હવામાન / ફરી પડશે કમોસમી વરસાદ! 13 એપ્રિલે આ 8 જિલ્લાઓમાં માવઠાની આગાહી, અમદાવાદમાં પડશે હિટવેવ

• ખેડૂતો માટે ફરી માઠા સમાચાર
• 13 એપ્રિલે વરસાદની આગાહી
• 14-15 એપ્રિલે હિટવેવની આગાહી  

ગુજરાતમાં એક બાજુ ગરમી તો બીજી બાજુ કમોસમી વરસાદથી ખેડૂતોની હાલત કફોડી બની છે. ખેડૂતો માટે વધુ એક માઠા સમાચાર સામે આવ્યા છે. રાજ્યમાં હવામાન વિભાગ દ્વારા ફરી કમોસમી વરસાદની સાથે હિટવેવની આગાહી કરવામાં આવી છે. હવામાન વિભાગની આગાહી બાદ ખેડૂતોમાં ચિંતા વ્યાપી ગઈ છે.  

અહીં ખાબકી શકે છે વરસાદ
હવામાન વિભાગના જણાવ્યા અનુસાર,  12 એપ્રિલે ભરૂચ, સુરત, અમરેલી અને ભાવનગરમાં હળવો વરસાદ પડી શકે છે. 13 એપ્રિલે દક્ષિણ ગુજરાત અને સૌરાષ્ટ્રમાં કમોસમી વરસાદની સંભાવના છે. સુરત, વલસાડ, નવસારી, તાપી, ડાંગમાં વરસાદની આગાહી છે. તો અમરેલી, ગીર સોમનાથ અને ભાવનગરમાં વરસાદની આગાહી છે. હવામાન વિભાગે કમોસમી વરસાદ સાથે ગરમીની પણ આગાહી કરી છે. તેમણે જણાવ્યું છે કે, રાજ્યમાં આગામી 5 દિવસ ગરમીનો પ્રકોપ રહેશે. 14 અને 15 એપ્રિલે અમદાવાદમાં હિટવેવની આગાહી છે

આ કારણે વરસાદ પડવાની શક્યતા
ગતરોજ હવામાન વિભાગના ડાયરેક્ટર ડો. મનોરમાં મોહંતીએ જણાવ્યું હતું કે, દક્ષિણ-પૂર્વ રાજસ્થાન અને તેની આસપાસના વિસ્તારોમાં ઉદભવેલા સાઇક્લોનિક સર્ક્યુલેશનના પગલે રાજ્યમાં ફરી કમોસમી વરસાદ પડવાની શક્યતા ઊભી થઈ છે. બે દિવસ બાદ થંડરસ્ટોર્મ એક્ટિવિટી સાથે વરસાદ રહેશે. 12, 13 અને 14 એપ્રિલે વરસાદની આગાહી છે. આ દરમિયાન અમરેલી, ભાવનગર, બોટાદ, સુરત, ભરૂચ, વલસાડ, નવસારીમાં વરસાદી માહોલ રહેશે. વરસાદની સાથે જ બે દિવસ ગરમીનું જોર યથાવત રહેશે. રાજ્યમાં 2 ડિગ્રી તાપમાન વધારો નોંધાશે. રાજ્યમાં એક તરફ ગરમી બીજી તરફ કમોસમી માવઠાનો માર રહેશે.

અમદાવાદમાં પણ પડી શકે છે વરસાદ
હવામાન વિભાગની આગાહી મુજબ, અમદાવાદમાં બુધવારે અને ગુરુવારે કમોસમી વરસાદ પડી શકે છે. બીજી તરફ શહેરમાં આકરી ગરમી પણ અમદાવાદીઓને રાડ પડાવશે, કેમ કે આગામી અઠવાડિયા દરમિયાન ગરમીનો પારો 40થી 41 ડિગ્રી વચ્ચે રહેશે. અમદાવાદ શહેરમાં ગરમીનો પ્રકોપ વધ્યો છે. હવે આખો દિવસ આકરો તાપ રહેતો હોઈ લોકો રાડ પાડી ઉઠ્યા છે. બપોરના સમયે તો સન્નાટો છવાઈ જાય છે. લોકો આકરા તાપથી બચવા કામ સિવાય ઘર કે ઓફિસની બહાર નીકળવાનું ટાળી રહ્યા છે. બીજી તરફ સાંજ પડતાની સાથે લીબું પાણી, શેરડીનો રસ અને બરફના ગોલા ખાઈને લોકો તાપ સામે રક્ષણ મેળવી રહ્યા છે. 

જગતનો તાત મુશ્કેલીમાં 
આપને જણાવી દઈએ કે, ગયા માર્ચ મહિનામાં અવારનવાર વરસાદી માહોલ ઊભો થઈને જગતના તાતના ઊભા પાકને બરબાદ કરી નાખનારું માવઠું એપ્રિલ મહિનામાં પણ નવી કમઠાણ સર્જવાનું છે. જેના કારણે ખેડૂતોના જીવ તાળવે ચોંટ્યા છે.