ટ્રાવેલિંગ કરતા સમયે સૌથી વધારે કેબના ઉપયોગ થતો હોય છે પરંતુ આ પ્રકારે ટ્રાવેલિંગમાં સુવિધા સાથે સુરક્ષા પણ એટલું જ મહત્ત્વ ધરાવે છે.
દેશમાં અનેક કેબ એગ્રીગેટર કંપનીઓ કાર્યરત છે. તમામ કંપનીઓ પોત પોતાના અલગ અલગ સેફટી ફીચર્સ ધરાવે છે. યુઝરને વધારે સુરક્ષા આપવા માટે હવે ઉબર કંપનીમાં રાઈડ ચેક, ઓડિયો રેકોર્ડિંગ અને પિન વેરિફિકેશન ફીચર ઉમેરવામાં આવશે. પિન વેરિફિકેશન અને રાઈડ ચેક ફીચરને પાયલટ પ્રોજેક્ટ અંતર્ગત કોલકાતા સહિત અન્ય શહેરોમાં કાર્યરત કરી દેવામાં આવ્યા છે. ટૂંક સમયમાં જ આ ફીચર દેશના તમામ શહેરોમાં ચાલુ કરી દેવામાં આવશે.
રાઈડ ચેક : આ ફીચરની મદદથી યાત્રા દરમિયાન જો કેબ વધારે સમય સુધી કારણ વગર ઉભી રહેશે તો ઉબર કસ્ટરમર કેર પાસે તેની જાણકારી આપમેળે પહોંચી જશે. તેનાથી યુઝરને સમયસર સુરક્ષા અને મદદ કરવામાં સરળતા રહેશે.
ઓડિયો રેકોર્ડિંગ: કેબમાં યાત્રા દરમિયાન જો યુઝરને ડ્રાઈવરનો વ્યવહાર ખરાબ લાગે તો તે એપમાં આપેલાં ઓડિયો રેકોર્ડિંગ બટનની મદદથી ડ્રાઈવર અને તેની વચ્ચેની વાતચીતને રેકોર્ડ કરીને સર્વિસ સેન્ટર મોકલી શકે છે. આ જ સુવિધાનો ઉપયોગ ડ્રાઇવર પણ ઉપયોગ કરી શકશે. જોકે યુઝર અથવા ડ્રાઇવર રેકોર્ડિંગને શેર, ડાઉનડલોડ અથવા સાંભળી નહીં શકે. માત્ર સર્વિસ સેન્ટરના લોકો જ તેને સાંભળી શકશે. આ ફીચર કાયદાકીય રીતે અનેક રીતે મદદગાર સાબિત થશે.
પિન વેરિફિકેશન : આ સિવાય ઉબર પણ હવે ઓલાની જેમ પિન વેરિફિકેશન સિસ્ટમ લાવશે. અર્થાત હવે યુઝરે રાઈડ શરૂ થતાં પહેલાં કંપની તરફથી મળેલા પિનને રાઈડ પહેલાં ડ્રાઈવરને જણાવવો પડશે. આ સિવાય યુઝર ડ્રાઈવરની નજદીક પહોંચે તો આપમેળે પિન ડ્રાઈવર પાસે જશે.