ચિંતા / કોરોના સંકટ વચ્ચે યુદ્ધના ભણકારાથી થથરી ઉઠ્યું વિશ્વ, અમેરિકાએ આપી ચેતવણી

• રશિયા અને યુક્રેન સરહદ વચ્ચે તણાવ વધ્યો 
• અમેરિકાએ રાશિયાને આપી ચેતવણી 
• યુક્રેને કહ્યું અમારી સુરક્ષાને છે ખતરો 

શું છે સમગ્ર મામલો? 

કોરોના વાયરસની વચ્ચે શું વિશ્વએ હવે યુદ્ધનો સામનો કરવો પડશે? રશિયાની સેના યુક્રેનની સરહદ તરફ કૂચ કરી રહી હોવાના વીડિયો અને અહેવાલ સામે આવતા આ સવાલ ફરીથી ઊભો થઈ રહ્યો છે કે રશિયા શું કરવાનું વિચારી રહ્યું છે? રશિયાની બખ્તરબંધ ગાડીઓ અને ટેન્ક યુક્રેન તરફ અગાળ વધી રહ્યા છે. 

યુક્રેન અને રશિયા વચ્ચે વધી રહ્યો છે વિવાદ 

રશિયાની સેનાની ગતિવિધિઓ એટલી તેજ બની છે કે વિશ્વના ઘણા બધા દેશો હવે ચિંતામાં મૂકાયા છે અને વીડિયો પણ સોશ્યલ મીડિયામા વાયરલ થઈ રહ્યા છે. નોંધનીય છે કે યુક્રેન અને રશિયા વચ્ચે ધીમે ધીમે ઘણા સમયથી વિવાદ વધી રહ્યો છે. હાલમાં અમેરિકાનું એક કાર્ગો જહાજ યુક્રેન આવી પહોંચ્યું હતું જેની સામે રશિયાએ લાલ આંખ કરી હતી. હવે રશિયાની સેના જે રીતે આગળ વધી રહી છે તેને જોતાં અમેરિકા પણ ચિંતામાં મૂકાયું છે. 

અમેરિકા ટેન્શનમાં મૂકાયું 

અમેરિકાના અધિકારીઓ દ્વારા ચિંતા વ્યક્ત કરવામાં આવી છે કે મોસ્કોની વધતી નારાજગીને જોતાં બંને દેશો વચ્ચે યુદ્ધનો ખતરો પેદા થઈ ગયો છે. અમેરિકાની સૈન્ય સંસ્થા પેન્ટાગોનના પ્રવક્તાએ જૉન કિરબીએ કહ્યું કે અમે અત્યારે ભારે સૈન્ય હલચલ મુદ્દે વધુ જાણકારી મેળવી રહ્યા છે.  અમેરિકાની સેનાના જોઇન્ટ ચીફ ઓફ સ્ટાફના ચેરમેન જનરલ માર્ક મિલેએ પણ રશિયા પાસેથી આ મુદ્દે જાણકારી માંગી હતી પરંતુ હજુ સુધી સ્પષ્ટ નથી કે રશિયાએ તેના પર શું જવાબ આપ્યો છે. અમેરિકાની સેનાના જનરલે યુક્રેનની સેનાના કમાન્ડર ઇન ચીફ સાથે વાતચીત કરી છે. 

નવભારત ટાઈમ્સની રિપોર્ટ અનુસાર વીડિયો પરથી કહી ન શકાય કે રશિયાની સેના કયા સમયે આ ગતિવિધિઓ તેજ કરી હતી પરંતુ મોટા ભાગના વીડિયો 27 માર્ચના હોવાનું માનવામાં આવે છે. રશિયાના લડાકૂ વિમાનો પણ ત્યાં મંડરાઈ રહ્યા છે. 

(PHOTOS : પ્રતિકાત્મક/elements.envato.com)