લુણાવાડામાં કોંગ્રેસના ઉમેદવારનો અનોખો પ્રચાર; ગુલાબસિંહ ચૌહાણ ઘોડા પર બેસીને પ્રચાર કરી રહ્યા છે.
લુણાવાડામાં કોંગ્રેસના ઉમેદવારનો અનોખો પ્રચાર
કોંગ્રેસ ઉમેદવાર ગુલાબસિંહ ચૌહાણની અશ્વ સવારી
ગળામાં ફૂલહાર, સફેદ ઘોડી પર પ્રચાર
રાજ્યમાં મતદાનનો પ્રથમ તબક્કો રંગે ચંગે પૂરો થઈ ગયો એટલે હવે મતદાન માટેનો જંગ બીજા કોઠામાં પહોંચી ગયો છે. હવે બે દિવસ બાદ મધ્ય ગુજરાત અને ઉત્તર ગુજરાતની વિધાનસભા બેઠકો માટે મતદાન થશે. જો કે, તે પહેલા લોકો સુધી પહોંચવા માટે ઉમેદવારો ભારે જહેમત કરી રહ્યા છે. આમ તો મતદાર સુધી પહોંચવા કોઈ ઝડપી વાહન જોઈએ. પરંતુ મહિસાગરના લુણાવાડામાં કોંગ્રેસના ઉમેદવાર ઘોડા પર બેસીને પ્રચાર કરી રહ્યા છે.
ઘોડા પર બેસીને પ્રચાર
ઉમેદવારની આમ તો આ ઉંમર ઘોડે ચડવાની નથી. કેમ કે, છોકરાઓને પરણાવી તેમને ઘોડા ચડાવવાની છે. પરંતુ શું કરે? મજબૂરી જ કંઈક એવી છે. આ નેતા ચૂંટણી ઉમેદવાર બન્યા છે એટલે મતદારોને આકર્ષવા માટે કંઈકને કંઈક નવું કરવું પડે છે. જોકે, ઉમેદવારની ઇચ્છા ન હોય તો વળી મતદારો ઉમેદવારને પરાણે ઘોડે ચડાવી દે છે. મહિસાગર જિલ્લાના લુણાવાડામાં કોંગ્રેસ ઉમેદવાર ગુલાબસિંહ ચૌહાણ છે. તેમનું હાલ પ્રચાર અભિયાન ચાલી રહ્યું છે તેઓ મતદારોને આકર્ષવા અશ્વ પર બેસીને પ્રચાર કરી રહ્યા છે. ફોટ જાઈએ તો લાગે કે, આ કોઈ વરરાજાનું ફૂલેકું નીકળ્યું કેમ કે આગળ વરરાજા અને પાછળ ગામલોકો જઈ રહ્યા છે. સાથે ડીજેનો પણ વાગી રહ્યો છે. ડીજેના તાલે ગામના ચોકથી શરૂ થયેલી આ અશ્વસવારી ખેતર અને વાડી પસાર કરતી આગળ વધી હતી. સ્થાનિક યુવાનો ઉમેદવારની અશ્વસવારીની ક્ષણને કેમેરામાં કંડારી રહ્યા છે.
ગુલાબસિંહ ચૌહાણની અશ્વસવારી
કોંગ્રેસી ઉમેદવાર ગુલાબસિંહ ચૌહાણની અશ્વ સવારી લુણાવાડાના બીજા વિસ્તાર સુધી પહોંચી હતી જ્યાં તો જાણે મતદારો અને ઉમેદવારો સાથે અશ્વને પણ તાન ચડ્યું છે. ડીજેના તાલે અશ્વ પણ ઝૂમવા લાગ્યો હતો. ફરતે ફરતે ગામ લોકો અને વચ્ચે અશ્વ ઝૂમતા ઉમેદવાર ગુલાબસિંહને જાણે મતદારોને આકર્ષવાની સરસમજાની તક મળી ગઈ છે. ગળામાં ફૂલહાર, સફેદ ઘોડી અને સફેદ અસવાર એવા તો એકતાન થઈ રહ્યા છે કે, જોનારા પણ બે ઘડી પક્ષાપક્ષીનું રાજકારણ ભૂલી જાય કંઈક અલગ વિચારી લે. ત્યારે જોવાનું એ રહેશ કે ગુલાબસિંહની આ અશ્વસવારી કેટલી જીતની મજલ કાપી શકે છે નહીં.