શૈક્ષણિક ફ્રોડ પર પ્રકાશ / 12માં પછી કોલેજોમાં એડમિશન લેવા થનગની રહેલા વિદ્યાર્થીઓ માટે આવી UGCની ચેતવણી, માનજો નહીંતર મુસીબત

• 12 પછી કોલેજોમાં ભણવા ઈચ્છુક વિદ્યાર્થીઓને યુજીસીની ચેતવણી
• દેશમાં શરુ થઈ છે નકલી યુનિવર્સિટી
• વિદ્યાર્થીઓને ચેતવણી- નકલી યુનિવર્સિટીની જાળમાં ન ફસાતાં 

ધોરણ 12ની બોર્ડની પરીક્ષાઓ હવે અંતિમ તબક્કામાં છે અને હવે વિદ્યાર્થીઓ પોતાને માટે યુનિવર્સિટીઓ અને કોલેજો શોધવાનું શરૂ કરશે. આ સમય દરમિયાન નકલી સંસ્થાઓનો ખેલ પણ શરૂ થયો છે જે વિદ્યાર્થીઓ અને તેમના વાલીઓને પોતાની સંસ્થાઓમાં પ્રવેશ અપાવવાની લાલચ આપે છે. યુનિવર્સિટી ગ્રાન્ટ્સ કમિશન (યુજીસી)એ વિદ્યાર્થીઓને નવું સત્ર શરૂ થાય તે પહેલાં જ નકલી સંસ્થાઓની જાળમાં ન ફસાવાની ચેતવણી આપી છે અને યુજીસીની વેબસાઇટ પરથી કોઈપણ યુનિવર્સિટી વિશેની માહિતી મેળવી શકાય છે.

UGC warns students against ‘self-styled’ varsity, board of alternative medicinehttps://t.co/DQ5cakQvhc

— Mamidala Jagadesh Kumar (@mamidala90) March 30, 2023

તમિલનાડુની બે સ્વઘોષિત શિક્ષણ સંસ્થાને નોટીસ 
યુજીસી નકલી યુનિવર્સિટીઓની યાદી પણ જાહેર કરે છે અને આગામી દિવસોમાં ફરી એકવાર આ યાદી જાહેર કરવામાં આવશે. હાલ યુજીસીએ તામિલનાડુની બે સંસ્થાઓને જાહેર નોટિસ પાઠવીને કહ્યું છે કે, વિદ્યાર્થીઓએ આ સ્વઘોષિત ઉચ્ચ શિક્ષણ સંસ્થાઓમાં પ્રવેશ લેવાનું ટાળવું જોઈએ.

યુજીસીની વેબસાઈટ પર સાચી યુનિવર્સિટીની કરો ખાતરી 
યુજીસીના ચેરમેન પ્રો. એમ. જગદેશ કુમારે કહ્યું કે જો વિદ્યાર્થીઓને કોઈ પણ યુનિવર્સિટીની સ્થિતિ અંગે શંકા હોય તો તેઓએ યુજીસીની વેબસાઇટ પર ખાતરી કરવી જોઈએ. યુજીસી નકલી યુનિવર્સિટીઓ અને યુજીસીની માન્યતા ધરાવતી સંસ્થાઓ બંનેની યાદી જાહેર કરે છે. તેમણે વિદ્યાર્થીઓને અપીલ કરી છે કે તેઓ નકલી યુનિવર્સિટીઓનો શિકાર ન બને. સમયાંતરે રાજ્ય સરકારોને પત્ર પણ લખવામાં આવે છે કે, આવી યુનિવર્સિટીઓ સામે પગલાં લેવા અને તેને બંધ કરી દેવામાં આવે. ફરી એકવાર નવી યાદી જાહેર કરવામાં આવશે. સાથે જ રાજ્ય સરકારોને પણ લખવામાં આવશે કે નિયમો વિરુદ્ધ ચાલતી શૈક્ષણિક સંસ્થાઓ સામે કાર્યવાહી થવી જોઈએ અને તેમને બંધ કરી દેવા જોઈએ. યુજીસીએ 28 માર્ચના રોજ જાહેર નોટિસ જારી કરીને જણાવ્યું હતું કે ઓપન ઇન્ટરનેશનલ યુનિવર્સિટી ફોર ઓલ્ટરનેટિવ મેડિસિન્સ અને નેશનલ બોર્ડ ઓફ ઓલ્ટરનેટિવ મેડિસિન્સ વિવિધ ડિગ્રી કોર્સ અને પ્રોગ્રામ્સ ચલાવી રહ્યા છે. આ બંને સંસ્થાઓ યુજીસી એક્ટ 1956ની વિરુદ્ધ અભ્યાસક્રમો ચલાવી રહી છે અને વિદ્યાર્થીઓને આ સંસ્થાઓમાં પ્રવેશ ન લેવા અપીલ કરવામાં આવી છે.

UGC warns students not to take admission in two ‘self-styled’ alternative medicines instituteshttps://t.co/S0M3OS0aYX

— Mamidala Jagadesh Kumar (@mamidala90) March 30, 2023

નકલી યુનિવર્સિટીઓ બંધ કરો- યુજીસીની રાજ્યોને સલાહ 
યુજીસીએ તે તમામ રાજ્યોને પત્ર લખ્યો છે જ્યાં નકલી યુનિવર્સિટીઓ ચાલી રહી છે. રાજ્યોએ આવી બનાવટી યુનિવર્સિટીઓ સામે કાયદેસરની કાર્યવાહી કરવી પડશે અને યુનિવર્સિટી બંધ કરવી પડશે. રાજ્યોને જ્યારે નકલી યુનિવર્સિટી બંધ કરવાની જાણકારી આપવામાં આવે છે ત્યારે તે યુનિવર્સિટીનું નામ લિસ્ટમાંથી હટાવી દેવામાં આવે છે. છેલ્લા કેટલાક વર્ષોમાં ઘણી યુનિવર્સિટીઓના નામ આ યાદીમાંથી દૂર કરવામાં આવ્યા છે, જ્યારે ઘણી નકલી યુનિવર્સિટીઓને પણ આ યાદીમાં સામેલ કરવામાં આવી છે.