રશિયા-યુક્રેન વચ્ચે સતત 11 દિવસથી ભીષણ જંગ શરૂ છે. ત્યારે રશિયાને રોકવા માટે અમેરિકા સહિતનાં દેશોએ અનેક આર્થિક પ્રતિબંધ લગાવી દીધા છે. ત્યારે હવે વિઝા અને માસ્ટરકાર્ડે પણ રશિયામાં લેણદેણનું તમામ કામ બંધ કરવાનો મહત્વનો નિર્ણય લીધો છે.
વિઝા અને માસ્ટરકાર્ડે રશિયામાં કામ બંધ કર્યું
રશિયન બેંકો દ્વારા જારી કરાયેલ કાર્ડ દેશની બહાર પણ કામ નહીં કરી શકે
યુક્રેનમાં રશિયન કાર્યવાહીની વિરૂદ્ધ કંપનીએ આ નિર્ણય લીધો
ક્રેડિટ કાર્ડ અને પેમેન્ટ્સની દિગ્ગજ કંપની માસ્ટરકાર્ડ તથા વિઝાએ મહત્વની જાહેરાત કરતા જણાવ્યું છે કે, 'રશિયામાં તેઓ પોતાની તમામ સેવાઓ સ્થગિત કરી રહ્યાં છે અને રશિયાની બેંકો દ્વારા જારી કરવામાં આવેલા તેમના કાર્ડ પણ હવે દેશની બહાર નહીં ચાલે. વિઝાએ શનિવારના રોજ મહત્વનું નિવેદન રજૂ કરતા જણાવ્યું હતું કે, 'તુરંત પ્રભાવી, આવનારા દિવસોમાં તમામ વિઝા લેણદેણને રોકવા માટે વિઝા રશિયાની અંદર પોતાના ગ્રાહકો અને ભાગીદારો સાથે કામ કરશે. લેણદેણ પૂર્ણ થઇ જવા પર કામ બંધ થઇ જશે. રશિયામાં જારી કરવામાં આવેલા વિઝા કાર્ડ સાથે શરૂ કરવામાં આવેલ તમામ પ્રકારની લેણદેણ હવે દેશ બહાર કામ નહીં કરે.'
કંપનીએ જણાવ્યું કે, 'તેઓનો આ નિર્ણય યુક્રેન સંકટના કારણે લેવામાં આવ્યો છે. વિઝા ઇંકના અધ્યક્ષ અને મુખ્ય કાર્યકારી અધિકારી અલ કેલીએ પોતાના નિવેદનમાં જણાવ્યું હતું કે, 'આ યુદ્ધ, શાંતિ અને સ્થિરતા માટેનો ખતરો છે અને અમે અમારી માંગ અને અમારા મૂલ્યો અનુસાર મહત્વના પગલાં લઈ રહ્યાં છીએ. માસ્ટરકાર્ડે યુક્રેનમાં વિશેષ સૈન્ય અભિયાનના કારણે રશિયામાં નેટવર્ક સેવાઓને પણ સ્થગિત કરી દીધી હતી.'
માસ્ટરકાર્ડનું નિવેદન
માસ્ટરકાર્ડે શનિવારનાં રોજ પોતાના નિવેદનમાં જણાવ્યું હતું કે, "આ નિર્ણય માસ્ટરકાર્ડ પેમેન્ટ નેટવર્કમાંથી અનેક નાણાંકીય સંસ્થાઓને બ્લોક કરવાના અમારા સૌથી મહત્વનાં નિર્ણયોમાંનો એક નિર્ણય છે." તે વૈશ્વિક સ્તરે નિયમનકારો દ્વારા જરૂરી છે. કંપનીએ જણાવ્યું કે, 'રશિયન વેપારીઓ રશિયાની બહાર જારી કરાયેલા કાર્ડ સાથે વ્યવહાર નહીં કરી શકે. કાર્ડ રશિયના ATM માં કામ નહીં કરે.'
બંને કંપનીઓ દ્વારા જારી કરાયેલા નિવેદનના જવાબમાં, રશિયન સરકારી માલિકીની બેંકિંગ કંપનીએ કહ્યું કે, 'દેશમાં વિઝા અને માસ્ટરકાર્ડ સેવાઓને સસ્પેન્ડ કરવાથી દેશની અંદર રશિયાની Sberbank દ્વારા જારી કરાયેલા કાર્ડના ઉપયોગ પર તેની અસર નહીં થાય.'