માનવતા / ઊંઝામાં અનોખી સેવા : 15 વર્ષથી રોજ 3400થી વધુ રોટલા મુંગા પશુઓ માટે બને છે, લિમ્કા બુક ઓફ રેકોર્ડમાં નોંધ

• ઊંઝામાં પશુઓ માટે ચાલે છે રોટલા ઘર 
• 15 વર્ષથી રોજ 3400થી વધુ રોટલા બને છે 
• જહુમાતા પરિવાર ચલાવે છે રોટલા ઘર 

મહેસાણાના ઊંઝા ખાતે એક અન્નક્ષેત્ર ચાલે છે. જેને રોટલા ઘર પણ કહેવામાં આવે છે. આ રોટલા ઘરમાં સેવાના ભાવે બનતા રોટલાને જોઈને તમને ગર્વ પણ થશે. પરંતુ નવાઈની વાત એ છે કે, આ રોટલા માનવી માટે નથી બની રહ્યા પરંતુ મુંગા પશુઓ માટે બની રહ્યા છે. 

આ અનોખા અન્નક્ષેત્રને ઊંઝાના જહુમાતા પરિવાર સેવા ટ્રસ્ટ દ્વારા ચલાવવામાં આવી રહ્યું છે. તે પણ છેલ્લા 15 વર્ષથી ચાલે છે. આ અન્નક્ષેત્રમાં રોજ 3400 રોટલા તૈયાર થાય છે. આ રોટલા ઊંઝા તાલુકામાં અબોલ પશુઓના મુખ સુધી પહોંચાડવામાં આવે છે. આ અન્નક્ષેત્ર સાથે 595 મહિલાઓ સ્વૈચ્છીક રીતે જોડાયેલી છે. જ્યારે 253 લોકો રોટલા વિતરણ માટે જોડાયેલા છે. નવાઈની વાત તો એ છે કે, આ સ્થળે ન તો કોઈ પાસે દાન માગવામાં આવે છે કે ન તો દાન માટેની આશા રાખવામાં આવે છે.

આપણે ત્યાં માનવસેવા તો ખુબ થાય છે. પરંતુ આ પ્રકારની સેવા થતી હોય તેવો આ પહેલો કિસ્સો છે. આ પ્રકારની જો કોઈ સેવા કરતું હોય તો સ્વાભાવિક રીતે તેની નોંધ પણ લેવાય. જહુમાતા પરિવાર સેવા ટ્રસ્ટની આ સેવાની નોંધ લેવાઈ અને આ ટ્રસ્ટને લિમ્કા બુક ઓફ રેકોર્ડમાં સ્થાન મળ્યું છે. જોકે દુઃખની વાત એ છે કે, આ અન્નક્ષેત્રને શરૂ કરનાર નિવૃત તલાટી આજે આ દુનિયામાં હયાત નથી. પરંતુ તેમના દ્વારા શરૂ કરવામાં આવેલું આ સેવાકાર્ય આજે પણ વટવૃક્ષ બનીને ચાલી રહ્યું છે.