ચીન અને અમેરિકાના સંબંધો અત્યારે વણસેલા છે.ચીનની કંપનીઓને લઇને અમેરિકામાં હંમેશા હોબાળો થતો રહે છે. ગયા વર્ષે ચીનની જાયન્ટ કંપની હુઆવે પર જાસૂસીનો આરોપ લગાવી અમેરિકાએ પ્રતિબંધ મૂક્યો હતો. હવે અમેરિકાએ તેની સેનાને દુનિયાભરમાં અત્યંત પોપ્યુલર ટિક ટોક એપના ઉપયોગ પર પ્રતિબંધ મુક્યો છે. આ માટે રાષ્ટ્રીય સુરક્ષાનું કારણ આપવામાં આવ્યું છે.
ચીન અને અમેરિકાના વણસેલા સંબંધો યથાવત
અમેરિકાએ સેનાના જવાનો માટે ટિક ટોક એપનાના ઉપયોગ પર મુક્યો પ્રતિબંધ
રિપોર્ટમાં થયો ચોંકાવનારો ખુલાસો
રિપોર્ટ અનુસાર ટિકટોક એપથી સાયબર એટેક થવાનું જોખમ છે અને તેના દ્વારા દેશના લોકો અને સેનાની જાસૂસી કરી શકાય છે.પ્રતિબંધ અંગે યુએસ આર્મીના પ્રવક્તા લેફ્ટનન્ટ કર્નલ રોબિન ઓચોઆએ જણાવ્યું હતું કે શરૂઆતમાં પ્રતિબંધ નેવી અને સંરક્ષણ વિભાગ બંને પર લાદવામાં આવ્યો છે.
નેવીએ કર્મચારીઓને ટિક ટોક એપનો ઉપયોગ ન કરવા આપી સૂચના
નેવીએ થોડા દિવસો પહેલા કહ્યું હતું કે સૈન્ય કર્મચારીઓએ ટિક ટોક એપનો ઉપયોગ ન કરવો જોઇએ. નેવી દ્વારા જારી કરાયેલા આદેશમાં જણાવ્યું છે કે કોઈપણ એપ ડાઉનલોડ કરતા પહેલા તેની વિગતો કાળજીપૂર્વક વાંચો અને સાવચેત રહો. અમેરિકાના સંરક્ષણ વિભાગે પણ તેના આદેશમાં કહ્યું છે કે સૈન્ય કર્મચારીઓ તેમના ફોન અથવા ટેબ્લેટમાંથી તરત જ ટિકટોક એપ અનઇન્સ્ટોલ કરે.
ટિક ટોક પર અશ્લીલતા અને ડેટા એકત્રિત કરવાનો મુકાયો આરોપ
ઉલ્લેખનીય છે કે ગયા વર્ષે ઓક્ટોબરમાં ટિકટોકના પ્રતિનિધિઓને અમેરિકાની વિદેશી રોકાણોની સમિતિ (સીએફઆઈયુએસ) દ્વારા તપાસ માટે બોલાવવામાં આવ્યા હતા. ટિક ટોક પર અશ્લીલતા અને ડેટા એકત્રિત કરવાનો આરોપ અવારનવાર મૂકવામાં આવે છે ગયા વર્ષે એપ્રિલમાં તમિળનાડુની અદાલતે સરકારને ટિક ટોક પર પ્રતિબંધ મૂકવા કહ્યું હતું.
જો કે આ પ્રતિબંધ થોડા દિવસ પછી હટાવવામાં આવ્યો હતો.અમેરિકામાં જ હમણા એક યુવતીએ ટિકટોક પર ગેરકાયદે રીતે ડેટા એકત્ર કરીને તેને ચીનના સર્વરમાં મોકલવામાં આવે છે તેવા આક્ષોપો સાથે કોર્ટમાં કેસ કર્યો છે.