ગાંધીનગર: ગુજરાતમાં મેટ્રોની જોરશોરથી કામગીરી ચાલી રહી છે. ત્યારે મેટ્રોના કામ સાથે જોડાયેલા 55 જેટલા વેપારીઓ મેટ્રોની ઓફિસમાં પહોંચ્યા હતા. છેલ્લા 1 વર્ષથી પેમેન્ટ ન મળતા વેપારીઓ ગાંધીનગર પહોંચ્યા હતા. મટીરીયલ સપ્લાય ન કરવાની વ્યાપારીઓએ ચીમકી ઉચ્ચારી હતી.
ઉલ્લેખનીય છે કે આગામી દિવસોમાં પેમેન્ટ નહીં કરવામાં આવે તો મટીરીયલ સપ્લાય ન કરવાની ચીમકી ઉચ્ચારી હતી. આ મામલે મળતી માહિતી મુજબ IL અને FS દ્વારા વેપારીઓને ટેન્ડર આપવામાં આવ્યા હતા. 55 વેપારીઓના 38 કરોડ રૂપિયા ન ચૂકવવામાં આવતા વેપારીઓ ગાંધીનગરમાં મેટ્રોની ઓફિસમાં રજૂઆત કરવા માટે પહોંચ્યા હતા.
એક તરફ રાજ્ય સરકાર પોતાના ડ્રીમ પ્રોજેક્ટને ઝડપથી પૂર્ણ કરવા માટે કમરકસી રહી છે તો આ તરફ પ્રથમ ફેઝનું કામ પણ અંતિમ ચરણોમાં ચાલી રહ્યું છે અને આગામી જાન્યુઆરીમાં દેશના વડાપ્રધાન નરેન્દ્ર મોદી મેટ્રોને લીલીઝંડી આપવા આવવાના હોવાની ચર્ચા સાંભળવા મળી રહી છે.
ત્યારે આજરોજ મેટ્રોના કામ સાથે જોડાયેલા 55 જેટલા વેપારીઓ ગાંધીનગર સ્થિત મેટ્રોની ઓફિસે પહોંચ્યા હતા અને છેલ્લા કેટલાક સમયગાળાથી પેમેન્ટ અંગે થતાં પ્રશ્ન અંગે ચર્ચા કરી હતી. આ સાથે જ આગામી ટૂંકા સમયગાળામાં જો પેમેન્ટ નહીં ચૂકવાય તો મટીરીયલ સપ્લાય ન કરવાની ચીમકી ઉચ્ચારી હતી.