જો તમે તમારા આધાર કાર્ડને લેમિનેશન કરાવ્યું છે અથવા તો પ્લાસ્ટિક કાર્ડ જેવા આધાર કાર્ડનો ઉપયોગ કરી રહ્યાં છો તો સાવધાન થઈ જાઓ. UIDAIએ આવા આધારને લઈને ચેતવણી આપી છે. UIDAIએ કહ્યું છે કે, આવું કરવા પર તમારા આધાર કાર્ડનો ક્યૂઆર કોડ કામ કરવાનું બંધ કરી શકે છે અથવા તો પર્સનલ જાણકારી ચોરી પણ થઈ શકે છે. UIDAIનું કહેવું છે કે, આવું કરવા પર તમારી મંજૂરી વિના જ તમારી પર્સનલ જાણકારી કોઈ બીજા પાસે પહોંચી શકે છે.
UIDAIએ આપી ચેતવણી
આવો આધાર કાર્ડ તમારા માટે નુકસાનકારક
તમારી પર્સનલ જાણકારી ચોરાઈ શકે છે
થશે આ નુકસાન
UIDAIએ પ્લાસ્ટિકના આધાર કાર્ડના નુકસાન જણાવતા એક નિવેદન જારી કર્યું હતું. જેમાં ઓથોરિટીએ કહ્યું હતું કે, પ્લાસ્ટિક આધાર અથવા તો સ્માર્ટ આધાર કાર્ડનો ઉપયોગ કરવો નહીં. આવા કાર્ડને કારણે આધાર ડિટેલ્સની પ્રાઈવેસી પર ખતરો છે. UIDAIનું કહેવું છે કે, પ્લાસ્ટિક આધાર કાર્ડ ઘણીવખત કામ કરતું નથી. જેની પાછળનું કારણ એ છે કે, પ્લાસ્ટિક આધારની અનઓથોરાઈઝ્ડ પ્રિન્ટિંગને કારણે તેનું ક્યૂઆર કોડ કામ કરતું નથી. સાથે જ આધારમાં રહેલી પર્સનલ ડિટેલ્સ પણ તમારી મંજૂરી વિના શેર કરવાનો ખતરો રહે છે.
આટલા પૈસા ખર્ચ કરીને બનાવી શકાય છે પ્લાસ્ટિક આધાર
નિવેદનમાં એવું પણ કહેવામાં આવ્યું છે કે, પ્લાસ્ટિક અથવા પીવીસી શીટ પર આધારની પ્રિન્ટિંગના નામ પર લોકોથી 50 રૂપિયાથી લઈને 300 રૂપિયા સુધી વસૂલવામાં આવે છે. અમુક જગ્યાએ તો આનાથી પણ વધારે ચાર્જ લેવામાં આવે છે. UIDAIએ લોકોને આ પ્રકારની દુકાનો અને લોકોથી દૂર રહેવાની સલાહ આપી છે.
આવું આધાર પણ વેલિડ ગણાય
UIDAIએ તેના નિવેદનમાં એક વાત પર ભાર આપ્યો છે કે, ઓરિજિનલ આધાર સિવાય એક સાધારણ પેપર પર ડાઉનલોડ કરેલું આધાર અને એમઆધાર પણ સંપૂર્ણ રીતે વેલિડ છે. જેથી તમારે સ્માર્ટ આધારના ચક્કરમાં પડવાની જરૂર નથી. એટલું જ નહીં તમારે કલર્ડ પ્રિન્ટની પણ જરૂર નથી. સાથે જ અલગથી આધાર કાર્ડ લેમિનેશન અને પ્લાસ્ટિક આધાર કાર્ડની પણ જરૂર હોતી નથી. જો તમારો આધાર કાર્ડ ખોવાઈ જાય તો તમે ફ્રીમાં https://eaadhaar.uidai.gov.in પરથી આધાર ડાઉનલોડ કરી શકો છો.