ઓનલાઇન ટેક્સી સર્વિસ Uber હવે પોતાના રાઇડર્સને 5 લાખ રૂપિયા સુધીનો વીમો આપી રહી છે, જે સમગ્ર રીતે ફ્રી છે. કંપનીએ જણાવ્યું કે તમારી રાઇડ શરૂ થશે એવા તમે 5 લાખ રૂપિયા સુધીના કવરેજના હકદાર થઇ જશો.
એપ બેઝ્ડ ટેક્સી સર્વિસ આપતી કંપની ઉબેરે પ્રવાસ દરમિયાન પોતાના યાત્રીઓને એક્સિડન્ટ ઇન્સ્યોરન્સ કવરેજ ઉપલબ્ધ કરાવવાની જાહેરાત કરી છે. ઉબેર કંપની હવે કાર, થ્રી વ્હિલર કે મોટરસાઇકલ દ્વારા પ્રવાસ કરનાર પોતાના પ્રવાસીઓને અકસ્માત વીમો ઉપલબ્ધ કરાવશે.
અકસ્માતમાં મૃત્યુ કે અપંગતા માટે ઉબેર પ્રવાસીઓને રૂ. પાંચ લાખ સુધીનો અકસ્માત વીમો ઉપલબ્ધ કરાવશે. હોસ્પિટલમાં દાખલ થવાની સ્થિતિમાં રૂ. બે લાખ અને ઓપીડી માટે રૂ. ૫૦ હજારનો વીમો ઉપલબ્ધ બનશે. ઉબેરની સેવાઓ ભારતના ૪૦ શહેરોમાં છે. ઉબેરે કાર પ્રવાસીઓને વીમા સુવિધા આપવા માટે ભારતી એક્સા સાથે કરાર કર્યો છે, જ્યારે ઓટો અને મોટરસાઇકલના પ્રવાસીઓને વીમા કવચ આપવા કંપનીએ ટાટા એઆઇજી સાથે કરાર કર્યો છે.
ઉબેરના ભારત અને દક્ષિણ એશિયાના સેન્ટ્રલ ટ્રાન્સપોર્ટ પ્રેસિડેન્ટ (રાઇટ્સ) પવન વૈશ્યએ જણાવ્યું હતું કે અમે પ્રવાસીઓ સાથે નિકટના સંબંધો રાખીએ છીએ. અમારો હેતુ તેમને સરળ અને સુરક્ષિત યાત્રાનો અનુભવ કરાવવાનો છે. અમે અમારા ડ્રાઇવર પાર્ટનર્સને પણ અગાઉથી વીમા સુવિધા કવચ ઉપલબ્ધ કરાવ્યું છે અને હવે અમે પ્રવાસીઓને પણ વીમા કવચ પૂરું પાડવા જઇ રહ્યા છે. તેનાથી પ્રવાસીઓનો ઉબેર પર ભરોસો વધશે.
ઉબેર રાઇડના કિસ્સામાં જો એક જ વિહિકલમાં એકથી વધુ સવારી હોય તો ઇન્સ્યોરન્સ કવર પ્રત્યેક પ્રવાસીને અલગ અલગ ઉપલબ્ધ કરાવવામાં આવશે. ઉબેરને એક્સિડન્ટનો રિપોર્ટ કરવા માટે રાઇડર પાસ્ડ ટ્રિપ્સ સેક્શનમાં જઇને 'આઇ વોઝ ઇન્વોલવ્ડ ઇન એન એક્સિડન્ટ' ઓપ્શન સિલેક્ટ કરી શકે છે. ત્યાર બાદ ઉબેરની સપોર્ટ ટીમ તેમના સુધી પહોંચશે અને ઇન્સ્યોરન્સ પાર્ટનર સાથે કો-ઓર્ડિનેટ કરશે, જેથી રાઇડરને વીમા ક્લેઇમ ઉપલબ્ધ કરાવી શકાય.