ઉત્તર પ્રદેશ વિધાનસભા ચૂંટણીમાં 403માંથી બીજેપીની કેટલી સીટ આવશે ?
ઉત્તરપ્રદેશમાં વિધાનસભાની ચૂંટણી
ચૂંટણીને લઇને બેઠકોનું ગણિત
ખાનગી ચેનલ દ્વારા કરવામાં આવ્યો સરવે
ઉત્તર પ્રદેશમાં વિધાનસભાની ચૂંટણીને લઇને રાજકીય ગરમાવો જોવા મળી રહ્યો છે. જો કે હજી ચૂંટણીની તારીખો જાહેર થઇ નથી પરંતુ થોડા દિવસોમાં ચૂંટણીની તારીખો જાહેર થઇ શકે છે. દેશના સૌથી મોટા રાજ્ય યુપીમાં એક ખાનગી ચેનલ દ્વારા સર્વે કરવામાં આવ્યો જેમાં ફરી એકવાર ભાજપની સરકાર બનતી જોવા મળી રહી છે. ખાનગી ચેનલ દ્વારા ઉત્તર પ્રદેશના ચાર અલગ અલગ ભાગોમાં સર્વે કરવામાં આવ્યો છે. જો કે સર્વે અનુસાર બીજેપીએ જીત મેળવવા જોર લગાવવુ પડશે.
યુપીની કમાન કોના હાથમાં ?
ઉત્તર પ્રદેશની 403 સીટો પર સર્વે કરવામાં આવ્યો છે. સર્વે અનુસાર બીજેપીને 239 સીટ મળતી હોય તેમ લાગી રહ્યુ છે. તો સમાજવાદી પાર્ટીને 144 સીટ મળતી જોવા મળી રહી છે. જ્યારે બસપાને 12 તો કોંગ્રેસને માત્ર 6 સીટ મળતી જોવા મળી રહી છે.
પશ્ચિમ યુપીમાં કોણ બાજી મારશે ?
ઉત્તર પ્રદેશની 403 સીટો પર સર્વે કરવામાં આવ્યો છે. ખેડૂત આંદોલનને જોતા લાગી રહ્યુ હતુ કે બીજેપીને પશ્ચિમ યુપીમાં સીટ મેળવવામાં નુકસાન થઇ શકે છે. પરંતુ સર્વેના રિપોર્ટ પ્રમાણે લાગી રહ્યુ છે કે કૃષિ કાયદો પરત લીધા બાદ બીજેપીને કોઇ મોટુ નુકસાન નથી. બીજેપી આ ક્ષેત્રમાં આવનારી 97 સીટોમાંથી 57થી 60 સીટ જીતી શકે છે. જ્યારે સપા 35 થી 38 સીટ જીતી શકે છે.
પૂર્વાંચલમાં સપાને ફાયદો
પૂર્વાંચલમાં આ વખતે બીજેપીને ગત ચૂંટણીની સરખામણીએ નુકસાન થતુ જોવા મળી રહ્યુ છે. ગત ચૂંટણીમાં બીજેપીને 74 સીટ મળી હતી પરંતુ આ વર્ષે બીજેપીને 60 સીટની અંદર સીટ મળી શકે છે. બીજેપી આ વિસ્તારમાં 49થી 58 સીટ મેળવી શકે છે. તો સપાને પૂર્વાંચલમાં ઘણો ફાયદો થાય તેમ લાગી રહ્યુ છે. સપા અહીં 39થી45 સીટ જીતી શકે છે જો કે ગત ચૂંટણીમાં સપાને 12 સીટ મળી હતી.
રુહેલખંડમાં કોના હાથમાં બાજી
સર્વે અનુસાર બીજેપી આ વિસ્તારમાં 30થી 36સીટ, સપા 17થી 18 સીટ જ્યારે બસપા 1 કે 2 સીટ અને કોંગ્રેસને એક મળતી જોવા મળી રહી છે. આ વિસ્તારમાં બીજેપીને વધુ નુકસાન થતુ હોય તેમ લાગી રહ્યું છે.
બુંદેલખંડમાં કમળ
બુંદેલખંડની વાત કરીએ તો અહીં કુલ 19 સીટ પર સરવેમાં બીજેપીને 14થી 15 સીટ મળતી જોવા મળી રહી છે. જ્યારે સપાને 3થી5 અને બસપાના ખાતામાં એક સીટ જઇ શકે છે. જો કે કોંગ્રેસ અહીં ખાતુ ખોલે તેમ લાગતું નથી.
સેન્ટ્રલ યુપીમાં બીજેપી આગળ
સેન્ટ્રલ યુપીમાં 35 સીટો પર સર્વે કરવામાં આવ્યો છે. જેમાં બીજેપીને 17થી 21 સીટ મળતી હોય તેમ લાગી રહ્યું છે. સપાને 12 થી 13 સીટ મળી શકે છે. જ્યારે કોંગ્રેસ,બસપા અને અન્યના ખાતામાં એક સીટ જઇ શકે છે. આ વિસ્તારમાં બીજેપી સૌથી મોટી પાર્ટી હશે.