ઉન્નાવ દુષ્કર્મ પીડિતાના મોત પછી પરિવાર આઘાતમાં છે. ઉત્તર પ્રદેશ સહિત આખા દેશમાં ઉન્નાવ દુષ્કર્મ કાંડને લઈને લોકોનાં મનમાં ગુસ્સો છે. તો ઉન્નાવ ગામમાં આક્રોશનો માહોલ છે. ત્યારે આ માહોલની વચ્ચે દુષ્કર્મ પીડિતાના મૃતદેહ તેના ઘરે લાવવામાં આવ્યો હતો.
દિલ્હીથી ઉન્નાવ પહોંચ્યો પીડિતાનો મૃતદેહ
ચુસ્ત બંદોબસ્ત મૃતદેહને ઉન્નાવ પહોંચાડાયો
શુક્રવારે મોડીરાતે દિલ્હીમાં થયું હતુ મોત
દિલ્હીથી ઉન્નાવ પીડિતાના મૃતદેહને ઘરે લવાયો હતો. સઘન સુરક્ષા વ્યવસ્થા સાથે મૃતદેહને ઉન્નાવ પહોંચાડાયો હતો. તો ગામમાં પણ મોટા પ્રમાણમાં સુરક્ષા તૈનાત છે. પીડિતાનો મૃતદેહ ઘરે પહોંચતા જ આખા ગામનો માહોલ ગમગીન બની ગયો. પરિવારજનો પર દુઃખનો પહાડ તૂટી પડ્યો છે. દરેક ગામની દીકરી માટે ન્યાયની માંગ કરી રહ્યા છે.
ગેંગરેપ પીડિતાને જામીન પર છૂટેલા આરોપીઓએ ગુરૂવાર સવારે જીવતી સળગાવી દેવાનો પ્રયત્ન કર્યો હતો, જ્યાર બાદ તેને પહેલા લખનઉ અને બાદમાં દિલ્હીના સફદરજંગ હોસ્પિટલમાં દાખલ કરવામાં આવી હતી. શુક્રવાર રાત્રે 90 ટકા સુધી દાઝી ગયેલી પીડિતાનું સારવાર દરમિયાન કરૂણ મોત થયું હતું.
ઉન્નાવ વિસ્તારમાં હાલાત નાજૂક
મળતી માહિતી અનુસાર, પીડિતાનો મૃતદેહ પહોંચ્યા બાદ વિસ્તારમાં હાલાત નાજૂક બન્યા છે. કાયદો વ્યવસ્થાને ધ્યાને રાખતા સીતાપુર, હરદોઈ અને લખનૌથી પોલીસ ફોર્ને ઉન્નાવ બોલવવામાં આવી છે. આ સિવાય બે પ્લાટૂન પીએસીને પણ ઘટનાસ્થળે બોલાવવામાં આવી છે. મીડિયાને પીડિતાના ઘરથી દૂર રાખવાના પ્રયત્નો કરવામાં આવી રહ્યા છે. પીડિતાના મૃતદેહને ઘરના આંગણામાં રાખવામાં આવ્યો છે.
મોડી રાત્રે જ અંતિમ સંસ્કાર કરાવવા માટે તંત્રના પ્રયાસ
સૂત્રોના જણાવ્યા અનુસાર, જિલ્લા પ્રશાસન પરિવારને સમજાવીને મોડી રાત્રે જ અંતિમ સંસ્કાર કરાવવા માટે મનાવવાના પ્રયત્નો કરી રહ્યું છે. જોકે પીડિતાના પિતાનું કહેવું છે કે તેઓ રવિવાર સવારે જ દીકરીના અંતિમ સંસ્કાર કરશે.
પીડિતાના પરિવારજનોને 25 લાખની સહાય અને ઘર આપવાની સરકારની જાહેરાત
ઉન્નાવ સહિત સમગ્ર દેશમાં ગુસ્સાનું કારણ બનેલી આ ઘટનાને લઇને યૂપીની યોગી સરકાર પર પણ પ્રહાર કરવામાં આવી રહ્યા છે. બીજી બાજુ પ્રદેશમાં કોંગ્રેસ અને અન્ય વિપક્ષો સરકારને ઘેરવાનો પ્રયાસ કરી રહ્યા છે. ત્યારે હાલ આ પીડિતાની વ્હારે યોગી સરકાર આવી છે. ભોગ બનેલી યુવતીના પરિજનોને 25 લાખની સહાય અને ઘર આપવાની સરકારે જાહેરાત કરી છે. પ્રધાનમંત્રી આવાસ યોજનામાં આ મકાન આપવાની જાહેરાત કરાઈ છે. આ ઉપરાંત ફાસ્ટ્રેક કોર્ટમાં આ મામલે જલ્દી સુનાવણી કરાઈને કડકમાં કડક સજા આપવાની પણ જાહેરાત કરાઈ છે.