ડોનાલ્ડ ટ્રમ્પને ચૂંટણી પહેલા અમેરિકન કોર્ટ દ્વારા એક ઝટકો આપવામાં આવ્યો છે. તેમણે કોરોનામાં અમેરિકામાં આવેલી બેરોજગારીને પહોંચી વળવા માટે એચ 1 બીવિઝા પર પ્રતિબંધ લગાવવાનો નિર્ણય કર્યો હતો. પણ અમેરિકાની કોર્ટે એચ-1 બી વિઝા પરના પ્રતિબંધના નિર્ણય પર રોક લગાવી છે. તેમજ કહ્યું કે રાષ્ટ્રપતિએ બંધારણીય અધિકારોનું ઉલ્લંઘન કર્યું
કેલિફોર્નિયાની કોર્ટે વિઝા પ્રતિબંધ પર તાત્કાલિક રોક લગાવી
એચ-1 બી વિઝાધારકોમાં ભારતીયોની સંખ્યા લગભગ 70 ટકા
અમેરિકા દર વર્ષે 85 હજાર એચ-1 બી વિઝા જાહેર કરે છે
અમેરિકાના રાષ્ટ્રપતિ ડોનાલ્ડ ટ્રમ્પને ચૂંટણી-અભિયાન દરમિયાન ઝાટકા પર ઝાટકા લાગી રહ્યા છે. હવે કેલિફોર્નિયાના ડિસ્ટ્રિક્ટ જજ જેફ્રી વ્હાઈટે એચ-1 બી વિઝા પર લગાવેલા પ્રતિબંધ પર રોક લગાવી દીધી છે. કોર્ટે આકરી ટિપ્પણી કરતાં કહ્યું હતું કે રાષ્ટ્રપતિએ પોતાના બંધારણીય અધિકારોનું ઉલ્લંઘન કર્યું છે.
વેપારી સંગઠનોએ દાખલ કરી હતી અરજી
એચ-1 બી વિઝા પર લગાડવામાં આવેલા પ્રતિબંધને હટાવવા માટે વેપારી સંગઠનોએ ડિપાર્ટમેન્ટ ઓફ કોમર્સ અને ડિપાર્ટમેન્ટ ઓફ હોમલેન્ડ સિક્યોરિટી વિરૂદ્ધ અરજી દાખલ કરી હતી. આ અરજી કંપનીઓએ રાષ્ટ્રીય સંગઠન નેશનલ એસોસિયેશન ઓફ મેન્યુફેક્ચરર્સ, યુએસ ચેમ્બર ઓફ કોમર્સ, નેશનલ રિટેલ ફેડરેશન અને ટેકનેટ દ્વારા દાખલ કરાઈ હતી. નેશનલ એસોસિયેશન ઓફ મેન્યુફેક્ચરર્સે કહ્યું હતું કે કોર્ટના નિર્ણય બાદ વિઝા પ્રતિબંધ પર તાત્કાલિક રોક લગાવવામાં આવી છે.
જૂનમાં પ્રતિબંધ લગાડવામાં આવ્યો હતો
આ વર્ષે જૂનમાં ટ્રમ્પસરકારે એચ-1 બી વિઝા સહિત અન્ય વિદેશી વિઝા પર હંગામી પ્રતિબંધ લગાવ્યો હતો. આ રોકની અસર એચ-2બી, જે અને એલ વિઝા પર પણ પડી હતી. આ રોક આ વર્ષના અંત સુધી લગાડવામાં આવી હતી. ટ્રમ્પે કહ્યું હતું કે આ પગલાથી અમેરિકાવાસીઓને રોજગારીની વધુ તક મળશે. અમેરિકાના રાષ્ટ્રપતિએ કહ્યું હતું કે ફેબ્રુઆરીથી મે માસ વચ્ચે અમેરિકામાં બેરોજગારી ચાર ગણી સુધી વધી ગઈ છે અને તેથી જ તેમને કડક પગલાં ઉઠાવવા પડી રહ્યા છે.
એચ-1 બી વિઝા શું છે?
એચ-1 બી વિઝા નોન-એગ્રીમેન્ટ કે ગેરપ્રવાસી વિઝા છે. અમેરિકાની કંપનીઓ અન્ય દેશના ટેક્નિકલ એક્સપર્ટ્સને હાયર કરે છે, જે બાદ આ કંપનીઓ સરકાર સમક્ષ હાયર કરવામાં આવેલા એમ્પ્લોયીઝ માટે એચ-1બી વિઝાની માગ કરે છે. મોટા ભાગના કર્મચારી ભારત કે ચીનના હોય છે. જો કોઈ એચ-1 બી વિઝાધારકની કંપનીએ તેની સાથેનો કોન્ટ્રેક્ટ સમાપ્ત કરી લીધો છે, તો વિઝા સ્ટેટસ યથાવત્ રાખવા માટે તેને 60 દિવસોમાં નવી કંપનીમાં જોબ મેળવવી જરૂરી છે. યુએસ સિટિઝનશિપ એન્ડ ઈમિગ્રેશન સર્વિસીઝ (યુએસસીઆઈએસ) મુજબ એચ-1 બી વિઝાથી સૌથી વધુ ફાયદો ભારતીય નાગરિકોને જ થાય છે.
વિઝાના પ્રકાર અને કોને મળે છે
એચ-1 બીઃ અમેરિકામાં કામ કરનાર વિદેશી કામદારોને.
એલ-1: તે વિદેશીઓને જેમની ટ્રાન્સફર અમેરિકાસ્થિત કંપનીઓમાં થાય છે.
એચ-4: એચ-1 બી વિઝાધારકોની સાથે રહેતા તેમના પતિ કે પત્નીઓને.
જે-1: સાંસ્કૃતિક, શિક્ષાના એક્સચેન્જ પ્રોગ્રામના ઈમિગ્રેશન માટે.
એચ-2: નોન-એગ્રિકલ્ચર ઈન્ડસ્ટ્રીમાં કામ પર આવતા કામદારોને.
મોટી કંપનીઓએ પણ ટ્રમ્પ પ્રશાસનના નિર્ણયનો વિરોધ કર્યો હતો
એચ-1 બી વિઝા પર અમેરિકાની સરકારના નિર્ણય પર ગૂગલના સીઇઓ સુંદર પિચાઈએ નિરાશા વ્યક્ત કરી હતી. તેમણે કહ્યું હતું કે પ્રવાસીઓએ અમેરિકાને આર્થિક રીતે મજબૂત બનાવવામાં મદદ કરી છે, દેશને ટેક્નિકલ દૃષ્ટિએ અવ્વલ બનાવ્યું છે. આ લોકોના કારણે જ ગૂગલ આ જગ્યાએ પહોંચ્યું છે. અમે આ લોકોનું સમર્થન કરતા રહીશું. ટેસ્લાના સીઇઓ એલન મસ્ક અને માઈક્રોસોફ્ટના પ્રેસિડેન્ટ બ્રેડ સ્મિથે પણ આ નિર્ણયનો વિરોધ કર્યો હતો. મસ્કે કહ્યું હતું કે આ દેશને વર્લ્ડ ટેલન્ટથી અલગ કરવાનો સમય નથી. પ્રવાસીઓએ અમારી મદદ એ સમયે કરી હતી જ્યારે અમને તેમની મદદની જરૂર હતી.
એચ-1 બી વિઝામાં ભારતીયોની 70 ટકાથી વધુની ભાગીદારી
હાલની લોટરી સિસ્ટમની મદદથી વર્ષે 85 હજાર નવા એચ-1 બી વિઝા જાહેર કરવામાં આવે છે. વિદેશમંત્રી ડૉ. એસ જયશંકરે સંસદમાં જણાવ્યું હતું કે છેલ્લાં 5 વર્ષમાં જાહેર કરવામાં આવેલા એચ-1 બી વિઝા 70 ટકાથી વધુ ભારતીયોને મળ્યા છે. 2015માં ભારતીય-અમેરિકી ગ્રુપના લોકોના આંકડાએ 10 લાખનો ફિગર ક્રોસ કર્યો હતો. આ લોકોથી ભારતને મોટા પ્રમાણમાં રેમિન્ટસનો ફાયદો મળ્યો છે. અમેરિકાના રાજકીય સ્તરથી લઈને વ્હાઈટ હાઉસની ટીમમાં પણ આજે અનેક ભારતીય-અમેરિકી છે.
ટિકટોક અને વિચેટ પર મુકાયેલા પ્રતિબંધ પર પણ લાગી છે રોક
ટ્રમ્પસરકારને કોર્ટ દ્વારા સતત ઝટકા મળી રહ્યા છે. આ પહેલાં કોલંબિયાની ડિસ્ટ્રિક્ટ કોર્ટના જજ કાર્લ નિકોલસ ટિકટોકને ગૂગલ અને એપલના એપ સ્ટોરથી હટાવવાના નિર્ણય પર રોક લગાવી ચૂક્યા છે. તો. સાન ફ્રાંસિસ્કોની કોર્ટના જજ લોરેલ બિલર ચીનની મેસેજિંગ એપ વિચેટ પર પ્રતિબંધના નિર્ણયને અસ્થાયી રીતે રોક લગાવી ચૂક્યા છે.