ભાજપે અખિલેશ યાદવ સામે કરહલ બેઠક પર એસ પી સિંહ બઘેલને મેદાનમાં ઉતાર્યા છે. એસ પી સિંહ બઘેલ એક સમયે મુલાયમ સિંહ યાદવના સુરક્ષા અધિકારી હતા. આ ઉપરાંત તેઓ યુપી સરકારમાં મંત્રી પણ રહી ચૂક્યા છે. ભાજપ તરફથી કોઇ સત્તાવાર જાહેરાત કરવામાં આવી નથી, પરંતુ અખિલેશે ઉમેદવારી પત્ર ભર્યા બાદ એસપી સિંહ બઘેલ પણ ઉમેદવારી નોંધાવવા માટે કલેક્ટર કચેરી પહોંચ્યા હતા.
ભાજપના ઉમેદવાર હારી જશે-અખિલેશ
આ પહેલા અખિલેશ યાદવે કરહલ બેઠક પરથી ઉમેદવારી પત્ર ભર્યું હતું. આ દરમિયાન જ્યારે તેમને ભાજપના ઉમેદવાર વિશે પૂછવામાં આવ્યું તો તેમણે કહ્યું કે, "ભાજપ આ બેઠક પરથી કોઇને પણ ટિકિટ આપશે, તે હારી જશે."
આગરાના સાંસદ બઘેલ
કેન્દ્રીય મંત્રી એસપી સિંહ બઘેલ આગ્રાના સાંસદ છે અને તેઓ ઈટાવાના છે. તેઓ એસસી જાતિમાંથી આવે છે. બઘેલ 1998, 1999 અને 2004માં સપાની ટિકિટ પર જીતીને સાંસદ બન્યા હતા. ત્યારબાદ તેમને એસપીમાંથી હાંકી કાઢવામાં આવ્યા હતા. ત્યારબાદ બઘેલે 2009 અને 2014માં બસપામાંથી ચૂંટણી લડી હતી અને તેમને હારનો સામનો કરવો પડ્યો હતો. બઘેલ રાજ્યસભાના સાંસદ પણ હતા.