હાલ વૈશાખ મહિનો ચાલી રહ્યો છે. સ્વાભાવિક છે કે, વૈશાખ મહિનો એટલે કે, લગ્નનો મહિનો. આ મહિનામાં હજારો યુગલો લગ્નના તાંતણે બંધાય છે. પરંતુ આ મહામારીના કારણે લાગેલા લોકડાઉનમાં હજારો લગ્નોના મુહૂર્ત જતા રહ્યા છે. પરંતુ સુરતના એક યુગલે પોતાના લગ્નનું મુહૂર્ત છાતરવા ન દીધું. મુહૂર્ત પ્રમાણે જ લગ્ન કર્યાં પરંતુ અનોખી રીતે...
લોકડાઉન વચ્ચે સુરતમાં અનોખા લગ્ન
નવ દંપતિએ લોકડાઉનના પાલન સાથે કર્યા લગ્ન
વર પક્ષના 5 અને કન્યા પક્ષના 5 લોકો રહ્યા હાજર
નવાઈ લાગી હશે કે ભાઈ આ લોકડાઉનના માહોલમાં તો કાંઈ લગ્ન શક્ય હોતા હશે. પરંતુ આ માનવી ધારે તો બધું જ થઈ શકે છે. સુરતના ડિંડોલી વિસ્તારમાં અનોખા લગ્ન યોજાયા હતા. જેમાં માત્ર 10 લોકો જ હાજર છે. 5 લોકો વર પક્ષના અને 5 લોકો કન્યા પક્ષના છે.
તે પણ સંપૂર્ણ સુરક્ષા સાથે. મોઢા પર માસ્ક, હાથમાં ગ્લોવ્ઝ, સેનિટાઈઝનો ઉપયોગ, સોશિયલ ડિસ્ટન્સિંગનું સંપૂર્ણ પાલન. વર અને વધુ પણ સોશિયલ ડિસ્ટન્સિંગનું પાલન કરતા નજરે પડે છે. આ પ્રકારના લગ્ન વિશે તો ભાગ્યે જ કોઈએ વિચાર્યું હશે. પરંતુ સુરતના આ બંને પરિવારોએ તે કરીને બતાવ્યું છે.
મહત્વનું છે કે, આ લગ્નમાં લોકડાઉનના દિશા નિર્દેશનું પણ પાલન કરવામાં આવ્યું છે. જેથી કરીને કાયદાની અવમાનના પણ ન થાય. આ લગ્ન સંપૂર્ણ વિધી-વિધાન સાથે યોજાયા. જે માટે પંડિતને પણ હાજર રખાયા હતા. જોકે આ રીતે લગ્ન કરવા પડશે તેવું તો આ યુગલે કે તેમના પરિવારે પણ વિચાર્યું નહોતું. પરંતુ કોરોનાના સંકટ વચ્ચે પણ આ રીતે કાયદાના પાલન સાથે લગ્ન કરી આ યુલગે એ સંદેશ આપ્યો છે કે, માહોલ કોઈપણ પ્રકારનો હોય. જો માણસ ધારે તો બધું જ થઈ શકે છે.