ગુજરાત / ઉમરગામ, દાદરાનગર હવેલીમાં મેઘતાંડવ, રાજ્યના આ 184 તાલુકામાં વરસ્યો વરસાદ, હજુ આગાહી યથાવત્

• વલસાડના ઉમરગામ તાલુકામાં મેઘ તાંડવ
• બુધવાર રાજ્યના 184 તાલુકામાં વરસ્યો વરસાદ
• રાજ્યમાં આગામી 2 દિવસ વરસાદની હવામાન વિભાગની આગાહી

આગામી 2 દિવસ રાજ્યમાં વરસાદની હવામાન વિભાગે આગાહી કરી છે. જેમાં દક્ષિણ-મધ્ય ગુજરાત, કચ્છ-સૌરાષ્ટ્રના કેટલાક વિસ્તારમાં ભારે વરસાદની શક્યતા છે. તો ઉ.ગુજરાતમાં હળવાથી સામાન્ય વરસાદની આગાહી કરવામાં આવી છે. બંગાળની ખાડીમાં વેલમાર્ક લો પ્રેશર-સાયક્લોનીક સિસ્ટમ ઉદભવી છે. જેને લઇને માછીમારોને 3 દિવસ દરિયો ન ખેડવા ચેતવણી આપવામાં આવી છે. રાજ્યમાં 8 ઓગસ્ટથી વરસાદનું જોર ધીમું થશે. અમદાવાદમાં આજે-કાલે હળવાથી સામાન્ય વરસાદની શક્યતા છે. રાજ્યમાં અત્યાર સુધી કુલ વરસાદ 45 % નોંધાયો છે. આ આગાહી વચ્ચે રાજ્યમાં અનેક વિસ્તારોમાં વરસાદ વરસ્યો છે.

દાદરાનગર હવેલીમાં 24 કલાકમાં 15 ઇંચથી વધારે વરસાદ, 1નું મોત

રાજ્યના પડોશમાં આવેલા સંઘપ્રદેશ દાદરાનગર હવેલીમાં પણ ગઈ મોડી રાત્રે ભારે વરસાદ વરસ્યો હતો. દાદરા નગર હવેલીમાં છેલ્લા 24 કલાકમાં 15 ઇંચથી વધારે વરસાદ ખાબકતા પ્રદેશના તમામ નદી-નાળાઓ બે કાંઠે વહી રહ્યા હતા. જોકે આ તોફાની વરસાદનામાં કાર સાથે પાણીમાં તણાઇ જતાં એક યુવકનું પણ કરુણ મોત નિપજયું હતું. જેને કારણે પ્રદેશમાં ચકચાર મચી ગઈ છે.

વલસાડના ઉમરગામ તાલુકામાં ધોધમાર 24 કલાકમાં 14.5 વરસાદ

મહારાષ્ટ્રને અડીને આવેલા વલસાડના ઉમરગામ પંથકમાં મેઘરાજા મહેરબાન થયા છે. ઉમરગામમાં છેલ્લા 24 કલાકમાં 14.5 ઇંચ વરસાદ ખાબક્યો હતો. ભારે વરસાદના કારણે ઉમરગામના નીચાણવાળા વિસ્તારમાં પાણી ભરાયા હતા. સંજાણ વિસ્તારમાં પાણી ભરાતા લોકો હાલાકી ભોગવવાનો વારો આવ્યો હતો. તો બીજી તરફ NDRF ટીમ દ્વારા પાણીમાં ફસાયેલા 200થી વધુ લોકોનું રેસ્ક્યૂ ઓપરેશન કરવામાં આવ્યું હતું. જ્યારે કપરાડામાં 3 ઇંચ અને વાપીમાં 5 ઇંચ વરસાદ નોંધાયો છે. ઉમરગામમાં ભારે વરસાદથી નીચાણવાળા વિસ્તારોમાં પાણી ભરાયા છે. જોકે હાલ વરસાદે વિરામ લેતા લોકોએ હાશકારો અનુભવ્યો છે.

અમદાવાદ, વડોદરા, ગાંધીનગરના વાતાવરણમાં પલટો

સાંજના સમયે અમદાવાદના વાતાવરણમાં પલટો જોવા મળ્યો હતો. ભારે પવન સાથે શહેરના અનેક વિસ્તારોમાં વરસાદ થયો હતો. તો ગાંધીનગરમાં વાદળછાયા વાતાવરણ સાથે તેજ પવન ફૂંકાયો હતો. બીજી તરફ વડોદરામાં લાંબા વિરામ બાદ વરસાદનું આગમન થતાં લોકોમા ખુશી છવાઇ ગઇ હતી.

જેમાં રાજકોટ શહેરમાં અડધો કલાકમાં દોઢ ઇંચ જેટલો વરસાદ ખાબક્યો હતો. તો રાજકોટના ધોરાજીમાં પણ ગાજવીજ સાથે વરસાદ વરસ્યો હતો. અમરેલીના સાવરકુંડલા, લાઠી, રાજુલા સહિતના ગામોમાં વરસાદ પડ્યો હતો. તો પોરબંદર જિલ્લાના બરડા પંથક અને માધવપુર, અડવાણા, સોઢાણ, ભેટકડી સહિતના ગ્રામ્ય વિસ્તારોમાં વરસાદ પડ્યો હતો. એક કલાકમાં આશરે 2 ઈંચથી વધુ વરસાદ વરસ્યો હતો. તો મહીસાગરના સંતરામપુર, કડાણા, ખાનપુર, લુણાવાડામાં વરસાદ સારો વરસાદ પડતા ઉગતા પાકને જીવનદાન મળી જતાં ખેડૂતોને રાહત મળી છે.

ગીર સોમનાથના વેરાવળમાં 2 કલાકમાં 2 ઇંચ વરસાદ ખાબક્યો હતો. ડભોઈ, ખેડા, ડાકોર, ઠાસરા, સેવાલીયા, પંચમહાલના ગોધરા, હાલોલ, કાલોલ, શહેરા, ઘોઘંબા, જાંબુઘોડા, મોરવા હડફ તાલુકાઓમાં વરસાદ ખાબક્યો હતો.

જૂનાગઢના માણાવદરમાં 1 કલાકમાં 2 ઈંચ વરસાદ થયો છે. લાંબા વિરામ બાદ ધમાકેદાર વરસાદ ચાલુ થયો છે. ભવનાથ, મોતીબાગ, ઝાંઝરડા રોડ વિસ્તારમાં વરસાદ થયો છે. કાળવા ચોક, મધુરમ સહિતના વિસ્તારમાં વરસાદ ચાલુ થયો છે. ફરી વરસાદની એન્ટ્રીથી સ્થાનિકો અને ખેડૂતોમાં ખુશી છવાઇ છે.

બોટાદ જિલ્લાના ગઢડા, બરવાળા, રણીયાળા, માડવધાર, ગોરડકા, બરવાળા, રોજીદ સહીતના ગામોમાં પણ વરસાદ થયો છે. તો ભાવનગર જિલ્લાના અનેક ગામડાઓમાં વરસાદ વરસ્યો હતો. તો સુરેન્દ્રનગરના લખતર અને આસપાસના ગ્રામ્ય વિસ્તારોમાં વરસાદ વરસ્યો હતો. બીજી તરફ સાબરકાંઠા જિલ્લામાં વરસાદ થયો છે. તલોદ, ગાંભોઇમાં સારા પ્રમાણમાં વરસાદ થયો છે. તો અરવલ્લી, મોડાસા, ભિલોડા, મેઘરજ, છીટાદરા, વડથલી, રેલ્લાવાળા, ગેડમાં વરસાદ થયો છે.

કેશોદના અજાબ ગામે વરસાદ શરૂ થયો છે. બીજા દિવસે પણ ધોધમાર વરસાદ શરૂ છે. વાદળછાયા વાતાવરણ વચ્ચે વરસાદ થયો છે. વાવણી લાયક વરસાદથી ખેડૂતો અને સ્થાનિકોમાં ખુશી થઇ છે. લાંબા વિરામબાદ વરસાદ થવાથી લોકોમાં આનંદ છવાયો છે.

બુધવાર રાજ્યના 184 તાલુકામાં વરસ્યો વરસાદ

• તાપીના ડોલવણમાં 3.5 ઈંચ
• જાફરાબાદમાં 3 ઈંચ
• વાંસદામાં 3 ઈંચ
• તારાપુરમાં પોણા 3 ઈંચ
• માંગરોળમાં સવા 2 ઈંચ
• માણાવદરમાં સવા 2 ઈંચ
• વલસાડમાં સવા 2 ઈંચ
• ગઢડામાં સવા 2 ઈંચ
• વેરાવળમાં સવા 2 ઈંચ
• ભાવનગરમાં 2 ઈંચ
• મહુવામાં 2 ઈંચ
• ધાનેરામાં 2 ઈંચ
• વિસાવદરમાં 2 ઈંચ
• પારડીમાં 2 ઈંચ
• રાજુલામાં 2 ઈંચ
• સારવકુંડલામાં પોણા 2 ઈંચ
• ગણદેવીમાં પોણા 2 ઈંચ
• અમરેલીમાં પોણા 2 ઈંચ
• ખંભાતમાં પોણા 2 ઈંચ
• બાયડમાં દોઢ ઈંચ
• પ્રાંતિજમાં દોઢ ઈંચ
• ધોરાજીમાં દોઢ ઈંચ
• ભેસાણમાં દોઢ ઈંચ
• નવસારીમાં દોઢ ઈંચ
• વડિયામાં દોઢ ઈંચ
• લીમડીમાં દોઢ ઈંચ
• કડાણામાં દોઢ ઈંચ
• જેતપુર પાવીમાં દોઢ ઈંચ
• કલોલમાં દોઢ ઈંચ
• સુત્રાપાડામાં દોઢ ઈંચ
• કુકરમુંડામાં દોઢ ઈંચ