વડોદરાના છાણી પોલીસની હદમાં આવતા ફર્ટિલાઇઝર બ્રિજ પાસે આ ગમખ્વાર અકસ્માત સર્જાયો હતો.
ગુજરાતમાં દિવસેને દિવસે અકસ્માતની ઘટનાઓમાં મોટો વધારો થઈ રહ્યો છે. અમદાવાદથી સુરત જતું ટ્રેલર એક ટ્રક સાથે અથડાતાં, ગંભીર અકસ્માત સર્જાયો હતો. અકસ્માત એટલો ભયાનક હતો કે ટ્રકની કેબિનના કુરચા ઊડી ગયા હતા. તેમજ ટ્રક ચાલ સહિત ક્લીનર પણ ટ્રકની કેબિનમાં દબાઈ ગયા હતા. વડોદરાના ફર્ટિલાઇઝર બ્રિજ પાસે આ અકસ્માત થતાજ લોકોના ટોળે ટોળા ઉમટી પડ્યા હતા.
છાણી પોલીસ ઘટના સ્થળે દોડી આવી
અકસ્માતની ગંભીરતાને સમજી રાહદારીએ પોલીસ તંત્રને જાણ કરી હતી, જે બાદ પોલીસ ઘટના સ્થળે પહોંચી કેબિનમાં ફસાયેલા બંને ઈજાગ્રસ્તોને બહાર કાઢવાની કામગીરી હાથ ધરી હતી પણ અકસ્માત એટલો ભયાવહ હતો કે કેબિનની અંદરથી લોકોને કાઢવા વધારે મુશ્કેલ હતા. જે બાદ પોલીસ ફાયર વિભાગની મદદ લીધી.
ફાયર ટીમે કેબિન કાપી ઈજાગ્રસ્તોને બહાર કાઢ્યા
મળતી માહિતી અનુસાર કેબિન સાથે ડ્રાઈવર અને ક્લીનર બંને ચોંટી ગયા હતા અને ગંભીર રીતે ઘાયલ થતાં ફાયર ટીમની પણ મદદ લેવી પડી હતી. સ્થિતિને જોતાં જ ફાયરની ટીમ પણ થોડો સમય માટે ચોંકી ગઈ હતી. જે બાદ ફાયર વિભાગના કર્મચારીઓએ સાધનોની મદદ વડે કેબિનને કાપવાનું શરૂ કર્યું હતું. મહામહેનતે કેબિનમાં ફસાયેલા બંને ઈજાગ્રસ્તોને કેબિન માંથી પોલીસ અને સ્થાનિક લોકોની પણ મદદ વડે બહાર કાઢી લેવામાં આવ્યા હતા.
નજીકની હોસ્પિટલમાં સારવાર અર્થે ખસેડાયા
અકસ્માતનો ભોગ બનેલા બંને લોકો ગંભીર રીતે ઇજાગ્રસ્ત હતા જેથી તાત્કાલિક સારવાર માટે તેમણે નજીકની હોસ્પિટલમાં ખસેડવામાં આવ્યા છે, જો કે, હજુ સુધી અક્સમાતમાં કોઈ જાનહાનીના સમાચાર નથી. પણ સમગ્ર મામલે પોલીસ તપાસ હાથ ધરી છે અને અકસ્માત થવાના કારણો અંગે પણ ત્યાં રાહદારીઑની આંખોદેખી જોવામાં આવી રહી છે.