓ પર ભારત સાથે વાતચીત કરી હતી. 

હાલ ભારત અને અમેરિકાનો વ્યાપાર સતત વધી રહ્યો છે. અમેરિકામાં ભારતના રાજદૂત હર્ષવર્ધન શ્રૃંગલાએ આ પહેલા કોલોરાડોમાં કહ્યું હતું કે 2018માં બંને દેશોની વચ્ચે વ્યાપાર વધીને 142 અરબ ડોલર થયો છે. જે 2025 સુધીમાં 238 અરબ ડોલર સુધી પહોંચવાની આશા છે.