ડીલ / પાક. PM ઇમરાનના US પ્રવાસ બાદ ટ્રમ્પનો મોટો નિર્ણય, પાકિસ્તાનને આપશે F-16 વિમાન

F-16 એ ફાઇટર વિમાન છે જેની મદદથી પાકિસ્તાને આ વર્ષે બાલાકોટ સ્ટ્રાઇક બાદ ભારત પર હુમલાની કોશિશ કરી હતી અને ભારતીય વાયુસેનાએ તેમના પ્રયાસ નિષ્ફળ બનાવી દીધા હતા. અમેરિકાનો દાવો છે કે આ ડીલ બાદ USને પાકિસ્તાન દ્વારા F-16 લડાકૂ વિમાનના ઉપયોગ પર 24 કલાક ધ્યાન રાખવાની સુવિધા મળી જશે. પાકિસ્તાન સાથે આ ડીલ પર અમેરિકાનો દાવો બે માપદંડ રજૂ કરે છે. એક તરફ અમેરિકા પાકિસ્તાનને F-16 વિમાન વેચી રહ્યું છે, જ્યારે બીજી તરફ એવું કહી રહ્યું છે કે અમેરિકા તરફથી પાકિસ્તાનને આપવામાં આવી રહેલી સુરક્ષા મદદ પર રોક ચાલુ રહેશે. 

અમેરિકા અનુસાર રાષ્ટ્રપ્રમુખ ટ્રમ્પના નિર્દેશ પર જાન્યુઆરી 2018થી પાકિસ્તાન પર આ પ્રતિબંધ ચાલુ રહેશે. આ નવી ડીલથી અમેરિકી એન્જિનિયર ચોવીસે કલાક F-16 જેટની ગતિવિધિઓની તપાસ કરી શકશે, કેમકે F-16 પ્રોગ્રામના સંચાલન માટે 60 પ્રતિનિધિઓને પાકિસ્તાનમાં રહેવાની જરૂર પડશે.  

અમેરિકાના સ્ટેટ ડિપાર્ટમેન્ટના એક પ્રવક્તાએ સમાચાર એજન્સી પીટીઆઇને કહ્યું કે, ''રાષ્ટ્રપ્રમુખ ટ્રમ્પ દ્વારા જાન્યુઆરી 2018માં જાહેર સુરક્ષા મદદ સસ્પેન્શનમાં કોઇ બદલાવ આવ્યો નથી. જેવું કે આ સપ્તાહે રાષ્ટ્રપ્રમુખ ટ્રમ્પે કહ્યું હતું કે અમે અમારા સંબંધોના વ્યાપક સ્વરૂપના અનુરુપ કેટલાક સુરક્ષા મદદરૂપ કાર્યક્રમ અંગે વિચાર કરી રહ્યા છીએ.''

અમેરિકાના વિદેશ વિભાગનું કહેવું છે કે, '' આ પ્રસ્તાવિત સૈન્ય વેચાણ અમારી વિદેશ નીતિ અને રાષ્ટ્રીય સુરક્ષાને મદદ કરશે. અમે અમેરિકી ટેકનિકની રક્ષા કરવામાં સક્ષમ બનીશું, કેમકે અમેરિકી અધિકારી સતત ત્યાં હાજર રહેશે અને 24x7 ધ્યાન આપી શકશે.'' પેન્ટાગને શુક્રવારે આ ડીલની જાણકારી આપી છે. 

એક નિવેદન મુજબ, પાકિસ્તાનને અમેરિકાને અપીલ કરી હતી કે તે F-16 ઓપરેશનના સંચાલન માટે ટેક્નિકલ સેવાઓ અને બીજી લોજિસ્ટિક સેવાઓ ચાલુ રાખશે. અમેરિકાના F-16 લડાકુ વિમાન વર્ષ 2019ની ફેબ્રુઆરીમાં ત્યારે ચર્ચામાં આવ્યા હતા જ્યારે ભારતે પોતાની સીમામાં ઘુસવા પર પાકિસ્તાનના F-16 વિમાનને તોડી પાડ્યું હતું.