ગામ ભાંગ્યું / ઉંડેરા ગામને 3 વર્ષથી વડોદરામાં તો ભેળવી દીધું પણ મનપાએ વેરો વસૂલવા સિવાય કંઇ કામ ન કર્યું

• ઉંડેરાના લોકો દ્વારા તંત્ર સામે વિરોધ
• મનપામાં સમાવાયેલુ ઉંડેરા સુવિધા વંચિત 
• ગામમાં કોઈ પણ સુવિધા ના હોવાનો આક્ષેપ

વડોદરા મ્યુનિસિપલ કોર્પોરેશનની હદમાં જોડાયેલા ગામોનો કોર્પોરેશનમાં સમાવેશ કર્યા પછી વિકાસના નામે ઓરમાયું વર્તન કરાતું હોવાના આક્ષેપ સાથે  ગ્રામજનોએ વહીવટી તંત્ર સામે રીતસર મોરચો માંડ્યો છે. પ્રાથમિક સુવિધા જેવા પણ કોઇ કામ કરવામાં આવતા નથી અને સુવિધાઓ આપ્યા વિના વેરા વસૂલાત માટે બિલો ફટકારવામાં આવે છે. 

વડોદરામાં ઉંડેરા ગામના લોકો દ્વારા તંત્ર સામે વિરોધ કરવામાં આવી રહ્યો છે. ૩ વર્ષ  પહેલાં ઉંડેરા ગામને મનપામાં સમાવેશ કરાયો હતો. જો કે,  ભાયલી મનપાના વોર્ડ 10માં ઉંડેરા ગામનો સમાવેશ કરાયો હતો. સમાવેશ થયા છતાં ઉંડેરા ગામમાં કોઈ પણ સુવિધા ન મળતી હોવાનો આક્ષેપ સાથે ગ્રામજનોએ  વહીવટી તંત્રનો વિરોધ કર્યો છે. 

ઊંડેરા અને સેવાસી પણ કોર્પોરેશનની હદમાં જોડાતા ત્યાં કોર્પોરેશન દ્વારા કોઇ કામો નહીં થતા ગયા અઠવાડિયે કોર્પોરેશન ખાતે દેખાવો કર્યા હતા. આજે ઉંડેરા ગામના રહિશોએ વિવિધ પ્રશ્નો અંગે દેખાવો કરી આવેદનપત્ર આપ્યું હતું, અને અનોખો વિરોધ દર્શાવ્યો હતો. ગંદકી સ્થળે મચ્છર નાશક અગરબત્તી સળગાવી હતી અને વેરા બિલની હોળી કરી હતી. સ્થાનિક કક્ષાએ રોડ-રસ્તા, સ્ટ્રીટ લાઈટ, ડ્રેનેજ જેવી સુવિધાથી ગ્રામજનો વંચિત છે તો બીજી તરફ મસમોટા વેરા વસૂલાતા હોવાની વાટે પણ ગ્રામજનોમાં નારાજગી છે.