પુત્રવધુ દ્વારા દાખલ એક રેપ કેસની સુનાવણી કરતા અલ્હાબાદ હાઈકોર્ટે એવી ટીપ્પણી કરી કે ભારતીય સંસ્કૃતિમાં સસરા વહુ પર રેપ કરે તે ન માની શકાય તેવી ઘટના છે.
પુત્રવધુ દ્વારા દાખલ રેપ કેસની સુનાવણી
અલ્હાબાદ હાઈકોર્ટનું મહત્વનું અવલોકન
ભારતીય સંસ્કૃતિમાં સસરા પુત્રવધૂ પર રેપ કરે તે ન માની શકાય તેવી વાત
પુત્રવધુએ સસરા પર રેપનો લગાવ્યો હતો આરોપ
હાઈકોર્ટે આરોપી સસરાને આપ્યા વચગાળાના જામીન
ભારતીય સમાજમાં સસરા કોઈની સાથે મળીને તેની સગી પુત્રવધૂ પર રેપ કરે તે વાત અલ્હાબાદ હાઈકોર્ટને ગળે ઉતરી નથી. અલ્હાબાદ હાઈકોર્ટનું માનવું છે કે ભારતીય સમાજમાં આવું ન બની શકે. આજે અલ્હાબાદ હાઈકોર્ટમાં એક શખ્સની જામીન અરજી પર સુનાવણી થઈ હતી. આ શખ્સ પર તેની પુત્રવધૂએ રેપનો આરોપ લગાવ્યો છે.
ભારતીય સમાજમાં સસરા તેની પુત્રવધુ પર રેપ કરે તે સંપૂર્ણ અકુદરતી
અલ્હાબાદ હાઈકોર્ટે તેના તાજેતરના એક ચુકાદામાં એવું જણાવ્યું હતું કે ભારતીય સમાજમાં સસરા તેની પુત્રવધુ પર રેપ કરે તે સંપૂર્ણ અકુદરતી છે.એક તબક્કે તો આવું માની પણ ન શકાય. પુત્રવધુ દ્વારા સસરા સામે દાખલ રેપ કેસની સુનાવણી વખતે અલ્હાબાદ હાઈકોર્ટના જસ્ટિસ અજિત સિંહે આવી ટીપ્પણી કરી હતી.
પુત્રવધૂએ સસરા સામે રેપની ફરિયાદ કરી હતી
પુત્રવધુ દ્વારા દાખલ રેપ કેસના આરોપીને વચગાળાના જામીન આપતા જસ્ટિસ અજિત સિંહે કહ્યું કે આરોપનો પ્રકાર અને અરજદારનો હેતુ જોતા તથા ગુનાની ગંભીરતાને ધ્યાનમાં લેતા એવું લાગી રહ્યું છે કે આપણા ભારતીય સમાજમાં સસરા બીજા કોઈની સાથે મળીને પુત્રવધુ પર રેપ કરે તે તદ્દન અકુદરતી છે. કોર્ટે એવું પણ કહ્યું કે અરજદાર પુત્રવધુએ સમાજમાં સસરાનું અપમાન કરવા અને તેમની છાપ ખરડવા માટે જાણીજોઈને રેપના આરોપ લગાવ્યાં હતા. કોર્ટે આરોપી સસરાને વચગાળાના જામીન આપ્યાં હતા.
શું છે મામલો
ફરિયાદ કરનાર પુત્રવધુએ 2018ની સાલમાં કોર્ટમાં અરજી કરીને એવો આરોપ લગાવ્યો હતો કે એક દિવસ તેના સસરા કોઈને લઈને તેના ભાઈના ઘેર આવ્યાં હતા. પુત્રવધુએ આગળ કહ્યું કે તે વખતે હું ઘરમાં એકલી હતી, આ જોઈને સસરાએ મારી સાથે ગાળાગાળી શરુ કરી હતી અને ત્યાર બાદ બન્નેએ તેની સાથે રેપ કરવાનો પ્રયાસ કર્યો હતો. ત્યાર બાદ પુત્રવધૂએ સસરા સામે કોર્ટ કેસ કર્યો હતો અને આજે આ કેસની સુનાવણી ચાલી હતી જેમાં જસ્ટિસ અજિત સિંહે કહ્યું હતું કે ભારતીય સમાજમાં સસરા ઉઠીને તેમની સગી પુત્રવધુ પર રેપ કરે તે તદ્દન ન માની શકાય તેવી વાત છે.