કચ્છના આ શિક્ષક કોરોનાકાળમાં પ્રાથમિક શાળાઓ બંધ છે ત્યારે દીપકભાઈ મોતાએ સ્વખર્ચે ડિજિટલ મોબાઈલ સ્કૂલનો પ્રયોગ કરી બાળકોને શિક્ષણ આપવાનો અનોખો સેવાયજ્ઞ શરૂ કર્યો
શિક્ષકનો સરાહનીય પ્રયાસ
શાળા જાય છે બાળકો પાસે
વિદ્યાર્થીઓને ઘર આંગણે જ આપે છે શિક્ષણ
સજ્જતા કસોટીના વિવાદ વચ્ચે આજે આપને એક એવા શિક્ષકની મુલાકાત કરાવવી છે. જેની કામગીરી જોઈને કદાચ સરકારના મનના વહેમ દૂર થઈ જશે. એક એવા શિક્ષકથી આપને રુબરું કરાવવા છે જેમની એક પહેલને હવે રાજ્યભરમાં આવકાર મળ્યો છે. આપણે જાણીએ છીએ કે, બાળકો શાળાએ જઈ શકતા નથી પણ શિક્ષકો તો બાળકોના દ્વારે આવી શકે છે. આવા હેતુ સાથે કચ્છનાં એક નાનકડા ગામના શિક્ષકે ઇ-બાઇસાઇકલ દ્વારા ડિજિટલ શાળા બનાવી અને તેને શિક્ષણ રથ નામ આપ્યું. જે શિક્ષણ રથ બાળકો સુધી જ્ઞાનનો ભંડાર લઈ પહોંચે છે. કેવી રીતે આવો જોઈએ આ રિપોર્ટમાં..
‘શિક્ષક કભી સાધારણ નહીં હોતા પ્રલય ઓર નિર્માણ ઉસકી ગોદ મે પલતે હે’, ચાણક્યની આ ઉક્તિને માંડવી તાલુકાના હુંદરાઈ બાગ પ્રાથમિક શાળાના શિક્ષક દીપકભાઈ મોતાએ યથાર્થ સાબિત કરી છે. કોરોનાકાળમાં પ્રાથમિક શાળાઓ બંધ છે ત્યારે દીપકભાઈ મોતાએ સ્વખર્ચે ડિજિટલ મોબાઈલ સ્કૂલનો પ્રયોગ કરી બાળકોને શિક્ષણ આપવાનો અનોખો સેવાયજ્ઞ શરૂ કર્યો છે. ડિજિટલ મોબાઈલ સ્કૂલ માટે દીપકભાઈએ એક ઈ-બાઈસીકલ પણ તૈયાર કરી છે જે સૌ કોઈ માટે આકર્ષણનું કેન્દ્ર બની છે. કારણ કે, આજ ઈ-બાઈસીકલ દ્વારા દીપકભાઈ શાળાના પ્રાંગણમાંથી જ્ઞાનના ભંડાર સાથે નિકળે છે. અને ગામના છેવાડા સુધી જઈને વિદ્યાર્થીઓને શિક્ષણ પુરું પાડે છે.
મહત્વનું છે કે, ગ્રામ્ય વિસ્તારમાં ચોમાસા દરમિયાન વાડી વિસ્તારમાં રહેતા લોકો સુધી ક્યારેક મોટા વાહન લઈને પહોંચવું મુશ્કેલ હોય છે. ત્યારે દીપકભાઈએ વાડી વિસ્તારમાં રહેતા બાળકો શિક્ષકની વંચિત ના રહે અને તેઓ સુધી આસાનીથી પહોંચી શકાય તે માટે એક ઈ-બાઈસીકલ તૈયાર કરી છે. જેના માધ્યમથી તે આસાનીથી ગમે તે વિસ્તારમાં અવરજવર કરી શકે છે. કોરોના મહામારીના સમયગાળામાં શાળા, કોલેજોમાં શૈક્ષણિક કાર્યો બંધ હતા અને હાલ ચાલુ થયા છે પરંતુ હજી પણ કોરોના સંપૂર્ણપણે ગયો નથી. આ કારણે વિદ્યાર્થીઓના સ્વાસ્થ્યને ધ્યાનમાં રાખીને મસ્કા ગામના શિક્ષકને બાળકોને તેમના ઘરે જઈને શિક્ષણ આપવું તેવો વિચાર આવતા તેમણે હરતી-ફરતી ડિજિટલ મોબાઇલ શાળા બનાવી છે. જેનો પ્રારંભ બાગ ગામની હુંદરાઇબાગ પ્રાથમિક શાળાથી કરવામાં આવ્યો હતો. જોકે તેમના આ પ્રયોગને શાળાના આચાર્ય સહિત ગ્રામજનોએ પણ બિરદાવ્યો છે.