દુનિયાભરમાં કોરોના વાઇરસથી અત્યાર સુધીમાં ૧,૩૨,૩૫,૭૫૧ લોકો સંક્રમિત થઇ ચૂક્યા છે, તેમાંથી ૭૬,૯૬,૩૮૧ રિકવર પણ થયા છે. કુલ ૫,૭૫,૫૨૫ લોકો કોરોનાના કારણે મૃત્યુ પણ પામ્યા છે.
દુનિયાભરમાં અત્યાર સુધીમાં ૫.૭૫ લાખ લોકોના જીવ ગયા
૭૬.૯૬ લાખ લોકો સાજા થયા
આ બધાની વચ્ચે અમેરિકન પ્રમુખ ડોનાલ્ડ ટ્રમ્પે જણાવ્યું છે કે અમેરિકા પાસે દુનિયાનો સૌથી મોટો ટેસ્ટિંગ પ્રોગ્રામ છે. તે ભારત, રશિયા અને બ્રાઝિલ જેવા દેશોથી શ્રેષ્ઠ છે. અહીં મૃત્યુદર અન્ય દેશો કરતાં ઘણો ઓછો છે. સંક્રમણના વધતા કેસને જોતાં અમેરિકાના સૌથી વધુ વસ્તીવાળાં રાજ્ય કેલિફોર્નિયામાં રેસ્ટોરાં, બાર, થિયેટર ફરી વખત બંધ કરવામાં આવ્યાં છે.
અમેરિકામાં ગરમીના અંતમાં વેક્સિનનું પ્રોડક્શન શરૂ થશે
આ વર્ષે ઓગસ્ટની શરૂઆત સુધીમાં અમેરિકા વેક્સિનનુ પ્રોડક્શન શરૂ કરી શકે છે. અમેરિકી પ્રશાસને મેમાં સ્વાસ્થ્ય અને રક્ષા વિભાગ સાથે મળીને વેક્સિનના પ્રોડક્શનનુ કામ શરૂ કર્યું હતું. તેમનો ઉદ્દેશ જાન્યુઆરી-૨૦૨૧ સુધી કોરોનાના ૩૦ કરોડ ડોઝ તૈયાર કરવાનો છે.
બ્રિટનમાં જાહેર જગ્યાએ માસ્ક પહેરવું જરૂરી
બ્રિટનમાં ૨૪ જુલાઇથી દુકાનમાં જતાં પહેલાં ચહેરો ઢાંકવો ફરજિયાત કરાયો છે. ૧૫ જૂનથી પબ્લિક ટ્રાન્સપોર્ટમાં માસ્ક ફરજિયાત કરી દેવાયું છે. ડાઉનિંગ સ્ટ્રીટના પ્રવક્તાએ જણાવ્યું કે એ વાતના પુરાવા મળ્યા છે કે ચહેરો ઢાંકવો આસપાસના લોકોને કોરોના મહામારીથી બચાવવામાં ઘણી મદદ કરે છે. યુકેના વડા પ્રધાન બોરિસ જોનસને પણ સ્પષ્ટ કર્યું છે કે લોકોએ દુકાનમાં ચહેરો ઢાંકવો જોઇએ અને આપણે ૨૪ જુલાઇથી તે ફરજિયાત કરી દઇશું.
ચીલીમાં ૩.૧૭ લાખ લોકો કોરોનાથી સંક્રમિત
ચીલીમાં છેલ્લા ૨૪ કલાકમાં ૨,૬૧૬ નવા કેસ સામે આવ્યા છે. આ સાથે સંક્રમિતોની સંખ્યા વધીને ૩,૧૭,૬૫૭ થઇ ચૂકી છે. મૃતકોની સંખ્યા ૭,૦૨૪ થઇ ચૂકી છે. આરોગ્ય મંત્રાલયના જણાવ્યા મુજબ અત્યારે દેશમાં ૧,૯૩૧ દર્દીઓનો ઇલાજ ચાલી રહ્યો છે. અહીં ૨૪ કલાકમાં ૧૭,૪૬૭ લોકોની તપાસ થઇ છે. અત્યાર સુધીમાં ૧૩,૧૦,૨૬૫ લોકોનો કોરોના ટેસ્ટ થયો છે.