સમરસતા / લક્ષચંડી મહાયજ્ઞ દરમિયાન મુસ્લિમ બિરાદરોએ કરેલ આ કામ વિશે જાણી તમે પણ કહેશો 'વાહ'

• ઊંઝા ખાતે ભવ્ય લક્ષચંડી મહાયજ્ઞ 
• મુસ્લિમ બિરાદરોએ યાત્રાળુઓ માટે કરી રહેવાની વ્યવસ્થા

આ ઉજવણી દરમિયાન ઉનાવાના મુસ્લીમ બિરાદરો દ્વારા લક્ષ ચંડી મહાયજ્ઞ મહોત્સવમાં દર્શન કરવા માટે આવતા શ્રધ્ધાળુઓ માટે વિના મૂલ્ય 32 જેટલી હોટલમાં રોકાણ કરવાની અને ચા-નાસ્તો આપવાની સેવા કરી આપવામાં આવી છે. 

સતત પાંચ દિવસ સુધી નિ:શુલ્ક રહેવાની સગવડ

નોંધનીય છે કે, લક્ષચંડી મહાયજ્ઞ મહોત્સવમાં દર્શન કરવા આવતા દર્શનાર્થીઓની માટે તા. 18 ડિસેમ્બરથી તા. 22 ડિસેમ્બર સુધી રહેવાની સગવડ મુસ્લીમ બિરાદરો દ્વારા પૂરી પાડવામાં આવેલી છે. અહીં દર્શને આવતા તમામ ભક્તો એકપણ રૂપિયો ચૂકવ્યા વગર જ પાંચ દિવસ સુધી હોટલમાં રહી શકશે. 

એક હોટલમાં 3000 શ્રદ્ધાળુ રહી શકે તેવી વ્યવસ્થા 

કોમી એકતાના આ ઉદાહરણ સ્વરૂપે સેવા આપી રહેલા મુસ્લિમ બિરાદરો વતી મીરાદાતાર ટ્રસ્ટના કર્તાહર્તા સૈયદ વારીસઅલી અહેમદઅલીએ જણાવ્યું હતું કે દરેક હોટલમાં 3000 થી વધુ શ્રદ્ધાળુઓને રોકાવા માટેની વ્યવસ્થા કરવામાં આવી છે. 

ચા નાસ્તાની વ્યવસ્થા પણ મુસ્લિમ બિરાદરો દ્વારા કરવામાં આવી 

જેના માટે યાત્રીઓ પાસેથી કોઈપણ પ્રકારનો ચાર્જ લેવામાં આવતો નથી. આ ઉપરાંત મીરાંદાતાર દરગાહ સામે પણ એક સેવા કેમ્પ ઉભો કરાયો છે જેમાં સતત ચોવીસ કલાક ચા નાસ્તાની વ્યવસ્થા ઉભી કરવામાં આવી છે. 

800 વિઘા જમીન તૈયાર કરાયું ઉમિયાનગર 

ઊંઝા ખાતે યોજાઈ રહેલા લક્ષચંડી મહાયજ્ઞને લઈને 800 વિઘા જમીન ઉપર ઉમિયાનગર તૈયાર કરવામાં આવ્યું છે. આ ઉમિયાનગર ખાતે 50 લાખ લોકો આવવાની ધારણા કરવામાં આવી છે. ત્યારે તમામ મોબાઈલ કંપનીઓએ લોકોના ધસારા દરમિયાન મોબાઈલ હેંગ ન થાય તે માટે ઉમિયાનગરી ખાતે વધારાના મોબાઈલ ટાવર કાર્યરત કર્યા છે. 

350 વિઘા જમીન ઉપર વિશાળ પાર્કિંગ

તમામ મોબાઈલ કંપનીઓ દ્વારા પોતાના ગ્રાહકો મોબાઈલ નેટવર્ક મળી રહે તે માટે ખાસ વ્યવસ્થા ઉભી કરી છે. તો આ તરફ શ્રદ્ધાળુઓ પોતાના વાહન યોગ્ય સ્થળે પાર્ક થઈ શકે છે. તે માટે 350 વિઘા જમીન ઉપર વિશાળ પાર્કિંગનું નિર્માણ કરવામાં આવ્યું છે.

રંગબેરંગી લાઇટો બની આકર્ષણનું કેન્દ્ર 

તો VIP અને VVIP માટે અલગ પાર્કિંગ વ્યવસ્થા રાખવામાં આવી છે. આ સાથે એક મોબાઈલ એપ પણ તૈયાર કરવામાં આવી છે. તો આ તરફ યજ્ઞમાં અંબાજી જેવો 35 ફૂટની ઉંચાઇ અને 100 ફૂટ પહોળો ગબ્બર ગોખ 2 હજાર વાંસથી તૈયાર કરવામાં આવ્યો છે. તેની ફરતે ખાસ પ્રકારની લાઇટો આકર્ષણ માટે લગાવાઇ છે. માતાજીના ગબ્બરની ફરતે ચાર દિવસ સાંસ્કૃતિક કાર્યક્રમોનું પણ આયોજન કરવામાં આવ્યું છે.