આગાહી / એક તરફ હિટવેવ તો બીજી તરફ માવઠું: ગુજરાતમાં ફરી થશે બેવડી ઋતુનો અહેસાસ, આ તારીખો ખેડૂતો માટે ચિંતાજનક

• ગુજરાતમાં માવઠાનો મારો રહેશે યથાવત્ 
• માર્ચ મહિનામાં ફરી વખત માવઠાની આગાહી 
• હવામાન વિભાગ દ્વારા કરવામાં આવી આગાહી 

રાજ્યમાં કમોસમી વરસાદ પડતા ખેડૂતોને મોટું નુકસાન થયું હોવાથી રાજ્ય સરકારે સર્વે કરવાની જાહેરાત કરી છે. ત્યારે રાજ્યમાં હજુ પણ આગામી દિવસોમાં માવઠું થવાની અને ભયંકર ગરમી પડવાની આગાહી હવામાન વિભાગ દ્વારા કરવામાં આવી છે. રાજ્યમાં વેસ્ટર્ન ડિસ્ટર્બન્સના કારણે ફરી વરસાદી માહોલ સર્જાશે.

કચ્છમાં વધશે ગરમીનું પ્રમાણ
હવામાન વિભાગના ડાયરેક્ટર મનોરમા મોહંતીએ જણાવ્યું કે, હાલ રાજ્યમાં ઉત્તર પૂર્વના પવન ફૂંકાઈ રહ્યા છે. જેના કારણે અમદાવાદ સહિત રાજ્યના કેટલાક વિસ્તારમાં મહત્તમ તાપમાનમાં નોંધપાત્ર વધારો થશે. જ્યારે કચ્છમાં હીટ વેવ રહેવાની શક્યતા છે. કચ્છમાં આગામી બે દિવસ સૂકા અને ગરમ પવન ફૂંકાશે અને ગરમીનું પ્રમાણ વધી જશે. સાથે અન્ય શહેરના મહત્તમ તાપમાન પણ ઊંચા આવશે.

13 અને 14 માર્ચે ખાબકશે વરસાદ
તેઓએ જણાવ્યું છે કે, ગુજરાતમાં 13 અને 14 માર્ચે ઠંડર સ્ટોર્મ એક્ટિવિટી સાથે વરસાદ ખાબકશે. આગામી 2 દિવસમાં 3 ડિગ્રી તાપમાન વધશે. કચ્છ, ગીર સોમનાથ, પોરબંદરમાં હિટવેવ થઈ શકે છે.  હાલમાં કચ્છમાં 37 ડિગ્રી, કંડલા 36.4, પોરબંદર, 37 અને વેરાવળ 36.6 ડિગ્રી તાપમાન નોંધાયું છે. સામાન્ય કરતા 5 ડિગ્રી વધુ તાપમાન જાય ત્યારે હિટવેવ જાહેર કરાય છે. હિટવેવ આ વિસ્તારમાં 40 ડિગ્રી ઉપર તપામાન જઇ શકે છે.

આ વિસ્તારમાં પડી શકે છે વરસાદ
તેઓએ જણાવ્યું કે, 13 અને 14 માર્ચે સૌરાષ્ટ્ર, અમરેલી, રાજકોટ, કચ્છ, ડાંગ, તાપી, દાહોદ, બનાસકાંઠા, સાબરકાંઠા, અને પાટણમાં કમોસમી વરસાદની શક્યતાઓ છે. તો આ દરમિયાન અમદાવાદ અને ગાંધીનગરમાં વાદળછાયુ વાતાવરણ રહેશે. કચ્છ જિલ્લાના કેટલાક વિસ્તારોમાં હીટવેવની આગાહી છે. આજે અને આવતીકાલે હીટવેવની આગાહી છે. હવામાન વિભાગની આગાહી અનુસાર, આજથી રાજ્યમાં ગરમીનો પારો ધીમે ધીમે ઊંચકાશે અને આગામી ત્રણ દિવસ સુધીમાં ગરમીનો પારો 42 ડિગ્રી સુધી પહોંચી શકે છે. 

વહીવટી તંત્ર એલર્ટ
બીજી તરફ હવામાન વિભાગની આગહી અનુસાર, મહીસાગર, પંચમહાલ, અરવલ્લી, સુરત, નવસારી, વલસાડ, ડાંગ, તાપી, દમણ, દાદરાનગર હવેલી, અમરેલી, રાજકોટ અને કચ્છમાં કમોસમી વરસાદ વરસી શકે છે, સાથે જ 30થી 40 કિલોમીટર પ્રતિ કલાકની ઝડપે પવન ફુંકાઈ શકે છે. જે વિસ્તારોમાં કમોસમી વરસાદની આગાહી કરવામાં આવી છે. ત્યાં પ્રશાસન દ્વારા તમામ મામલતદારોને એલર્ટ રહેવા માટે સૂચના આપવામાં આવી છે. 

ખેડૂતો ચિંતામાં
હવામાન વિભાગ દ્વારા ભર ઉનાળે  ફરી કમોસમી વરસાદની આગાહી કરવામાં આવતા ખેડૂતો ચિંતામાં મુકાયા છે. હવામાન વિભાગની આગાહી બાદ ગુજરાતના ખેડૂતો ચિંતામાં ગરકાવ થયા છે. જો માવઠું પડ્યું તો ખેતરમાં ઉભા પાકને નુકસાન થશે તેવી ચિંતા તેમને સતાવી રહી છે.  આ સિવાય કેરીના પાકને પણ સૌથી વધારે અસર થશે તેવો ભય છે.