અમેરિકાએ અફઘાનિસ્તાન હવે કાયમ માટે છોડી દીધું છે પરંતુ જતાં જતાં અમેરિકન સૈનિકો તાલિબાનોને એક મોટો ઝટકો આપતા ગયા છે.
તાલિબાનની ડેડલાઇન પૂરી થવાના 24 કલાક પહેલા જ અમેરીકી સૈનિકોએ અફઘાનિસ્તાનની ધરતી છોડી દીધી હતી. 31 ઓગસ્ટ એટલે કે આજે તાલિબાનોની ડેડલાઇન હતી. પરંતુ અડધી રાત્રે જ અમેરિકાએ પોતાના સૈનિકોને અફઘાનિસ્તાનથી પરત બોલાવવાનો ફેંસલો કર્યો હતો. અફઘાનિસ્તાનને તેના ભરોસે છોડીને હવે અમેરિકાએ ઉચાળા ભરી લીધા છે. પણ હવે અફઘાનિસ્તાનમાં જે હાલત છે તેને લઈને દુનિયાભરમાં ચિંતાનો માહોલ છે.
73 જેટલા વિમાનો બેકાર
અમેરિકી સેનાની વાપસી થઈ ગઈ હતી પરંતુ વાપસી પહેલા અમેરિકી સેનાએ તેના કેટલાક વિમાનોને કે જે અફઘાનિસ્તાનમાં તૈનાત હતા તેને નકામા કરી મૂક્યા હતા. હામીદ કરજાઈ ઇન્ટરનેશનલ એરપોર્ટ પર આવા 73 જેટલા વિમાનોને બેકાર કરી દેવામાં આવ્યા છે. હવે આ વિમાનો કડી ઊડી નહીં શકે.
રોકેટ ડિફેન્સ સિસ્ટમ પણ નષ્ટ
આ સિવાય અફઘાનિસ્તાનમાં રહેલી રોકેટ ડિફેન્સ સિસ્ટમનો પણ અમેરિકાએ ખુરદો બોલાવી દીધો હતો. હવે તેમનો ઉપયોગ નહીં થઈ શકે અને આ સિવાય એવી ગાડીઓ કે જેમાં હથિયારો હતા તે પણ નષ્ટ કરી દેવામાં આવી હતી.
હથિયારો બીજા દેશોમાં પહોંચાડી શકે એમ નથી તાલિબાન
જાણકારોએ આપેલ માહિતી અનુસાર અમેરિકાએ અફઘાનિસ્તાનમાં જે હથિયાર છોડી દીધા છે તેને પણ મોટી સંખ્યામાં બેકાર કરી જ દીધા છે અને આ સિવાય એક્સપર્ટસનું કહેવું છે કે અમેરિકાએ અફઘાનિસ્તાનમાં જે હથિયારો તૈનાત કરેલા છે એ તમામ દેશની આંતરિક પરિસ્થિતિ સામે લડવા માટે ઉપયોગમાં લઈ શકાય તેવા જ હતા. મતલબ કે આ હથિયારો તાલિબાન ચાહીને પણ બીજા દેશોમાં પહોંચાડી શકે એમ નથી.
હેલિકોપ્ટરથી શખ્સને લટકાવ્યો હતો
અફઘાનિસ્તાનથી અમેરિકન સેનાની વાપસી બાદ તાલિબાનોએ કેવી આંતરિક આતંક મચાવેલો છે તેની એક તસવીર સામે આવી હતી. જેમાં તાલિબાનોએ એક લડાકુ બ્લેક હોક હેલિકોપ્ટર કંધારના આકાશમાં ઉડાવ્યું હતું. હેલિકોપ્ટરથી એક માણસ પણ લટકેલો દેખાય છે. હજુ સુધી જો કે તે સ્પષ્ટ થયું નહોંતુ કે જેને હેલિકોપ્ટર સાથે લટકાવાયો છે તે વ્યક્તિ કોણ છે.