મુસીબતનું માવઠું / ભરઉનાળે ગુજરાતમાં અહીં વરસ્યો ધોધમાર વરસાદ, પૂર આવતા નદી-નાળા છલકાયા, જુઓ ક્યાં કેવો માહોલ

• દક્ષિણ ગુજરાતમાં કમોસમી વરસાદનો કહેર યથાવત
• અમરેલીમાં ઘાંડલાની સ્થાનિક નદીમાં આવ્યું  પૂર
• 4 દિવસ કમોસમી વરસાદની આગાહી

રાજ્યમાં હજુ પણ કેટલાક વિસ્તારોમાં કમોસમી વરસાદ વરસવાનું ચાલુ છે. દક્ષિણ ગુજરાતમાં કમોસમી વરસાદનો કહેર યથાવત્ છે તો અમરેલી અને રાજકોટમાંમાં માવઠાએ માઝા મુકી છે. કમોસમી વરસાદથી ખેડૂતોની ચિંતામાં વધારો થવા પામ્યો છે.

સાવરકુંડલા ગ્રામ્ય વિસ્તારોમાં ધોધમાર વરસાદ
અમરેલી જિલ્લામાં કમોસમી વરસાદ વરસ્યો છે. સાવરકુંડલા ગ્રામ્ય વિસ્તારોમાં ધોધમાર વરસાદ ખાબક્યો છે. વીજપડી,ઘાંડલા,ભમ્મર,ચીખલી ગામમાં ધોધમાર વરસાદ પડ્યો છે. ઘાંડલાની સ્થાનિક નદીમાં પૂર આવ્યું છે. કમોસમી વરસાદને લઇ નદી નાળા છલકાયા છે.

કમોસમી વરસાદનો કહેર યથાવત
દક્ષિણ ગુજરાતમાં કમોસમી વરસાદનો કહેર યથાવત્ જોવા મળી રહ્યો છે. સુરત શહેરના વિવિધ વિસ્તારોમાં કમોસમી વરસાદ પડ્યો છે. શહેરના ઉતરાણ,વરાછા અને કાપોદરામાં વરસાદ પડ્યો છે. હવામાન વિભાગે દક્ષિણ ગુજરાતમાં વરસાદની આગાહી આપી છે.

રાજકોટમાં ભર ઉનાળે વરસાદી ઝપટા 
રાજકોટના વાતાવરણમાં પલટો આવ્યો છે. શહેરમાં ભર ઉનાળે વરસાદી ઝપટા પડ્યા છે. કમોસમી વરસાદથી ખેડૂતો ચિંતિત થયાં છે. રોગચાળો વધુ વકરે તેવી ભીતિ પણ સેવાઈ રહી છે. રાજકોટના ગોંડલના ગ્રામ્ય વિસ્તારમાં વરસાદ વરસ્યો છે. કોલીથડ ગામમાં ધોધમાર વરસાદથી ખેડૂતો મુશ્કેલીમાં મુકાયા છે. માવઠાને કારણે પાકમાં વ્યાપક નુકસાન થયો છે. ઘઉં, મરચા, કપાસ સહિતના પાકને નુકસાન થયો છે.

ભણગોર ગામે કમોસમી વરસાદ
જામનગરના લાલપુરના ભણગોર ગામે કમોસમી વરસાદનો કહેર છે. ખેતરમાં પાણી ભરાયા તેમજ ઊભા પાકને નુકસાન થયો છે. ભણગોર ગામમાં સતત ત્રીજા દિવસે પણ કમોસમી વરસાદ પડ્યો છે. ચણા,બાજરો, ધાણા અને ઉનાળુ પાક ભારે નુકસાન થયો છે.

નવસારી જિલ્લાના વાતાવરણમાં પલટો
નવસારી જિલ્લાના વાતાવરણમાં પલટો જોવા મળ્યો છે. નવસારી શહેરમાં વાદળછાયું વાતાવરણ છે. જિલ્લાના અનેક તાલુકાઓમાં કમોસમી વરસાદ ખાબક્યો છે. ગણદેવી,બીલીમોરા,ચિખલી સહિતના વિસ્તારોમાં વરસાદ પડ્યો છે. કમોસમી વરસાદના કારણે કેરી અને ચીકુ પકવતા ખેડૂતો મુશ્કેલીમાં મુકાયા છે.  આગામી બે દિવસ કમોસમી વરસાદ વરસવાની આગાહીથી ખેડૂતો મુશ્કેલીમાં મુકાયા છે.

4 દિવસ કમોસમી વરસાદની આગાહી
ગુજરાતમાં આજથી 4 દિવસ કમોસમી વરસાદની આગાહી કરવામાં આવી છે. આજે હળવાથી મધ્યમ વરસાદની શક્યતા છે તેમજ ગાજવીજ અને ભારે પવન સાથે વરસાદ પડી શકે છે. સૌરાષ્ટ્ર અને ઉત્તર ગુજરાતમાં વરસાદ થાય તેવી શક્યતાઓ છે. આગામી 5 દિવસ તાપમાનમાં વધારો નહી થાય.  અમદાવાદમાં સાંજ બાદ વરસાદ થાય તેવી શક્યતાઓ છે.