ઈમાનદારીથી મહાન કોઈ ગુણ નથી. જ્યારે કોરોના વાયરસથી સમગ્ર વિશ્વની સ્થિતિ કથળી છે, ત્યારે ઈમાનદારી ટકાવી રાખવી એક હિંમતનું કામ છે. એક અમેરિકન પરિવારને રસ્તાની બાજુમાં કચરાના ઢગલામાં કરોડો રૂપિયાની રકમ મળી આવી. પરંતુ તેમણે તેને પોતાની પાસે રાખવાને બદલે પોલીસને સોંપી દીધા. હવે તેમની આ પ્રામાણિકતાની ચર્ચા આખા દેશમાં થઈ રહી છે.
બન્યું એવું કે વર્જિનિયાના ડેવિડ અને એમિલી શાંટ્ઝ બાળકો સાથે કેરોલીન કાઉન્ટીમાં તેમના ઘરેથી તેમના પીકઅપ ટ્રકમાં ક્યાંક જઈ રહ્યા હતા. રસ્તામાં થોડે દૂર ગયા પછી તેમણે રસ્તાની બાજુની કચરાપેટીમાં બે બેગ જોયા. ડેવિડે કાર રોકી અને બેગ ઉપાડી. તેના પર સરકારી સ્ટેમ્પ લગાવેલી હતી. જે USA સરકારના પોસ્ટ વિભાગના હતા. ડેવિડે બેગ ઉપાડીને ગાડીમાં મૂકી દીધી.
બેગ ખોલીને જોયું તો અંદરથી નીકળી જંગી રકમ
જ્યારે ડેવિડ ફરીને તેમના ઘરે પહોંચ્યા ત્યારે તેમણે બેગ ખોલીને જોઇ. તેની અંદર એક મિલિયન ડોલર એટલે કે લગભગ 7.50 કરોડ રૂપિયા પ્લાસ્ટિકની થેલીમાં રાખ્યાં હતાં. પ્લાસ્ટિકની થેલીઓ ઉપર કેશ વોલ્ટ એમ લખેલું હતું. ત્યારબાદ તેમણે આ વિશે કેરોલિન કાઉન્ટી પોલીસને જાણ કરી. થોડા જ સમયમાં પોલીસની ટીમ તેના ઘરે પહોંચી ગઈ. કેરોલિન શેરીફ મેજર સ્કોટ મોસેરે જણાવ્યું કે અમે શોધી રહ્યા છીએ કે આ પૈસા આખરે રસ્તા પર કેવી રીતે આવી ગયા.
પરિવારની પ્રમાણિકતા કોરોના યુગમાં દ્રષ્ટાંત સમાન
મોઝરે કહ્યું કે ડેવિડ અને એમિલીની પ્રામાણિકતા એ કોરોનાના આ યુગમાં લોકો માટે એક ઉદાહરણ સમાન છે. તેઓએ કોઈકના પૈસા બચાવ્યા છે. વળી, તેમણે કોઈ વ્યક્તિને નાણાંની તંગીને લીધે મુસીબતમાં જવાથી રોકી દીધા છે. મેજર સ્કોટ મોઝરે જણાવ્યું કે આ બેગ USA ડિપાર્ટમેન્ટ ઓફ પોસ્ટ્સની છે. તેમની અંદર લગભગ 1 મિલિયન ડોલર ભરેલી પ્લાસ્ટિકની થેલીઓ હતી. આ પૈસા બેંકમાં જમા થવા જઇ રહ્યા હતા.