કેન્દ્ર સરકારના નવા કૃષિ કાયદાના વિરોધ વચ્ચે હવે વિશ્વભરના અનેક લોકો પ્રતિક્રિયા આપી રહ્યા છે ત્યારે અમેરિકાનું નિવેદન પણ સામે આવ્યું છે.
કૃષિ કાયદા પર સરકારને મળ્યો અમેરિકાનો સાથ
અમેરિકા શાંતિપૂર્ણ આંદોલનનું સમર્થન કર્યું
ઈન્ટરનેટને લઈને પણ આપ્યું મોટું નિવેદન
કૃષિ કાયદાનું અમેરિકાએ કર્યું સ્વાગત
અમેરિકાએ ભારતના નવા કૃષિ કાયદાનું સમર્થન કર્યું છે. અમેરિકાએ કહ્યું છે કે તે આવા પગળાઓનું સ્વાગત કરે છે અને આ પગલાં પ્રાઇવેટ સેક્ટરને આકર્ષિત કરશે. ભારતમાં ચાલી રહેલા આંદોલન પર વિદેશ મંત્રાલયના એક પ્રવક્તાએ કહ્યું કે અમેરિકા માને છે કે શાંતિપૂર્ણ વિરોધ કોઈ પણ લોકતંત્રની ઓળખ છે. મતભેદો હોય તો વાતચીતના માધ્યમથી તેનું સમાધાન આવી શકે છે.
ઈન્ટરનેટને ગણાવ્યો મૂળભૂત અધિકાર
સમાચાર એજન્સી ANI અનુસાર ડીપાર્ટમેન્ટના પ્રવક્તાએ કહ્યું કે અમેરિકા શાંતિપૂર્ણ વિરોધને લોકતંત્રની ઓળખ માને છે. ભારતીય સર્વોચ્ચ અદાલતે પણ શાંતિપૂર્ણ આંદોલનનું સમર્થન કર્યું છે. અમેરિકા આવા પગલાંઑનું સ્વાગત કરે છે જે ભારતીય બજારોમાં સુધારા લાવશે અને પ્રાઇવેટ સેક્ટરમાં રોકાણને આકર્ષિત કરશે. તેમણે કહ્યું કે લોકો સુધી કોઈ પણ રૂકાવટ વગર ઈન્ટરનેટ સહિતની સુવિધાઓ પહોંચવીએ અભિવ્યક્તિની આઝાદીનો મૂળભૂત અધિકાર છે. આ એક સફળ લોકતંત્રનું પ્રમાણ છે.
વિદેશી લોકો દ્વારા કોઈ પણ ટિપ્પણીનો વિરોધ
નોંધનીય છે કે છેલ્લા ઘણા સમયથી કાયદાના વિરોધમાં દિલ્હી અને આસપાસની બોર્ડર ખેડૂતો આંદોલન કરી રહ્યા છે અને હવે આ મુદ્દા પર વિશ્વના ઘણા લોકોએ પ્રતિક્રિયા આપવાની શરૂઆત કરી દીધી છે. ભારતના નામાંકિત કલાકારો અને ખેલ જગતની હસ્તીઓએ આ લોકોને ટ્વિટર પર જડબાતોડ જવાબ આપ્યો છે અને ભારતના આંતરિક મુદ્દાનું ભારત સામાધાન લાવશે તેમ કહી રહ્યા છે.
ભારત સરકારે પણ રિહાના જેવા કલાકારો દ્વારા આપવામાં આવેલ નિવેદન પર કડક પ્રતિક્રિયા આપી છે. બોલિવૂડના ઘણા બધા કલાકારો, ક્રિકેટરો અને કેન્દ્રીય મંત્રીઓએ સરકારના વલણનું સમર્થન કર્યું. અને ટ્વિટર પર ઈન્ડિયા અગેનસ્ટ પ્રોપેગેન્ડા તથા ઈન્ડિયા ટૂગેધર જેવા હેશટેગ ટ્રેન્ડ થયા.