વિચારણા / મોટા સમારંભોને મંજૂરી માટે સરકાર કરી રહી છે વિચારણા, નિયમમાં આવી શકે છે આ ફેરફાર

• દેશમાં ફરી મોટા સમારંભોને મળી શકે છે મંજૂરી
• મોટા સમારંભોને મંજૂરી માટે સરકાર કરી રહી છે વિચારણા
• સમારંભોમાં સરકાર વધુ લોકોની છૂટ આપી શકે છે

દેશમાં ફરી મોટા સમારંભ યોજવાની છૂટ મળી શકે છે. એટલે કે હવે તમે પહેલાંની જેમ ધામધૂમથી લગ્ન કરી શકશો. લગ્ન સમારંભોમાં 50થી વધુ મહેમાનોને આમંત્રિત કરી શકાશે. ઇચ્છો તેટલા મહેમાન બોલાવી શકાશે. જો કે આ માટે તમારે મહેમાનોથી બમણી ક્ષમતાવાળું સમારોહ સ્થળ શોધવું પડશે, કારણ કે હવે લગ્નમાં કોઇ પણ હૉલ કે લગ્નસ્થળની 50 ટકા ક્ષમતા જેટલા મહેમાનો જ બોલાવી શકાશે. ધારો કે તમે લગ્નમાં 200 મહેમાનને આમંત્રિત કરી રહ્યા છો, તો સમારોહ સ્થળની ક્ષમતા 400 મહેમાનની હોવી જોઇએ. આ જ રીતે 200 દર્શકો માટે 400ની ક્ષમતાવાળું સભાગૃહ હોવું જોઇએ.

પાંચ મહિનાથી બંધ રહેલા સામાજિક, સાંસ્કૃતિક, રાજકીય આયોજનો પણ આ રીતે શરૂ થઇ શકશે. કોઇ પણ સભાગૃહની 50 ટકા સીટો જેટલા શ્રોતાઓ બોલાવીને સંગીત, નૃત્ય, નાટક, સભા, વિમોચન જેવા કાર્યક્રમ કરી શકાશે. જો કે કાર્યક્રમ કન્ટેઇનમેન્ટ ઝોનમાં ન હોવો જોઇએ. અનલૉકની આગામી ગાઇડલાઇનમાં કેન્દ્ર સરકાર આ બાબતો સામેલ કરી શકે છે. મૉલ ખોલવાની મંજૂરી બાદ સિનેમાઘરો તથા મલ્ટીપ્લેક્સ માલિકો પણ એક તૃતીયાંશથી 50 ટકા ક્ષમતા સાથે ખોલવાની માગ કરી રહ્યા છે. 

કોરોનાની શરૂઆતથી લોકડાઉને કારણે મૂકાયો હતો પ્રતિબંધ

23 માર્ચથી લૉકડાઉન લાગુ થયા બાદ આ પ્રવૃત્તિઓ પર પ્રતિબંધ લદાયો હતો. કેન્દ્રીય પર્યટન મંત્રી પ્રહલાદ પટેલે કહ્યું કે પર્યટન-સંસ્કૃતિના ક્ષેત્ર કોરોનાના કારણે સૌથી વધુ અસરગ્રસ્ત થયેલા સેક્ટર્સ પૈકી એક છે. હોટલ ઇન્ડસ્ટ્રીની રેવન્યૂનો મોટો હિસ્સો ત્યાં મીટિંગ, કોન્ફરન્સ તથા એક્ઝિબિશન જેવા આયોજનોથી મળે છે. કેન્દ્રીય ગૃહ મંત્રીને પત્ર લખીને સૂચન કરાયું છે કે હોટલ્સના બેન્ક્વેટ હૉલ, કોન્ફરન્સ રૂમમાં 50% ક્ષમતામાં લોકોને આમંત્રિત કરીને આયોજનની છૂટ આપવામાં આવે. આ અંગે ગૃહ સચિવ સાથે પણ વાત થઇ છે. તેઓ આ પ્રસ્તાવ અંગે સહમત છે. અનલૉક અંગેના નવા આદેશમાં આ બાબતો સમાવાય તેવી પૂરી આશા છે.

સ્કૂલ સ્થિતિ સામાન્ય થાય ત્યારે જ ખુલશે

દેશભરની સ્કૂલો અને વાલીઓએ રાજ્ય સરકારો દ્વારા કેન્દ્રને મોકલેલા ફીડબેકમાં કહ્યું છે કે સ્કૂલો ખોલવાનો નિર્ણય સ્થિતિ સામાન્ય થયા પછી જ લેવામાં આવે. બાળકોના સ્વાસ્થ્ય અને જીવન સાથે કોઇ પણ પ્રકારની બાંધછોડ કરવાની કે ઉતાવળ કરવાની જરૂર નથી. તેથી અનલૉકની આગામી ગાઇડલાઇનમાં સ્કૂલો અંગે નિર્ણય થવાની શક્યતા ઓછી છે.