Budget 2019 / બજેટ પહેલાં બેરોજગારી મામલે મોદી સરકારની મુસીબત વધી, રિપોર્ટ આવ્યો બહાર

સીએમઆઇઇનાના નવા રિપોર્ટ અનુસાર, આ વર્ષે જૂનમાં બેરોજગારીનો આંકડો 33 મહિનાનો સૌથી ઊંચી સપાટીએ પહોંચ્યો છે. તમને જણાવીએ કે, મોદી સરકારના બીજા કાર્યકાળનો આ પ્રથમ મહિનો છે. નરેન્દ્ર મોદીની આગેવાની હેઠળ એનડીએ સરકારનું ગઠન 30 મે'ના રોજ થયું હતું.

બેરોજગારીનો આંકડો 33 મહિનાનો સૌથી ઊંચી સપાટીએ

સીએમઆઇઇનાના અહેવાલ અનુસાર, આ વર્ષે જૂનમાં બેરોજગારીનો દર વધીને 7.91 ટકા થયો છે. આ અગાઉ સપ્ટેમ્બર 2016માં બેરોજગારીનો દર આ સ્તરે હતો. જ્યારે એક વર્ષ પહેલાં જૂન 2018માં બેરોજગારીનો દર 5.8 ટકા હતો, અને મે 2019માં આ આંકડો 7.2 ટકા હતો. જો રોજગાર દરના આંકડા વિશે વાત કરીએ તો, જૂન 2019માં તે 39.42 ટકા હતો.

રોજગાર દરના આંકડા

જાન્યુઆરી 2016 પછી રોજગાર દર સૌથી નીચા સ્તરે છે. સીએમઆઇઇના રિપોર્ટ અનુસાર, જૂનનાં પહેલા સપ્તાહમાં બેરોજગારીનો દર 9 ટકા હતો, જોકે ત્યારબાદ ઘટાડો શરૂ થયો. મહિનાના છેલ્લા અઠવાડિયામાં તે 7 ટકા ઘટ્યો છે. અહેવાલ અનુસાર 2019-20ના પ્રથમ ત્રણ મહિનામાં રોજગાર દર 39.6 ટકા હતો. 2016થી રોજગારીનો આ સૌથી નીચો દર છે. માર્ચ 2019ના ત્રણ મહિના દરમિયાન રોજગારીનો દર 39.7 ટકાથી વધીને 39.9 ટકા થયો છે.

સરકારે આંકડાઓને ભ્રામક બતાવ્યા

આ અહેવાલ એવા સમયે આવ્યો છે જ્યારે સરકારે સેન્ટ્રલ સ્ટેટિસ્ટિક્સ ઑફિસ (સીએસઓ)ના તાજેતરના બેરોજગારીના આંકડાઓને ભ્રામક બતાવ્યા છે. તાજેતરમાં શ્રમ મંત્રી (સ્વતંત્ર ચાર્જ) સંતોષ ગંગવારે સંસદમાં જણાવ્યું હતું કે, સરકાર ટૂંક સમયમાં જ બેરોજગારીનો દર જાહેર કરશે.

મહત્વનું છે કે, સંસદમાં કોંગ્રેસ લોકસભાના સભ્ય અદૂર પ્રકાશે દેશમાં બેરોજગારીના ઊંચા દર વિશે પ્રશ્નો પૂછ્યા હતા. આ પ્રશ્નનો જવાબ આપતા ગંગવારે કહ્યું હતું કે, આ રિપોર્ટ સંપૂર્ણપણે સાચો નથી. તેઓએ કહ્યું, તે બધા ભ્રામક છે. રોજગાર ઊભું કરવું એ સરકારની પ્રાથમિકતા છે. 

તમને જણાવી દઇએ કે, CSOએ બેરોજગારીનો દર 45 વર્ષનાં ઉચ્ચતમ સ્તર પર જણાવ્યો હતો, જોકે સંતોષ ગંગવારે જણાવ્યું હતું કે, પ્રધાનમંત્રી રોજગાર જનરેશન કાર્યક્રમ (PMEGP) હેઠળ 31 માર્ચ 2019 સુધી 5,86,728 નોકરીઓ આપવામાં આવી હતી. જ્યારે પ્રધાનમંત્રી મુદ્રા યોજના (PMMY) હેઠળ માર્ચ સુધી 18.26 કરોડ લોનની વહેંચણી કરવામાં આવી છે.