ભારતીય સેનાનો એક જવાન પાકિસ્તાન માટે જાસૂસીના આરોપમાં ઝડપાયો છે. ઉત્તરપ્રદેશની મેરઠ છાવણીમાં સેનાની નોકરી કરનારો જવાન પાકિસ્તાન માટે જાસૂસી કરવાના આરોપસર ઝડપાયો છે. પૂછપરછમાં તેની પાસેથી ઘણી માહિતી સામે આવી છે.
આ જવાન મેરઠ છાવણીમાં સિગ્નલ મેન તરીકે ફરજ બજાવતો હતો. તેના પર આરોપ છે કે તેણે પાકિસ્તાનની આઈએસઆઈને પશ્ચિમી બેઝ હેઠળ આવતી તમામ ડિવિઝન સાથે સંકળાયેલી જાણકારીઓ આપતો હતો. પહેલીવાર આવુ બન્યુ છે કે મેરઠ છાવણીમાંથી કોઈ જવાન જાસૂસીના આરોપમાં પકડાયો હોય.
ઉલ્લેખનીય છે કે આ આર્મીમેન ઉત્તરાખંડનો રહેવાસી છે અને છેલ્લા 10 મહિનાથી તે પાકિસ્તાનના લોકો સાથે સંપર્કમાં હતો. પાકિસ્તાનના નંબરો પર સતત વાતચીત કરતા જવાન પર શંકા ઉભી થઈ હતી.
બાદમાં તેની તપાસ કરતા મામલો ખુલ્લો પડ્યો. આરોપી જવાન એન્ડ ટુ એન્ડ ઈન્સ્ક્રીપ્શન દ્વારા માહિતી મોકલતો હતો. મોટાભાગની માહિતી તે વોટ્સએપ દ્વારા મોકલતો હતો. તો આ મામલા બાદ સેના દ્વારા અન્ય જવાનોની પણ પૂછપરછ હાથ ધરી છે.