રાજ્યમાં છેલ્લા 24 કલાકમાં સાર્વત્રિક વર્ષા હવામાન વિભાગે ભારે વરસાદની કરી આગાહી...

ગાંધીનગરઃ રાજ્યમાં વરસાદની બીજી વાર થયેલી પધરામણીમાં સાર્વત્રિક વરસાદ જોવા મળ્યો હતો. રાજ્યમાં 24 કલાક દરમિયાન વઘઈમાં 7 ઈંચ વ્યારામાં 5.5 ઈંચ વાલોદમાં 5.5 ઈંચ ડોલવણમાં 4 ઈંચ મહુવા અને બારડોલીમાં ચાર ચાર ઈંચ સોનગઢમાં 3.5 ઈંચ ચોર્યાસીમાં 3.5 ઈંચ કપરાડા અને પલસાણામાં 3 ઈંચ ઉમરપાડામાં 3 ઈંચ અને સુબીરમાં 2.5 ઈંચ વરસાદ નોંધાયો હતો. જો કે હાલ રાજ્યના કેટલાંક વિસ્તારમાં વરસાદનું જોર થોડુ ઓછું પડ્યુ છે અને કેટલાંક વિસ્તારમાં છૂટોછવાયો વરસાદ જોવા મળ્યો છે.

કેચમેન્ટ એરિયામાં વરસાદથી ઉકાઈ ડેમની સપાટીમાં વધારો
તાપી જિલ્લામાં મોડીરાતથી જ વરસાદી માહોલ સર્જાયો છે. મોડીરાતથી જ અહીં છૂટછવાયો વરસાદ વરસી રહ્યો છે. કેચમેન્ટ વિસ્તારમાં વરસાદના પગલે ઉકાઈ ડેમની સપાટીમાં પણ વધારો થયો છે. ઉકાઈ ડેમની સપાટીમાં છેલ્લાં ચાર દિવસમાં પાંચ ફૂટનો વધારો થયો છે. પાંચ ફૂટનો વધારો થતા ડેમની સપાટી હાલ 305 ફૂટે પહોંચી છે. ડેમમાં કુલ 22 હજાર 769 ક્યૂસેક પાણીની આવક થઈ છે અને 600 ક્યૂસેક પાણી છોડવામાં આવ્યું છે.

હવામાન વિભાગની આગાહી...
મહત્વનું છે કે હવામાન વિભાગ દ્વારા દક્ષિણ ગુજરાતમાં આગામી 5 દિવસમાં ભારે વરસાદની આગાહી કરવામાં આવી હતી. ધરમપુર અને કપરાડાના જંગલ વિસ્તારમાં પડેલ રહેલા ભારે વરસાદથી જિલ્લાની તમામ નદીઓ હાલ બે કાંઠે વહી રહી છે. ધોધમાર વરસાદના પગલે ઔરંગા કોલક અને દમણ ગંગા નદીમાં ઘોડાપૂર આવ્યું હતું. નદીમાં પૂર આવતા ખેડૂતોમાં ખુશીનો માહોલ છવાયો છે. મુખ્ય પાક ડાંગર અને શેરડીના પાકને લાંબા સમય બાદ પાણી મળતા ખેડૂતોએ હાશકારો અનુભવ્યો છે.

ગુજરાતના 14 જિલ્લામા 30 ટકાથી વધુ વરસાદની ધટ
હવામાન વિભાગનું માનીએ તો સૌરાષ્ટ્ર અને દક્ષિણ ગુજરાત તેમજ મધ્ય ગુજરાતમાં ભારે વરસાદ થઈ શકે છે. મહત્વનું છે કે ગત વર્ષની સરખામણીએ રાજ્યમાં ઘણો ઓછો વરસાદ વરસ્યો છે. ગુજરાતના 14 જિલ્લામાં 30 ટકાથી વધુ વરસાદની ઘટ છે. પાટણમાં સૌથી વધુ 60 ટકા વરસાદની ઘટ છે. તો કચ્છમાં 57 ટકા વરસાદની ઘટ છે. ચોમાસાની ચાલુ સિઝનમાં અમદાવાદમાં અત્યાર સુધી 8.85 ઈંચ વરસાદ પડયો છે.