ચોમાસુ શરૂ થતાંની સાથે જ તમે સમાચારમાં અને છાપામાં જોશો કે કેટલાક શબ્દોનો પ્રયોગ કરવામાં આવશે જેમકે મૂશળધાર વરસાદ, બારે માસ ખાંગા, ધીમી ધારે વરસાદ વગેરે.. આપણને ખબર પણ નથી હોતી તેમ છતાં આ પ્રકારના શબ્દોથી આપણે પરિચીત થઇ જઇએ છીએ. આ પ્રકારના વરસાદના 12 પ્રકાર છે, આજે અમે તમને જણાવીશું કે વરસાદના 12 પ્રકાર ક્યા છે.
જાણો વરસાદના 12 પ્રકાર
વરસાદને હેલી પણ કહેવાય છે
લોકસાહિત્ય પ્રમાણે 12 પ્રકાર છે
ગુજરાતી લોક્સાહિત્ય પ્રમાણે 12 પ્રકારના મેઘનુ વર્ણન કરવામાં આવેલ છે, તેના ઉપરથી કહેવત પણ બનેલ છે : બારે મેઘ ખાંગા.. બાર પ્રકારના મેઘ આ મુજબ છે :
1 ફરફરઃ જેનાથી માત્ર હાથપગના રૂંવાડા જ ભીના થાય તેવો નજીવો વરસાદ.
2 છાંટાઃ ફરફરથી વધુ વરસાદ.
3 ફોરાઃ છાંટાથી વધુ- મોટા ટીપાં.
4 કરાઃ ફોરાથી વધુ પણ જેનું તરત જ બરફમાં રૂપાંતર થઈ જાય તેવો વરસાદ.
5 પછેડીવાઃ પછેડી (ફેંટા જેવા સાથે રખાતા કપડાની ટુકડો)થી રક્ષણ થાય તેવો વરસાદ.
6 નેવાધારઃ છાપરાના નેવા ઉપરથી (નળીયા ઉપરથી) પાણી વહે તેવો વરસાદ.
7 મોલ મેહઃ મોલ એટલે પાકને જરૂરી હોય તેવો વરસાદ.
8 અનરાધારઃ એક છાંટો, બીજા છાંટાને સ્પર્શી જાય અને ધાર પડે તેવો વરસાદ.
9 મૂશળધારઃ અનારાધારથી તીવ્ર વરસાદ (મુશળ = સાંબેલું ). આ વરસાદને સાંબેલાધાર વરસાદ પણ કહેવામાં આવે છે.
10 ઢેફાભાંગઃ વરસાદની તીવ્રતાથી ખેતરોમાં માટીના ઢેફા નરમ થઈ તૂટી જાય તેવો વરસાદ.
11 પાણ મેહઃ ખેતરો પાણીથી છલોછલ ભરાઇ જાય અને કૂવાના પાણી ઉપર આવી જાય તેવો વરસાદ.
12 હેલીઃ ઉપરના અગિયાર પ્રકારના વરસાદમાંથી કોઈને કોઈ વરસાદ સતત એક અઠવાડીયું ચાલે તેને હેલી કહેવામાં આવે છે.