નવી દિલ્હીઃ ચીન અને અમેરિકા વચ્ચે ટ્રેડ વોર (Trade War) વધુ ભડકી છે. ભારતમાં સરકારે બૂસ્ટર ડોઝની જાહેરાત કરી છે, પરંતુ ગ્લોબલ માર્કેટ માટે સારા સમાચાર નથી. અમેરિકાએ ચીનની વધુ પ્રોડક્ટ્સ પર ડ્યૂટી વધારવાની જાહેરાત કરી છે. અમેરિકાએ ચીનની ૨૫૦ અબજ ડોલરની પ્રોડક્ટ્સ પર ડ્યૂટી ૨૫ ટકાથી વધારીને ૩૦ ટકા કરી દીધી છે. આ સાથે જ ૩૦૦ અબજ ડોલરની પ્રોડક્ટ્સ પર ૧૦ ટકાથી વધારીને ૧૫ ટકા કરી છે.
આ વધારાયેલી ડ્યૂટી ૧ ઓક્ટોબરથી અમલી બનશે. ચીની (China) પ્રોડક્ટ પર ડ્યૂટી વધારવાના નિર્ણય બાદ અમેરિકાના (America) પ્રમુખ ડોનાલ્ડ ટ્રમ્પે ટ્વિટ કરીને આ નિર્ણયને યોગ્ય ગણાવ્યો હતો. ટ્રમ્પનાં જણાવ્યાં અનુસાર ચીનની ખોટી બિઝનેસ પોલિસીને બદલવા માટે આ પગલું ભરવામાં આવ્યું છે. ટ્રમ્પે જણાવ્યું હતું કે તેમને હવે માત્ર એ વાતનો અફસોસ છે કે તેમણે ચીનથી ઇમ્પોર્ટ થતી પ્રોડક્ટ્સ પર પહેલેથી જ ટેરિફને કેમ વધારે ન રાખ્યાં?
અગાઉની સરકારોએ અમેરિકન ટેક્સ પેયર્સના નાણાંથી ચીનને ફાયદો પહોંચાડ્યો છે, પરંતુ હું હવે આવું થવા દઇશ નહીં તેમ ડોનાલ્ડ ટ્રમ્પે જણાવ્યું હતું. આ અગાઉ ગઇ કાલે સવારે ચીને ૭૫ અબજ ડોલરની અમેરિકન પ્રોડક્ટ પર ડ્યૂટી લગાડવાની જાહેરાત કરી હતી. આ અગાઉ ફેડ રિઝર્વ ચેરમેન જીરોમ પોવેલે જેક્શન હોલમાં પોતાના ભાષણમાં બજારમાં જોશ ભરવાની કોશિશ કરી હતી.
જીરોમ પોવેલે જણાવ્યું હતું કે ઇકોનોમીમાં પ્રાણ ફૂંકવા અમે શક્ય તમામ પગલાં લઇશું. જીરોમ પોવેલનું આ નિવેદન પણ ટ્રમ્પને પસંદ પડ્યું નથી. ટ્રમ્પે ટ્વિટ કરીને પૂછયું હતું કે અમેરિકાનું સૌથી મોટું દુશ્મન કોણ છે? ચીનના રાષ્ટ્રપતિ શી જિનપિંગ કે જીરોમ પોલેવ? જિનપિંગને દુશ્મન કહેવામાં આવતા ટ્રેડ ટોક માટે અત્યંત ખરાબ માનવામાં આવી રહ્યું છે.