ક્રૂડ ઓઈલની કિંમતમાં વધારો બેરલનો ભાવ 70 ડોલર પહોંચ્યો

ક્રૂડ ઓઇલની કિંમતમાં છેલ્લા ઘણાં સમયથી સતત વધારો થતો જોવા મળી રહ્યો છે. ક્રૂડ ઓઇલનો ભાવ 70 ડોલર પ્રતિ બેરલની પર પહોંચી ગયો છે. નવેમ્બર 2014 પછી પહેલી વખત તેલની કિંમતોમાં આટલો મોટો ઉછાળો આવ્યો છે.

ઉલ્લેખનીય છે કે અમેરિકાના રાષ્ટ્રપતિ ટ્રમ્પનું 2015 ઈરાન પરમાણુ કરારથી અલગ થવાની સંભાવનાઓને કારણે તેહરાનને વધુ પ્રમાણમાં ક્રૂડ ઓઇલનું નિકાસ કરવાની પરવાનગી મળી. જેના કારણે ભાવમાં વધારો થઈ રહ્યો છે.

આ તરફ મજબૂત વૈશ્વિક માગ અને OPEC અને રશિયા દ્વારા તેલના જથ્થામાં ઘટાડાના કારણે કિંમતોમાં વધારો થઈ રહ્યો છે. અમેરિકન ઓઇલ કંપનીઓએ આ વર્ષની શરૂઆતમાં 16 ટકાથી વધુનો વધારો કર્યો છે. 

આપને જણાવી દઇએ કે ક્રૂડ ઓઇલના ભાવમાં વધારો થવાની સીધી અસર સામાન્ય માનવીની જીવન જરૂરિયાતોની ચીજ વસ્તુઓ પર જોવા મળી શકે છે. જેના કારણે સામાન્ય વ્યકિતના અર્થતંત્ર પર તેની અસર ટૂંક સમયમાં જોવા મળી શકે છે. જો કે હાલમાં દેશમાં પેટ્રોલ અને ડીઝલના ભાવોમાં ધરખમ વધારો થઈ રહ્યો છે. જે જોતાં સરકારે તેના પર કાબુ મેળવવા માટે તાત્કાલિક પગલાં લેવાની શરૂઆત કરી છે.