અમેરિકામાં જ્યોર્જ ફ્લોયડના મોત બાદ ન્યાય માટે અશ્વેત પ્રદર્શન કરી રહ્યા છે. પોલીસે સોમવારે વ્હાઇટ હાઉસ નજીક વિરોધ કરી રહેલા લોકોને વિખેરવા ટીઅર ગેસ અને રબરની ગોળીઓનો ઉપયોગ કર્યો હતો. દરમિયાન અમેરિકન રાષ્ટ્રપતિ ડોનાલ્ડ ટ્રમ્પે હિંસાને રોકવા માટે સૈન્ય ઉતારવાની ચેતવણી આપી છે. ટ્રમ્પે કહ્યું કે જો રાજ્યોએ હિંસા બંધ કરવાની મનાઈ ફરમાવી તો હું યુએસ આર્મી ઉતારીશ. જેથી કરીને લોકોના હક, સંપત્તિ અને જીવનની સુરક્ષા થઈ શકે.
અમેરિકાએ રાજ્યોને આપી ચેતવણી કહ્યું કે જો
રાજ્યના ગવર્નર ટ્રમ્પનો આદેશ માનવાની ના પાડશે તો આર્મી ઉતારવામાં આવશે
અમેરિકામાં અશ્વેતના મોતથી મામલો બિચકાયો
અમેરિકી રાષ્ટ્રપતિ ડોનાલ્ડ ટ્રમ્પે દેશના મોટા શહેરોમાં હિંસક પ્રદર્શન તાત્કાલિક રોકવા હાકલ કરતા કહ્યું હતું કે રાજ્યોના રાજ્યપાલોએ નેશનલ ગાર્ડનું પોસ્ટિંગ કરવું જોઈએ. જો તેઓ તેમ કરવાની ના પાડશે તો તેઓ લશ્કર ઉતારશે. હિંસા દૂર ન થાય ત્યાં સુધી મેયર અને રાજ્યપાલોએ સખત કાયદાનું પાલન કરવું જોઈએ. ટ્રમ્પે કહ્યું, ‘જો કોઈ શહેર અથવા રાજ્ય અમેરિકન નાગરિકોના જીવ અને સંપત્તિ બચાવવા માટે જરૂરી પગલાં લેવાની મનાઈ ફરમાવે છે તો હું અમેરિકન આર્મી ઉતારીશ અને તેમની સમસ્યાનું તાત્કાલીક સમાધાન લાવીશ.’
ફ્લોયડના મૃત્યુ વિરુદ્ધ હિંસક દેખાવોની આગ અમેરિકાના 140 શહેરોમાં પ્રસરી ગઈ છે. જે છેલ્લા કેટલાક દાયકાઓમાં દેશની સૌથી ખરાબ નાગરિક અશાંતિ માનવામાં આવી રહી છે.
જ્યોર્જ ફ્લોયડના મૃત્યુ બાદ શુક્રવારે રાત્રે સેંકડો પ્રદર્શનકારીઓ વ્હાઇટ હાઉસની બહાર એકઠા થયા હતા. બહાર પ્રદર્શનકારીઓ ભેગા થયાના સમાચાર આવતા જ વ્હાઇટ હાઉસના સુરક્ષા અધિકારીઓ રાષ્ટ્રપતિ ડોનાલ્ડ ટ્રમ્પને ભૂગર્ભ બંકરમાં લઈ ગયા હતા. રવિવાર અને સોમવારે પણ દેખાવો ચાલુ રહ્યા હતા. જે બાદ વ્હાઇટ હાઉસ તરફથી એક વીડિયો ટ્વિટ કરવામાં આવ્યો હતો. જેમાં યુએસ રાષ્ટ્રપતિએ કહ્યું હતું કે શેરીઓમાં દેખાતી અરાજકતાને સહન કરવામાં આવશે નહીં.
નોંધનીય છે કે પોલીસ કસ્ટડીમાં એક અશ્વેત જ્યોર્જ ફ્લોયડના મોતથી અમેરિકામાં હિંસક દેખાવો થઈ રહ્યા છે અને આ ઘટનાનો વીડિયો વાયરલ થયો છે. આ કેસમાં પોલીસ કર્મચારી પર હત્યાનો ગુનો નોંધવામાં આવ્યો છે. શાંતિપૂર્ણ રીતે ચાલી રહેલા પ્રદર્શનને જોત જોતમાં હિંસક સ્વરુપ ધારણ કર્યુ છે. અમેરિકાના મોટાભાગના શહેરોમાં કર્ફ્યુ લાદવામાં આવ્યો છે. પ્રદર્શનકારીઓએ રાષ્ટ્રપતિ ટ્રમ્પની ચેતવણીને અવગણી છે. આ મામલે અનેક જગ્યાએ અથડામણ જોવા મળી છે.