શૈક્ષણિક / યુનિવર્સિટીના મોટા છબરડા, એક વિદ્યાર્થીને આપ્યાં 100માંથી 151 માર્ક્સ, બીજો નાપાસ થયો છતા પ્રમોશન

• બિહારની લલિત નારાયણ મિથિલા યુનિવર્સિટીનો છબરડો
• દરભંગાના વિદ્યાર્થીને 100માંથી આપ્યાં 151 માર્ક્સ 
• વિદ્યાર્થીએ ન સ્વીકાર્યા માર્ક્સ, ફરિયાદ લઈને પહોંચ્યો યુનિવર્સિટીમાં 

બિહારમાં એક મોટો શૈક્ષણિક છબરડો સામે આવ્યો છે. મામલો જાણીને તમે પણ માથું પકડી લેશો. જરા કલ્પના કરો કે કોઈ ઉમેદવારને પરીક્ષામાં 100 માંથી 100 માર્ક્સ મળે તો તેની ખુશીનો પાર રહેતો નથી પરંતુ જો કોઈ પરીક્ષામાં વિદ્યાર્થીને 100 માંથી 151 માર્ક્સ મળે તો શું કરવું. 

દરભંગામાં લલિત નારાયણ મિથિલા યુનિવર્સિટીનો છબરડો 
દરભંગામાં લલિત નારાયણ મિથિલા યુનિવર્સિટીના બીએના એક વિદ્યાર્થી સાથે આવી ઘટના બની છે. યુનિવર્સિટીએ એક વિદ્યાર્થીને 100માંથી 151 માર્ક્સ આપી દીધા હતા. 

પોલિટિકલ સાયન્સના પેપરમાં 100માંથી 151 માર્ક્સ મળ્યાં 
લલિત નારાયણ મિથિલા યુનિવર્સિટીમાંથી બીએ (ઓનર્સ) કરી રહેલા આ વિદ્યાર્થીએ જણાવ્યું હતું કે માર્કશીટ પર જ્યારે તેણે તેનું પરિણામ જોયું તો તેને આશ્ચર્ય થયું હતું. પોલિટિકલ સાયન્સના પેપરમાં તેમને 100માંથી 151 માર્ક્સ આપવામાં આવ્યા હતા, જે દેખીતી રીતે જ સાચા ન હોઈ શકે. 

યુનિવર્સિટીએ ભૂલ સ્વીકારી, નવી માર્કશીટ કાઢી આપી 
100 માંથી 151 માર્ક્સ કેવી રીતે મળી શકે તે વિદ્યાર્થીની સમજમાં આવતું નહોતું જોકે તેને ખબર પડી ગઈ હતી કે યુનિવર્સિટીની ક્યાંય ભૂલ થઈ છે તોજ આવું બની શકે, આથી વિદ્યાર્થી પોતાની માર્કશીટ લઈને યુનિવર્સિટી પહોંચ્યો અને ત્યાંના અધિકારીઓને માર્કશીટ દેખાડી. આ જોઈને અધિકારીઓ પણ આઘાત પામ્યા હતા અને વિદ્યાર્થીને બીજી માર્કશીટ બનાવી આપી હતી. અધિકારીઓએ સ્વીકાર્યું છે કે ટાઈપો એરરને કારણે આવું થયું હતું. 

બીકોમના સ્ટુડન્ટને શુન્ય માર્ક્સ મળ્યાં છતા ઉપલા વર્ગમાં ચડાવાયો 
બીકોમના એક સ્ટુડન્ટ સાથે પણ આવું જ કંઇક થયું. તેને એક પરીક્ષામાં શૂન્ય માર્ક્સ મળ્યા હતા, છતાં પણ તેને ઉપલા વર્ગમાં ચડાવી દેવામાં આવ્યો હતો. યુનિવર્સિટીના રજિસ્ટ્રાર મુશ્તાક અહેમદે જણાવ્યું હતું કે, બંને કિસ્સામાં વિદ્યાર્થીઓની માર્કશીટમાં ટાઇપિંગની ભૂલોને કારણે ભૂલ થઇ છે. આ ભૂલોને સુધાર્યા બાદ બંને વિદ્યાર્થીઓને નવી માર્કશીટ આપવામાં આવી છે. મુસ્તાક અહેમદે વધુમાં કહ્યું કે, આ માત્ર ટાઇપિંગની ભૂલ છે, બીજું કંઇ નહીં.