પોલીસ તપાસ / તમારે ઘરે આવતો ગેસનો બાટલો અનધિકૃત તો નથીને, પંચમહાલમાં ઝડપાયું OK ગેસ કંપનીનું કૌભાંડ 'GO', જાણો વિગત

• પંચમહાલના કાલોલમાં ઝડપાયું કૌભાંડ
• ગેરકાયદેસર કરતા હતા ગેસ રિફીલ 
• ઓકે ગેસ કંપનીમાં ચાલતુ હતુ કૌભાંડ

કાલોલ તાલુકાના મધવાસ સ્થિત જીઆઇડીસીના એલપીજી ગેસ બોટલ રિફીલિંગ પ્લાન્ટમાં અન્ય કંપનીના ગેસ બોટલ અનઅધિકૃત રીતે રિફીલિંગ કરવાનું કૌભાંડ બહાર આવ્યું છે. પ્રમુખ પેટ્રોલિયમ રિફીલિંગ પ્લાન્ટ ખાતે Okની ગેસ એજન્સીના લાયસન્સ હેઠળ Go ગેસ કંપનીનું રિફિલિંગ કરવાનું કૌભાંડ ગો ગેસ કંપનીની ટીમ દ્વારા ઝડપી તંત્રને જાણ કરવામાં આવી હતી.જે આધારે  જિલ્લા પુરવઠા અને કાલોલ મામલતદારની ટીમે પ્રમુખ પેટ્રોલિયમ માંથી ગો અને ઓકે  બન્ને કંપનીના ૪૦૮ એલપીજી બોટલોનો ૧૧.૫૫ લાખનો જથ્થો સીઝ કરી વધુ તપાસ શરૂ કરી છે.

ઓકે ગેસ કંપની અનઅધિકૃત રિફીલિંગ કરતી હતી
ઉલ્લેખનીય છે કે કોમર્શિયલ ગેસ બોટલ ઇન્ડસ્ટ્રીઝ ઉપરાંત  હોટેલ અને મોટા રસોડામાં પણ ઉપયોગ કરવામાં આવતાં હોય છે જે સંજોગોમાં ક્યારેક લીકેજ અથવા બ્લાસ્ટ થાય ત્યારે જવાબદાર ગો ગેસ કંપની થવાની શકયતાઓને લઈ કંપની સંચાલકો એક્શનમાં આવ્યા છે.

જિલ્લા પુરવઠા અને કાલોલ મામલતદારે કર્યા દરોડા
કાલોલ તાલુકાના મધવાસ સ્થિત જીઆઇડીસી વિસ્તારમાં આવેલી પ્રમુખ પેટ્રોલિયમ એલપીજી ગેસ બોટલ રિફીલિંગ  પ્લાન્ટમાં અનઅધિકૃત રીતે ગો ગેસ કંપનીના કોમર્શિયલ ગેસ બોટલો રિફીલિંગ કરી બજારમાં વેચાણ કરવામાં આવતું હતું. જે આધારે કંપની સંચાલકોએ રેકી કર્યા બાદ તંત્રને જાણ કરી હતી.દરમિયાન  પંચમહાલ જિલ્લા પુરવઠા વિભાગ અને કાલોલ મામલતદારની ટીમે તપાસ હાથ ધરી હતી. તપાસ દરમિયાન પ્રમુખ પેટ્રોલિયમ  કંપનીના ગેસ એજન્સીના લાયસન્સ ધારક પાસે ઓકે બ્રાન્ડના એલપીજી ગેસ બોટલ રિફીલિંગ કરવાનું લાયસન્સ હતું તેમ છતાં તેના દ્વારા  Go ગેસ કંપનીના બોટલ પણ રિફિલિંગ કરવામાં આવતું હોવાનું પણ સ્થળ ઉપર મળી આવ્યું હતું.

૧૧.૫૫ લાખનો મુદ્દામાલ સીઝ 
પુરવઠા નિરીક્ષક અને કાલોલ મામલતદારની ટીમ દ્વારા Go કંપનીના ૨૧ કિલો વજનના ભરેલા  ૧૩ બોટલ, જ્યારે Go કંપનીના ૧૫ કિલો વજનના ૧૩૫ બોટલ ઉપરાંત ખાલી  ૩૯૫ બોટલ મળી આવ્યા હતા .જ્યારે  Ok કંપનીના ૨૧ કિલોના ભરેલા ૫૯ બોટલ મળી આવ્યા હતા જે કબ્જે લઈ ૧૧.૫૫ લાખનો મુદ્દામાલ સીઝ કરવામાં આવ્યો છે. જોકે પ્રમુખ પેટ્રોલિયમના સંચાલક દ્વારા પોતાની પાસે પરમીશન હોવાનું અને ગો ગેસ કંપનીના બોટલ તેઓએ વેચાણ રાખ્યા હોવાનો સ્વ બચાવ કરવામાં આવ્યો હતો 

જીએસટી ચોરીની પણ શક્યતા
આપને જણાવી દઈએ કે તપાસમા ખુલાસા મુજબ ગૉ ગેસ કંપનીના બોટલ રિફીલિંગ કરી સીલ પણ કરવામાં આવતાં હતાં અને રોજિંદા મોટી માત્રામાં ટર્ન ઓવર કરવામાં આવતું હતું.ત્યારે ગો ગેસ એલપીજી ગેસ બોટલ રિફીલિંગ કર્યા બાદ ગ્રાહકોને કેવી રીતે વેચાણ કરવામાં આવતાં હતાં જે પણ એક તપાસનો વિષય છે.જો અનઅધિકૃત રીતે બિલ વિના ગ્રાહકોને ગેસના બોટલ આપવામાં આવતાં હોય તો સરકારના જીએસટીની પણ ચોરી થતી હોવાની શક્યતાઓ નકારી શકાય એમ નથી.