ઉત્તરપ્રદેશમાં ચૂંટણીના પડઘમ વાગી રહ્યા છે. ભાજપ પૂરજોશમાં તૈયારીમાં છે અને હવે બધી સીટો માટે વહેંચણીની ફોર્મ્યુલા પણ નક્કી થઈ ગઈ છે.
ઉત્તર પ્રદેશમાં વિધાનસભાની ચૂંટણી
ભાજપ અને અન્ય પક્ષોએ કમર કસી
સાથી પક્ષો સાથે ભાજપે કરી સીટોની વહેંચણી
UP ELECTIONS 2022
ઉત્તર પ્રદેશમાં વિધાનસભાની ચૂંટણીને હવે એક મહિનાથી પણ ઓછો સમય બાકી છે. આવી સ્થિતિમાં ભાજપ અને તેના સહયોગી દળો વચ્ચે સીટ વહેંચણીની ફોર્મ્યુલા પણ નક્કી થઈ ગઈ છે. સૂત્રો પાસેથી મળેલી માહિતી મુજબ અપના દળને 14 અને નિષાદ પાર્ટીને 17 બેઠકો મળશે. બાકીની બેઠકો પર ભાજપ પોતાના ઉમેદવારો ઉભા રાખશે.
સાથી પક્ષોએ કેટલી સીટો માંગી હતી?
મોડી રાતની બેઠકમાં અપના દળે 25 અને નિષાદ પાર્ટી 30 બેઠકોની માંગ કરી રહી હતી. પરંતુ કેન્દ્રીય ગૃહમંત્રી અમિત શાહની હાજરીમાં હવે અપના દળને 14 અને નિષાદ પાર્ટીને 17 બેઠકો આપવાનો નિર્ણય લેવામાં આવ્યો છે. ગત વિધાનસભા ચૂંટણીમાં અપના દળને 11 બેઠકો આપવામાં આવી હતી, પરંતુ આ વખતે 14 બેઠકો આપવામાં આવી છે.
આજે ઉમેદવારોના નામ પર અંતિમ મહોર મારવામાં આવશે
દરમિયાન દિલ્હીમાં વડાપ્રધાન નરેન્દ્ર મોદીના નેતૃત્વમાં ભાજપની કેન્દ્રીય ચૂંટણી સમિતિની બેઠક યોજાઈ રહી છે. આ બેઠકમાં વિધાનસભા ચૂંટણીના ઉમેદવારોના નામ પર અંતિમ મહોર મારવામાં આવશે. યુપી સહિત પાંચ રાજ્યોમાં યોજાનારી આગામી વિધાનસભાની ચૂંટણી માટે છેલ્લા બે દિવસથી સતત ભાજપમાં ઉચ્ચ સ્તરીય બેઠકો ચાલી રહી છે. આ બેઠકમાં બીજેપી અધ્યક્ષ જેપી નડ્ડા, કેન્દ્રીય ગૃહ મંત્રી અમિત શાહ, યુપીના મુખ્યમંત્રી યોગી આદિત્યનાથ, પ્રદેશ અધ્યક્ષ સ્વતંત્ર દેવ સિંહ, ડેપ્યુટી સીએમ દિનેશ શર્મા અને યુપી સંગઠન મહાસચિવ સુનીલ બંસલ પણ હાજર છે.
છેલ્લા લાંબા સમયથી યુપીમાં ચૂંટણી કવાયત ચાલી રહી છે. હવે આખરી ચરણમાં જોશથી ચૂંટણી પ્રચાર કરવામાં આવી રહ્યો છે.
યુપી ચૂંટણીના પરિણામો 10 માર્ચે આવશે
જણાવી દઈએ કે ઉત્તર પ્રદેશની 403 વિધાનસભા સીટો માટે સાત તબક્કામાં મતદાન 10 ફેબ્રુઆરીથી શરૂ થશે. યુપીમાં સાત તબક્કામાં 10, 14, 20, 23, 27 અને 3 અને 7 માર્ચે મતદાન થશે. જ્યારે 10 માર્ચે મતગણતરી હાથ ધરાશે. ચૂંટણી પંચે કોરોનાને જોતા યુપી, પંજાબ, ગોવા, મણિપુર અને ઉત્તરાખંડમાં વિધાનસભા ચૂંટણી માટે 15 જાન્યુઆરી સુધી કોઈ રાજકીય રેલી અને રોડ શોની મંજૂરી આપી નથી.
ભાજપ છેલ્લા ઘણા સમયથી જોર લગાવીને ચૂંટણી પ્રચાર કરી રહ્યો છે તો આ વખતે જોવાનું રહેશે કે યોગીજીનું સ્પષ્ટ બહુમતી સાથે જીતવાનું સપનું પૂરું થાય છે કે કેમ?