પ્રતિબંધ / ચીનની આ મોટી કંપનીએ ભારતની ઓફિસ પર મારી દીધા તાળા, કર્મચારીઓ માટે કર્યું આ કામ

અલીબાબાએ કંપનીના પે-રોલ પર કામ કરી રહેલા 26 ભારતીય કર્મચારીઓને બરતરફ કરી દીધા છે. કંપનીએ સરકાર દ્વારા એપ બંધ કરવાનો સંદર્ભ આપતા બધા કર્મચારીઓને નિકાળી દીધા છે. જો કે કંપનીએ આ કર્મચારીઓને વળતર આપવા અંગેની વાત જણાવી છે. 

અલીબાબા તરફથી બધા કર્મચારીઓને પોતાની મુંબઇ અને ગુરૂગ્રામ ઓફિસ બંધ કરવા અંગેની જાણકારી આપી દીધી છે. 

ઉલ્લેખનીય છે કે અલીબાબાની યૂસી બ્રાઉઝર ભારતમાં ગૂગલ પછી સૌથી વધારે ઉપયોગ કરનારી એપ છે, અને જેક મા ની અલીબાબા દુનિયાની સૌથી મોટી ઇ-કૉમર્સ કંપનીમાંથી એક છે. 

ભારતમાં કેન્દ્ર સરકાર દ્વારા 29 જૂનના રોજ દેશની આંતરિક સુરક્ષાને ધ્યાનમાં લઇને યૂસી બ્રાઉઝર, યૂસી ન્યૂઝ, વીમેટ, વીચેટ, ટિકટોક, શેયર ઇટ સહિત કુલ 59 ચીનની મોબાઇલ એપ પર પ્રતિબંધ લગાવી દીધો હતો. 

સરકારે જણાવ્યું હતું કે તેમાં ઘણા સ્ત્રોતમાંથી ઘણી ફરિયાદો મળી છે, જેમાં કેટલાક મોબાઇલ એપના દુરુપયોગ અંગે જણાવાયું છે. આ એપ પર ભારતીય નાગરિકોની મહત્વની જાણકારી ચોરવાનો આરોપ છે. 

જો કે હાલમાં અલીબાબા કંપનીના આ નિર્ણયથી કર્મચારી ઘણા પરેશાન છે અને નવી નોકરીની શોધમાં છે. 

બીજી તરફ સૂચના પ્રૌદ્યોગિકી અધિનિયમની ધારા 69A હેઠળ ભારત સરકારે જે 59 એપ્સને બ્લોક કરી હતી, તેમાં સરકારે 70થી વધારે સવાલોની એક વિસ્તૃત યાદી આપી છે, જેનો જવાબ તેને ત્રણ અઠવાડીયાની અંદર આપવો પડશે.