વર્લ્ડકપ ફાઇનલ-2019 ભલે ઇગ્લેંડે જીતી લીધો છે પરંતુ તેના પર સર્જાયેલો વિવાદ હજી સુધી શાંત થવાનું નામ નથી લઇ રહ્યો. રવિવારે જે ફાઇનલ યોજાઇ હતી તેમાં ઇંગ્લેન્ડે જીત પ્રાપ્ત કરી અને ન્યૂઝીલેન્ડની હાર થઇ.
આ મેચમાં ઘણાં દિગ્ગજોએ બાઉન્ડ્રીના આધારે મેચના પરિણામ આવવા પર સવાલો ઉભા કર્યાં. હવે તેમાં ICCના સર્વશ્રેષ્ઠ અમ્પાયર રહી ચૂકેલા સાઇમન ટફેલનું નામ જોડાયું છે. તેમનું માનવું છે કે, ઓવર થ્રો પર ઇગ્લેંન્ડને જે 6 રન મળ્યા હતા તે માત્ર 5 રન હોવા જોઇતા હતા.
ન્યૂઝીલેન્ડના એક અખબાર સાથે વાતચીત કરતા સાઇમન ટફેલે કહ્યું કે, નિયમોના હિસાબથી જોવામાં આવે તો અંપાયરથી ભૂલ થઇ છે. કારણ કે જ્યાં ઇગ્લેંન્ડને 6 રન આપવામાં આવ્યા ત્યાં માત્ર પાંચ રન આપવા જોઇતા હતા. જો કે, તેમણે તેવું પણ કહ્યું કે, સીધી રીતે આ નિર્ણય માટે અમ્પાયરને જ જવાબદાર ઠેરવવા બિલકુલ ખોટું ગણાશે.
ઉલ્લેખનીય છે કે, સાઇમન ટફેલે વધુમાં જણાવ્યું હતું કે, તે સમયે સ્થિતિ ખરેખર નાજુક હતી તેવામાં અમ્પાયરનું ધ્યાન બેટ્સમેન ક્યાં દોડી રહ્યાં છે ત્યાં નહી પરંતુ બોલ ક્યાંથી ઉઠી રહી છે તેના પર હતું. જો કે ટીવી રીપ્લેમાં બેટ્સમેનની દોડ પર તેમનું ધ્યાન ગયું હતું.
આપને જણાવી દઇએ કે, સાઇમન ટફેલની ગણતરી ક્રિકેટની દુનિયાના સૌથી મોટા અમ્પાયરમાં થાય છે, હકીકતમાં હવે તેઓ આંતરરાષ્ટ્રીય મેચોમાં અમ્પાયરીંગ કરતા નથી. પરંતુ ICCની તે કમિટીનો ભાગ છે જે ક્રિકેટના નિયમ બનાવે છે