NATO Plus News: અમેરિકાએ ચીની ડ્રેગનને ડામવા માટે 'નાટો પ્લસ' બનાવ્યું, જો ભારત આ શક્તિશાળી સૈન્ય સંગઠનનો હિસ્સો બને છે તો તે વિશ્વના આ 5 દેશો સાથે સરળતાથી ગુપ્ત માહિતી શેર કરી શકશે
:
અમેરિકાની સંસદે ચીન સામે ટક્કર લેવા ભારતને ખાસ ઑફર
અમેરિકાએ ચીની ડ્રેગનને ડામવા માટે 'નાટો પ્લસ' બનાવ્યું
અમેરિકા ઇચ્છે છે કે, ભારત નાટો પ્લસ દેશોનો હિસ્સો બને
આવું થાય તો ભારત 5 દેશો સાથે સરળતાથી ગુપ્ત માહિતી શેર કરી શકશે
અમેરિકાની સંસદે ચીન સામે ટક્કર લેવા ભારતને ખાસ ઑફર આપી હોવાનું સામે આવ્યું છે. વાત જાણે એમ છે કે, રશિયા પર જોરદાર પ્રહાર કર્યા બાદ હવે અમેરિકાની આગેવાની હેઠળના યુરોપિયન સૈન્ય સંગઠન નાટોએ ચીન પર કડક કાર્યવાહી શરૂ કરી છે. ચીન અને રશિયાના ખતરાનો સામનો કરી રહેલા એશિયામાં નાટો દેશો જાપાનની અંદર પોતાની ઓફિસ ખોલવા જઈ રહ્યા છે. આટલું જ નહીં અમેરિકાએ ચીની ડ્રેગનને ડામવા માટે 'નાટો પ્લસ' બનાવ્યું છે.
અમેરિકા શું ઈચ્છે છે ?
આ તરફ અમેરિકાએ ચીની ડ્રેગનને ડામવા માટે 'નાટો પ્લસ' બનાવ્યા બાદ હવે અમેરિકા ઇચ્છે છે કે, ભારત નાટો પ્લસ દેશોનો હિસ્સો બને. ચીન પર અમેરિકી સંસદની શક્તિશાળી સમિતિએ ભલામણ કરી છે કે, ભારતને પણ નાટો પ્લસનો ભાગ બનાવવો જોઈએ. યુએસ કોંગ્રેસ દ્વારા આ પ્રસ્તાવ એવા સમયે આપવામાં આવ્યો છે, જ્યારે વડાપ્રધાન નરેન્દ્ર મોદી અમેરિકાના પ્રવાસે જવાના છે.
નાટો પ્લસમાં હાલમાં પાંચ સભ્ય દેશો
અમેરિકાએ ચીની ડ્રેગનને ડામવા માટે 'નાટો પ્લસ' બનાવ્યા બાદ હાલ નાટો પ્લસમાં ઓસ્ટ્રેલિયા, ન્યુઝીલેન્ડ, જાપાન, ઇઝરાયેલ અને દક્ષિણ કોરિયાનો સમાવેશ થાય છે. નાટો દેશો સાથે મળીને આ 5 સભ્ય દેશો વિશ્વમાં સુરક્ષા સહયોગ કરી રહ્યા છે. જો ભારત આ શક્તિશાળી સૈન્ય સંગઠનનો હિસ્સો બને છે તો તે વિશ્વના આ 5 દેશો સાથે સરળતાથી ગુપ્ત માહિતી શેર કરી શકશે. PM મોદીના અમેરિકા પ્રવાસ પહેલા અમેરિકા તરફથી આ એક મોટો પ્રસ્તાવ માનવામાં આવે છે. નાટો પ્લસના સભ્ય બનવાથી ભારતને કોઈપણ વિલંબ વિના અત્યાધુનિક સૈન્ય તકનીકની ઍક્સેસ મળશે.
તો શું આ કારણે અમેરિકા ભારતનું સમર્થન ઈચ્છે છે ?
યુએસ અને ચાઈનીઝ કમ્યુનિસ્ટ પાર્ટી વચ્ચે વ્યૂહાત્મક સ્પર્ધા અંગેની હાઉસ સિલેક્ટ કમિટીએ ભારતના સમાવેશ સાથે નાટો પ્લસને મજબૂત કરવા સહિત તાઈવાનની ડિટરન્સ ક્ષમતાને વધારવા માટે એક નીતિ ઠરાવ પસાર કર્યો છે. સમિતિના અધ્યક્ષ માઈક ગલાઘર અને રેન્કિંગ સભ્ય રાજા કૃષ્ણમૂર્તિ છે. પસંદગી સમિતિએ જણાવ્યું હતું કે, ચાઇના કમ્યુનિસ્ટ પાર્ટી સાથે વ્યૂહાત્મક સ્પર્ધા જીતવા અને તાઇવાનની સુરક્ષા સુનિશ્ચિત કરવા માટે, યુનાઇટેડ સ્ટેટ્સે ભારત સહિત અમારા સહયોગીઓ અને સુરક્ષા ભાગીદારો સાથે સંબંધો મજબૂત કરવાની જરૂર છે.
શું કહ્યું યુએસ સમિતિએ ?
આ તરફ યુએસ સમિતિએ કહ્યું, નાટો પ્લસમાં ભારતનો સમાવેશ ભારત-પ્રશાંત ક્ષેત્રમાં CCP આક્રમણનો સામનો કરવા અને વૈશ્વિક સુરક્ષાને મજબૂત કરવા માટે યુએસ અને ભારતની ગાઢ ભાગીદારીને વધારશે. છેલ્લા છ વર્ષથી આ પ્રસ્તાવ પર કામ કરી રહેલા ભારતીય-અમેરિકન રમેશ કપૂરે કહ્યું કે, આ એક મહત્વપૂર્ણ વિકાસ છે. તેમણે આશા વ્યક્ત કરી હતી કે, આ ભલામણને નેશનલ ડિફેન્સ ઓથોરાઈઝેશન એક્ટ 2024માં સ્થાન મળશે અને આખરે કાયદો બની જશે.
ચીન સામે અમેરિકાની શું યોજના ?
અમેરિકન કમિટિનું માનવું છે કે, જો ચીન તાઈવાન પર હુમલો કરશે તો તેની સામે કડક આર્થિક પ્રતિબંધો લાદવામાં આવશે. આ પ્રતિબંધોને લાગુ કરવામાં G7, NATO, NATO Plus અને Quad દેશોની ભૂમિકા મહત્વની રહેશે. જાહેરમાં સંદેશો પહોંચાડવા માટે આ તમામ સંસ્થાઓ એકસાથે આવશે તેની અસર થશે. સમિતિએ નોંધ્યું હતું કે, અમે યુદ્ધના સમયમાં સંયુક્ત આકસ્મિક આયોજન કરીએ છીએ તેવી જ રીતે શાંતિના સમયમાં અમેરિકી સહયોગીઓ સાથે સંકલન કરવાની જરૂર છે. ભારત અત્યાર સુધી નાટોમાં જોડાવાની કોઈપણ પહેલથી દૂર રહ્યું છે. ચીનના વધી રહેલા ખતરા વચ્ચે PM મોદીના આગામી પગલા પર નાટો દેશોની નજર રહેશે.