ગુરુવારનો દિવસ દેશ માટે ખૂબ જ ગૌરવપૂર્ણ દિવસ હતો. દેશમાં સ્વદેશી ટેલિકોમ સાધનો દ્વારા બનાવવામાં આવેલું 5G નેટવર્કનું સફળતાપૂર્વક પરીક્ષણ કરવામાં આવ્યું છે.
દેશવાસીઓ માટે ખુશખબર
દેશમાં 5G નેટવર્કની સફળ રહ્યું પરીક્ષણ
ટેલિકોમ મંત્રીએ 5જી કોલ કર્યો હતો
ગુરુવારનો દિવસ દેશ માટે ખૂબ જ ગૌરવપૂર્ણ દિવસ હતો. દેશમાં સ્વદેશી ટેલિકોમ સાધનો દ્વારા બનાવવામાં આવેલું 5G નેટવર્કનું સફળતાપૂર્વક પરીક્ષણ કરવામાં આવ્યું છે. કેન્દ્રીય ટેલિકોમ મંત્રી અશ્વિની વૈષ્ણવે ઇન્ડિયન ઇન્સ્ટિટ્યૂટ ઑફ ટેક્નોલોજી મદ્રાસ (IIT મદ્રાસ) ખાતે સ્થાપિત ટ્રાયલ નેટવર્કમાંથી પ્રથમ 5G કૉલ કર્યો હતો. જણાવી દઈએ કે, વડાપ્રધાન નરેન્દ્ર મોદીએ મંગળવારે દેશના પ્રથમ 5G ટેસ્ટ-બેડનું ઉદ્ઘાટન કર્યું હતું.
વડાપ્રધાનનું વિઝન સાકાર થયું
તેને IIT મદ્રાસની આગેવાની હેઠળની કુલ આઠ સંસ્થાઓ દ્વારા બહુ-સંસ્થા સહયોગી પ્રોજેક્ટ તરીકે વિકસાવવામાં આવ્યો છે. વૈષ્ણવે ઈન્ટરનેટ મીડિયા પર એક પોસ્ટમાં કહ્યું કે, આત્મનિર્ભર 5G. IIT મદ્રાસ ખાતે 5G કૉલનું સફળતાપૂર્વક પરીક્ષણ કરવામાં આવ્યું હતું. સમગ્ર નેટવર્ક ભારતમાં ડિઝાઇન અને વિકસાવવામાં આવ્યું છે. ટેલિકોમ મંત્રીએ સ્વદેશી રીતે વિકસિત 5G ટેક્નોલોજી ઉપકરણો પર વિડિયો કોલ કર્યા પછી કહ્યું કે, વડાપ્રધાનનું વિઝન સાકાર થયું છે.
વૈષ્ણવે કોલ પછી કહ્યું કે, તેમનું (વડાપ્રધાનનું) વિઝન આપણું પોતાનું 4G, 5G ટેક્નોલોજી ઈન્ફ્રાસ્ટ્રક્ચર છે, જે ભારતમાં વિકસિત છે, ભારતમાં બનેલું છે અને વિશ્વ માટે બનાવેલું છે. આપણે આ બધી ટેક્નોલોજી વડે દુનિયા જીતવી છે. સરકારને આશા છે કે, આ વર્ષે ઓગસ્ટ-સપ્ટેમ્બર સુધીમાં દેશમાં 5G સેવાઓ ઔપચારિક રીતે શરૂ થઈ જશે.
કેન્દ્રીય મંત્રી અશ્વિની વૈષ્ણવે કહ્યું કે, અમને IIT-મદ્રાસની ટીમ પર ગર્વ છે, જેણે 5G ટેસ્ટ પેડ વિકસાવ્યું છે, જે સમગ્ર 5G વિકાસ ઇકોસિસ્ટમ અને હાઇપરલૂપ પહેલ માટે વિશાળ તક પૂરી પાડશે. રેલ્વે મંત્રાલય હાઈપરલૂપ પહેલને સંપૂર્ણ સમર્થન આપશે.
અર્થતંત્રને મજબૂતી મળશે
મંગળવારે, ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) ના રજત જયંતિ સમારોહને સંબોધિત કરતી વખતે, વડાપ્રધાન મોદીએ કહ્યું કે, 5G ટેક્નોલોજી ભારતીય અર્થતંત્રમાં યુએસ $ 450 બિલિયનનું યોગદાન આપશે. આનાથી માત્ર ઈન્ટરનેટની સ્પીડ જ નહીં પરંતુ વિકાસ અને રોજગારને પણ વેગ મળશે.
આત્મનિર્ભર ભારત તરફનું સીમાચિહ્નરૂપ
બીજી તરફ કેન્દ્રીય મંત્રી પીયૂષ ગોયલે બુધવારે કહ્યું કે, ભારત ડિજિટલ સેક્ટરને જરૂરી પ્રોત્સાહન આપી રહ્યું છે. તે પહેલાથી જ ઇચ્છિત પરિણામો આપવાનું શરૂ કરી દીધું છે. ડિજિટલ ઈન્ડિયા અભિયાન આગામી પેઢીના ભારત માટે માઈલસ્ટોન બની ગયું છે. આગામી 15 વર્ષમાં 5G ભારતીય અર્થવ્યવસ્થામાં મોટો ફાળો આપશે. તેમણે એમ પણ કહ્યું હતું કે, સ્વદેશી 5G ટેસ્ટબેડનું લોન્ચિંગ ટેલિકોમમાં આત્મનિર્ભર ભારતની દિશામાં એક સીમાચિહ્નરૂપ સાબિત થશે.